ବ୍ରହ୍ମପୁର,୧୮/୦୭: ବାର୍ଦ୍ଧକ୍ୟ ଭତ୍ତା ପାଇଁ ଧାଇଁ ଧାଇଁ ଥକି ପଡ଼ିଲେଣି । ଜଣେ ଅଧିକାରୀଙ୍କ ପାଖକୁ ଗଲେ ସେ ଅନ୍ୟ ଜଣକୁ ଦେଖାଉଛନ୍ତି। ହଜାରେ ଟଙ୍କା ପାଇବା ପାଇଁ ୫ ଶହ ଟଙ୍କା ଗାଡ଼ି ଖର୍ଚ୍ଚ ଲାଗି ଯାଉଛି । କିଛି ହିତାଧିକାରୀ ୩ ମାସ ହେଲା ମୂଳରୁ ଟଙ୍କାଟିଏ ପାଇ ନାହାନ୍ତି। କିନ୍ତୁ ଟଙ୍କା ପାଇଁ ବିଏମସିକୁ ଯିବା ଆସିବାରେ ଶହ ଶହ ଟଙ୍କା ଖର୍ଚ୍ଚ କରି ସାରିଲେଣି । ଜଣେ ଜଣକୁ ଦେଖାଇବା ପରେ ଶେଷରେ ଆସନ୍ତା ମାସକୁ ଟଙ୍କା ନେବା ପାଇଁ ଆସିବାକୁ କହୁଛନ୍ତି ଦାୟିତ୍ୱରେ ଥିବା ଅଧିକାରୀ । ବାରମ୍ବାର ଭତ୍ତା ପ୍ରଦାନ କରାଯାଉଥିବା କେନ୍ଦ୍ର ସମେତ ବ୍ୟାଙ୍କ, ବିଏମସିକୁ ଧାଇଁ ନୟାନ୍ତ ହେଉଛନ୍ତି ବୟସ୍କ ଓ ଭିନ୍ନକ୍ଷମ ।
ବ୍ରହ୍ମପୁର ମହାନଗର ନିଗମରେ ସାମାଜିକ ସୁରକ୍ଷା ଭତ୍ତା ପ୍ରଦାନରେ ଅବ୍ୟବସ୍ଥା ଅଭିଯୋଗ ହୋଇଛି । ପ୍ରତିମାସରେ ଭତ୍ତା ଟଙ୍କା ମିଳି ନଥିବା ଅଭିଯୋଗ ନେଇ ବିଏମସିରେ ଧାଡ଼ି ଲମ୍ବୁଛି । କିଛି ମାସ ହେଲା ନିଗମରେ ଏହିପରି ଅବ୍ୟବସ୍ଥା ଅଭିଯୋଗ ହୋଇଛି । ଏହାକୁ ନେଇ ପ୍ରତି ପରିଷଦ ବୈଠକରେ ନିର୍ବାଚିତ ପ୍ରତିନିଧିମାନେ ପ୍ରଶ୍ନ କରୁଛନ୍ତି ଓ ସମାଧାନ କରିବାକୁ ନିର୍ଦ୍ଦେଶ ହେଉଛି । କିନ୍ତୁ ପରବର୍ତ୍ତୀ ସମୟରେ ଫଳ ଶୂନ । ସମସ୍ୟା କେଉଁଠି ରହିଛି ସମସ୍ତ ଅଧିକାରୀ ଜାଣି ମଧ୍ୟ ଚୁପ୍ ।
ସୂଚନା ପ୍ରକାରେ, ୨୦୧୭ ମସିହାରେ ଭତ୍ତା ପ୍ରଦାନରେ ସ୍ୱଚ୍ଛତା ଅବଲମ୍ବନ କରିବା ପାଇଁ ସରକାରଙ୍କ ପକ୍ଷରୁ ଡିଜିଟାଲ ମୋଡରେ ସେବା ପ୍ରଦାନ ପାଇଁ ପଦକ୍ଷେପ ଗ୍ରହଣ କରାଯାଇଥିଲା । ଏଥି ନିମନ୍ତେ ଆଇସିଆଇସିଆଇ ବ୍ୟାଙ୍କ ସହ ଅନୁବନ୍ଧିତ ଏକ ଘରୋଇ ସଂସ୍ଥାକୁ ନିୟୋଜିତ କରାଗଲା । ଉକ୍ତ ସଂସ୍ଥା ସମସ୍ତ ହିତାଧିକାରୀଙ୍କ ନୂତନ ବ୍ୟାଙ୍କ ଆକାଉଣ୍ଟ ଖୋଲିବା ସହ ତାହା ଜରିଆରେ ଟଙ୍କା ପ୍ରଦାନ ଆରମ୍ଭ କରିଥିଲେ ।
ଧିରେ ଧିରେ ସେଥିରେ ସମସ୍ୟା ଦେଖା ଦେବା ସହ ବିଭିନ୍ନ ସମୟରେ ଲୋକଙ୍କ ଖାତାକୁ ଟଙ୍କା ଆସିଲାନି ତ କେବେ ଟିପ ଚିହ୍ନ ନମିଶିବାରୁ ଟଙ୍କା ପାଇବାରୁ ହିତାଧିକାରୀ ବଞ୍ଚିତ ହେଉଥିଲେ । ଏହାକୁ ସରଳ କରିବା ପାଇଁ ୨୦୧୯ରେ ନିଗମ ପକ୍ଷରୁ କିଛି ହିତାଧିକାରୀଙ୍କ ନିଜସ୍ୱ ବ୍ୟାଙ୍କ ଖାତାକୁ ସଂଯୋଗ କରି ଟଙ୍କା ପଠାଗଲା । ପରବର୍ତ୍ତୀ ସମୟରେ ସେଥିରେ ମଧ୍ୟ ସମସ୍ୟା ଦେଖାଦେଲା । ୨୦୨୧ରେ ପୁଣି ନିଗମ ପକ୍ଷରୁ ପୋଷ୍ଟାଲ ଆକାଉଣ୍ଟ ଖୋଲି କିଛି ଦିନ ଡାକ ଘର ସାହାଯ୍ୟରେ ଟଙ୍କା ପ୍ରଦାନ କରାଗଲା । ପୁଣି ତାହାକୁ ବନ୍ଦ କରାଗଲା ।
ବର୍ତ୍ତମାନ ପୁରୁଣା ଢାଞ୍ଚାରେ ନିଗମ କର୍ମଚାରୀ ଟଙ୍କା ପ୍ରଦାନ କରୁଥିବା ବେଳେ ତାଙ୍କ ସହ କିଛି ହିତାଧିକାରୀଙ୍କୁ ବ୍ୟାଙ୍କ୍ କର୍ମଚାରୀ ଟଙ୍କା ପ୍ରଦାନ କରୁଛନ୍ତି । ତଥାପି ଭତ୍ତା ଟଙ୍କା ପାଇବାରୁ ବଞ୍ଜିତ ହେଉଛନ୍ତି ହିତାଧିକାରୀ । ସେହିପରି କୌଣସି ନିର୍ଦ୍ଧିଷ୍ଟ ତାରିଖରେ ଟଙ୍କା ମିଳୁ ନଥିବାରୁ ହିତାଧିକାରୀ ପ୍ରତି ମାସରେ ହଇରାଣ ହେଉଛନ୍ତି । ନିଗମ କର୍ମଚାରୀ ମଧୁବାବୁ ପେନସନ ଯୋଜନାରେ ଟଙ୍କା ପ୍ରଦାନ କରୁଥିବା ବେଳେ ସମସ୍ତ ହିତାଧିକାରୀ ଠିକ ସମୟରେ ଭତ୍ତା ପାଉଛନ୍ତି । କିନ୍ତୁ ବ୍ୟାଙ୍କ୍ ଜାତୀୟ ବୟସ୍କ ଭତ୍ତା ଯୋଜନା(ଆଇଜିଏନଓପି) ରେ ପ୍ରଦାନ କରୁଥିବା ହିତାଧିକାରୀଙ୍କୁ ଠିକ ସମୟରେ ଟଙ୍କା ମିଳୁ ନାହିଁ । କିଛି ହିତାଧିକାରୀ ମାସ ମାସ ଧରି ଟଙ୍କା ପାଇଁ ବିଏମସିକୁ ଯାଇ ଫେରୁଛନ୍ତି । ବର୍ତ୍ତମାନ ବ୍ୟାଙ୍କ ଆକାଉଣ୍ଟକୁ ଦୁଇଟି ପ୍ରକ୍ରିୟାରେ ସରକାର ଟଙ୍କା ପଠାଉଛନ୍ତି ।
କେବେ ଆକାଉଣ୍ଟ ନମ୍ବର ଜରିଆରେ ପଠାଉଛନ୍ତି ତ କେବେ ଆଧାର ନମ୍ବର ଜରିଆରେ ଟଙ୍କା ପଠାଉଛନ୍ତି । ଫଳରେ ବିଭିନ୍ନ ସମୟରେ ଭିନ୍ନ ଭିନ୍ନ ଆକାଉଣ୍ଟକୁ ଟଙ୍କା ଯାଉଛି । ଯାହାି ହିତାଧିକାରୀ ଜାଣି ପାରୁ ନାହାନ୍ତି । ଶେଷ ଥର ଆଧାରକାର୍ଡ ଯେଉଁ ଆକାଉଣ୍ଟ ସହ ସଲଗ୍ନ ହୋଇଥାଏ, ଆଧାର ଜରିଆରେ ଟଙ୍କା ପଠାଇଲେ ସେହି ଆକାଉଣ୍ଟକୁ ଯାଉଛି । ଯାହାଦ୍ୱାରା ଭତ୍ତା ଟଙ୍କା ପାଇବାରେ ହିତାଧିକାରୀ ସମସ୍ୟାର ସମ୍ମୁଖୀନ ହେଉଥିବା ନିଗମ ଦାୟିତ୍ୱରେ ଥିବା ସାମାଜିକ ସୁରକ୍ଷା ଅଧିକାରୀ ମନୋଜ ପ୍ରଧାନ କହିଛନ୍ତି ।
ତିନି ମାସ ହେଲା ଭତ୍ତା ଟଙ୍କା ମିଳି ନାହିଁ । ୱାର୍ଡରେ ଟଙ୍କା ଦେଉଥିବା ସମୟରେ ଯାଇ ବାରମ୍ବାର ଫେରୁଛି । ପଚାରିଲେ ତୁମ ଆକାଉଣ୍ଟକୁ ଟଙ୍କା ଆସି ନାହିଁ ବୋଲି କର୍ମଚାରୀ କହୁଛନ୍ତି । ଦେହ ଅସୁସ୍ଥ ଥିବାରୁ ବିଏମସିକୁ ଯାଇ ପାରୁନି ।