ସୁନ୍ଦରଗଡ଼,୨୯/୦୮: ଓଡ଼ିଆ ଖେଳାଳି। କୋଚ୍ କିନ୍ତୁ ଅଣ ଓଡ଼ିଆ । କୋଚ୍ଙ୍କ କଥା ବୁଝିପାରୁନାହାନ୍ତି ଖେଳାଳି କି ଖେଳାଳିଙ୍କ କଥା ବୁଝିପାରୁନାହାନ୍ତି କୋଚ୍ । ସବୁକିଛି ଚାଲିଛି ଠାରରେ । ହକିର ଅନ୍ତୁଡ଼ିଶାଳ ସୁନ୍ଦରଗଡ଼ ଜିଲ୍ଲା ରାଉରକେଲା କ୍ରାଡ଼ା ଛାତ୍ରାବାସରେ ଏଭଳି ଭାଷାଗତ ବୈଷମ୍ୟ କୋଚ୍ ଏବଂ ପ୍ରଶିକ୍ଷାର୍ଥୀଙ୍କ ମଧ୍ୟରେ ସୃଷ୍ଟି କରୁଛି ଦୂରତ୍ୱ । ଏଥିରେ ପ୍ରତିଭାବାନ୍ ହକି ଖେଳାଳିଙ୍କ ପ୍ରଶିକ୍ଷଣ ଗୁରୁତ୍ୱର ପ୍ରଭାବିତ ହେଉଥିବାବେଳେ ଜାତୀୟସ୍ତରରେ ଜିଲ୍ଲାର ହକି ଖେଳାଳିଙ୍କ ପ୍ରତିନିଧିତ୍ୱ ମଧ୍ୟ ବର୍ଷକୁ ବର୍ଷ ହ୍ରାସ ପାଉଛି । ସ୍ଥିତି ଏମିତି ହେଲାଣି ଯେ ସଂଖ୍ୟା ଏକ୍କୁ ଖସିଆସିଲାଣି । ଏଭଳି ସ୍ଥଳେ ସୁନ୍ଦରଗଡ଼ରେ ହକି କେମିତି ବଢ଼ିବ ତାହାକୁ ନେଇ ସୃଷ୍ଟି ହୋଇଛି ଅନେକ ପ୍ରଶ୍ନ । ଗୁରୁବାର ଦେଶ ହକି କିମ୍ବଦନ୍ତୀ ମେଜର ଧ୍ୟାନଚାନ୍ଦଙ୍କ ଜୟନ୍ତୀକୁ ଜାତୀୟ କ୍ରୀଡ଼ା ଦିବସ ଭାବେ ପାଳନ କରୁଥିବାବେଳେ ହକିଗଡ଼ର ଏଭଳି ସ୍ଥିତିକୁ ନେଇ ପୁରୁଖା ଖେଳାଳି କ୍ଷୋଭବ୍ୟକ୍ତ କରିଛନ୍ତି ।
ସୁନ୍ଦରଗଡ଼ ଜିଲ୍ଲାର ପ୍ରତିଭାବାନ୍ ଖେଳାଳି ଭାରତୀୟ ହକି ଦଳରେ ସ୍ଥାନ ପାଇବାକୁ ସଂଘର୍ଷ କରୁଛନ୍ତି । ଏକଦା ଭାରତୀୟ ହକି ଦଳରେ ଜିଲ୍ଲାରୁ ୩ରୁ ୪ ଜଣ ନିୟମିତ ସାମିଲ୍ ହେଉଥିଲେ । ଏବେ ଅମିତ ରୋହିଦାସ ଜଣେ ମାତ୍ର ରହିଛନ୍ତି । ଏଭଳି ସ୍ଥିତିରେ ସୁନ୍ଦରଗଡ଼ସ୍ଥିତ ହକି ଛାତ୍ରାବାସ ବନ୍ଦ ହୋଇଯାଇଛି । ସେଠାରୁ ରହୁଥିବା ୩୦ ଜଣ ଖେଳାଳିଙ୍କୁ ରାଉରକେଲାକୁ ସ୍ଥାନାନ୍ତର କରାଯାଇଛି । ଏବେ ଏଥିରେ ଯୋଡ଼ିହୋଇଛି ନୂଆ ସମସ୍ୟା । ଏଠାରେ ପୁରୁଷ ଏବଂ ମହିଳା ହକି ଖେଳାଳିଙ୍କୁ ପ୍ରଶିକ୍ଷଣ ଦେବାକୁ ୪ଜଣ କୋଚ୍ ନିଯୁକ୍ତ ହୋଇଛନ୍ତି । ସମସ୍ତେ ରାଜସ୍ଥାନ ଏବଂ ହରିୟାଣାର । ସେମାନେ ପ୍ରଶିକ୍ଷଣ ବେଳେ ଇଂଲିଶ ଭାଷା ବ୍ୟବହାର କରୁଛନ୍ତି । ବିଦେଶୀ ଭାଷାରେ ଟେକ୍ନିକ୍ ବୁଝାଉଛନ୍ତି । ଯାହାକୁ ବୁଝିପାରୁନାହାନ୍ତି ଖେଳାଳି । ଏହା ପ୍ରଶିକ୍ଷଣ ପ୍ରକ୍ରିୟା ଏବଂ ଦକ୍ଷତା ଉଭୟକୁ ପ୍ରଭାବିତ କରୁଛି ।
ସୂଚନାଯୋଗ୍ୟ, ୨୦୦୪ରେ ସୁନ୍ଦରଗଡ଼ ଓ ରାଉରକେଲାଠାରେ ଦୁଇଟି ହକି ଛାତ୍ରାବାସ ପ୍ରତିଷ୍ଠା କରାଯାଇଥିଲା । ସୁନ୍ଦରଗଡ଼ ହକି ଛାତ୍ରାବାସରେ ୧୫ ବାଳିକା ଓ ୩୦ ବାଳକ ରହିବା ବ୍ୟବସ୍ଥା କରାଯାଇଥିଲା । ରାଉରକେଲାରେ ଉଭୟ ବାଳକ ଏବଂ ବାଳିକାଙ୍କୁ ମିଶାଇ ୧୪୫ ଜଣ ରହୁଥିଲେ । ୨୦୨୧ରେ ସୁନ୍ଦରଗଡ଼ ଛାତ୍ରାବାସରୁ ସମସ୍ତ ବାଳକ କ୍ରୀଡ଼ାବିତ୍ଙ୍କୁ ରାଉରକେଲାକୁ ସ୍ଥାନାନ୍ତର କରାଯାଇଛି । ଏବେ ରାଉରକେଲାରେ ୧୭୫ ଜଣ ପ୍ରଶିକ୍ଷାର୍ଥୀ ରହୁଛନ୍ତି । ଦୁଇ ଛାତ୍ରାବାସର ଅଧିକାରୀମାନେ ଗ୍ରାମାଞ୍ଚଳକୁ ଯାଇ ଖେଳାଳି ଚୟନ କରି ଛାତ୍ରାବାସକୁ ଆଣିଥାନ୍ତି । ସେମାନଙ୍କୁ ପାଠ ପଢ଼ାଇବା ସହ ପ୍ରଶିକ୍ଷଣ ଦେଇ ଆସୁଥିଲେ । ପ୍ରତିବର୍ଷ ରାଜ୍ୟ ଓ ଦିଲ୍ଲୀରେ ଆୟୋଜିତ ସବ୍-ଜୁନିୟର ନେହରୁ କପ୍ ହକି ପ୍ରତିଯୋଗିତାରେ ଏଠାକାର ପ୍ରଶିକ୍ଷାର୍ଥୀମାନେ ଭାଗ ନେଇ ଚମତ୍କାର ପ୍ରଦର୍ଶନ କରୁଥିଲେ ।
ସୁନ୍ଦରଗଡ଼ ଛାତ୍ରାବାସର ଜୁନିୟର ଦଳ ଲଗାତର ୩ବର୍ଷ ଧରି ନେହରୁ କପ୍ ଚାମ୍ପିଅନ୍ ହୋଇ ରାଜ୍ୟକୁ ଗର୍ବିତ କରିଥିଲା । ନେହରୁ କପ୍ ଖେଳି ସୁନ୍ଦରଗଡ଼ ଛାତ୍ରାବାସର ଆନନ୍ଦ ଲାକ୍ରା, ସାହିଲ ନାଏକ, ବେକ୍ ସୋଲଯୋର ହରୋ ପ୍ରମୁଖ ଜାତୀୟ ଜୁନିଅର ଦଳରେ ସ୍ଥାନ ପାଇଥିଲେ । କରୋନା ପରେ ନେହରୁ କପ୍ ବନ୍ଦ ହୋଇଯାଇଛି । ଫଳରେ ସୁନ୍ଦରଗଡ଼ ଖେଳାଳି ଜାତୀୟ ଚୟନକର୍ତ୍ତାଙ୍କ ଦୃଷ୍ଟି ଆକର୍ଷଣ କରିବାରେ ସଫଳ ହୋଇପାରୁନାହାନ୍ତି । ରାଉରକେଲାରେ ସବ୍-ଜୁନିଅର ବର୍ଗର ଖେଳାଳି ଏକାଠି ରହୁଛନ୍ତି । ସେମାନଙ୍କ ମଧ୍ୟରେ ପ୍ରତିଯୋଗିତାମୂଳକ ଖେଳ ଭାବନା ଜାଗ୍ରତ ହେଉନି । ତେଣୁ ଜାତୀୟ ଦଳରେ ସ୍ଥାନ ପାଇବା ଭଳି ଦକ୍ଷତା ଥିବା ଖେଳାଳି ସୃଷ୍ଟି ହେଉନାହାନ୍ତି । ଅନ୍ୟପକ୍ଷରେ ଟାଟାରେ ଟାଟା କମ୍ପାନି ନୋଡାଲ ହକି ଏକାଡେମୀ ପ୍ରତିଷ୍ଠା କରି ସୁନ୍ଦରଗଡ଼ ହକି ଛାତ୍ରାବାସରୁ ବଛା ବଛା ଖେଳାଳିଙ୍କୁ ନେଉଛି । ସେଠାରେ ତାଲିମ ଦେଇ ଟାଟା ନାମରେ ନେହରୁ କପ୍ ପ୍ରତିଯୋଗିତାକୁ ପଠାଉଛି । ସୁନ୍ଦରଗଡ଼ର ଖେଳାଳି ଟାଟା ଦଳରେ ସ୍ଥାନ ପାଇ ମୈଦାନକୁ ଓହ୍ଲାଉଛନ୍ତି ।
ଏସବୁ ସମସ୍ୟା ଭିତରେ ଏବେ ଯାହା ମୁଖ୍ୟ ପ୍ରତିବନ୍ଧକ ସାଜିଛି³ ତାହା ହେଉଛି କୋଚ୍ଙ୍କ ଭାଷା । ରାଉରକେଲା ଛାତ୍ରାବାସରେ ପ୍ରଶିକ୍ଷଣ ପାଇଁ ରାଜସ୍ଥାନ ଏବଂ ହରିୟାଣାର ୪ଜଣ କୋଚ୍ଙ୍କୁ ନିଯୁକ୍ତି ଦିଆଯାଇଛି । ଅଣ ଓଡ଼ିଆ କୋଚ୍ମାନେ ମୁଖ୍ୟତଃ ଇଂଲିଶ ଭାଷାରେ କଥା ହେଉଛନ୍ତି । ଏହାକୁ ସ୍ଥାନୀୟ ଖେଳାଳି ବୁଝି ପାରୁନାହାନ୍ତି । ସେମାନେ ଯେଉଁ କୌଶଳ ବିଷୟରେ ଶିଖାଉଛନ୍ତି, ତାହାକୁ ଧରିପାରୁନାହାନ୍ତି । କୋଚ୍ ଓ ଖେଳାଳିଙ୍କ ମଧ୍ୟରେ ସମନ୍ୱୟ ରହିପାରୁନି । ସରକାର ଯେତେ ଟଙ୍କା ଖର୍ଚ୍ଚ କଲେ ବି ମୂଳ ସମସ୍ୟାକୁ ସମଧାନ କରା ନ ଗଲେ ଜିଲ୍ଲାରୁ ହକି ମରିଯିବ ବୋଲି ଜଣେ ପୂର୍ବତନ କୋଚ୍ ନାମ ଗୋପନ ରଖି କହିଛନ୍ତି । ନିକଟରେ ରାଉରକେଲା ହକି ଛାତ୍ରାବାସକୁ ରଘୁନାଥପାଲ୍ଲି ବିଧାୟକ ଦୁର୍ଗାଚରଣ ତନ୍ତୀ ପରିଦର୍ଶନରେ ଯାଇଥିବାବେଳେ ପ୍ରଶିକ୍ଷାର୍ଥୀମାନେ ସେମାନଙ୍କ ଅସୁବିଧା କହିଥିଲେ । ତାଲିମରେ ହେଉଥିବା ସମସ୍ୟା, ପୁଷ୍ଟିକର ଖାଦ୍ୟ ଦିଆଯାଉ ନ ଥିବା ଅଭିଯୋଗ କରିଥିଲେ । ଏହାକୁ ନେଇ ବିଧାୟକ କ୍ଷୋଭ ବ୍ୟକ୍ତ କରିବା ସହ ଖୁବ୍ଶୀଘ୍ର ସମସ୍ୟାର ସମାଧାନ କରାଯିବ ବୋଲି କହିଥିଲେ ।
ଏ ସମ୍ପର୍କରେ ରାଉରକେଲା ହକି ଛାତ୍ରାବାସର ଡେପୁଟି ଡାଇରେକ୍ଟର ସୁଦୀପ୍ତ ନାଏକ କୁହନ୍ତି, ରାଉରକେଲା ହକି ଛାତ୍ରାବାସରେ ନିଯୁକ୍ତି ପାଇଥିବା କୋଚ୍ ହରିୟାଣା ଓ ରାଜସ୍ଥାନର । ସେମାନେ ଇଂଲିଶରେ କଥାବାର୍ତ୍ତା ହେଉଛନ୍ତି । ଖେଳାଳି ଏବଂ କୋଚ୍ଙ୍କ ମଧ୍ୟରେ ସମନ୍ୱୟ ରଖିବାକୁ ଆଞ୍ଚଳିକ କୋଚ୍ ରହୁଛନ୍ତି । ହେଲେ ପ୍ରଶିକ୍ଷଣ ପ୍ରଭାବୀ ହୋଇପାରୁନାହିଁ ବୋଲି ସେ ସ୍ୱୀକାର କରିଛନ୍ତି ।