ବଣାଇ,୧୮/୦୮: ସୁନୁବୁରୁ ରେଳ ଧାରଣାରେ ଅଘଟଣ । ରେଳ ଧାରଣାରେ କଟି ପ୍ରାଣ ହରାଇଲା ଛୁଆହାତୀ । ମୃତ ଦେହ ଜଗି ରହିଛନ୍ତି ମା’ ହାତୀ ସହ ହାତୀପଲ । ବରସୁଆଁ ରେଞ୍ଜ ଚୋରଧରା ସେକ୍ସନ ସୁନୁବୁରୁ ରେଳ ଧାରଣାରେ ଏଭଳି ଘଟଣା ଘଟିଛି ।

ସୂଚନା ଅନୁଯାୟୀ, ହାତୀଛୁଆଟି ସୁନୁବୁରୁ ରେଳ ଧାରଣା ପାଖରେ ଏଣେତେଣେ ବୁଲୁଥିଲା । ଏହି ସମୟରେ ସେ ରେଳ ଧାରଣା ଉପର ଦେଇ ଯାଇଥିଲା । ରେଳ ଧାରଣା ଅତିକ୍ରମ କରିବା ସମୟରେ ହଠାତ୍ ଏକ ଟ୍ରେନ୍ ଆସି ତାକୁ ଧକ୍କା ଦେଇଥିଲା । ଏହି ଦୁର୍ଘଟଣାରେ ହାତୀଛୁଆଟି ନିଜର ପ୍ରାଣ ହରାଇଲା । ଛୁଆହାତୀର ମର ଶରୀର ରେଳ ଧାରଣାରେ ପଡ଼ି ରହିଥିବାବେଳେ ତାର ମା’ ଏବଂ ଏକ ହାତୀପଲ ମୃତଦେହକୁ ଜଗି ରହିଛନ୍ତି । ଖବର ପାଇ ଘଟଣାସ୍ଥଳରେ ରକ୍ସି ରେଳ ସାଇଡ଼ିଂ ଅଧିକାରୀ ଓ ଜିଆରପି ପୋଲିସ ପହଞ୍ଚିଛନ୍ତି । ତେବେ ମୃତଦେହକୁ ହାତୀ ପଲ ଜଗିରହିଥିବାରୁ ପାଖକୁ ଯିବା କଷ୍ଟକର ହୋଇଛି ।