ନୂଆଦିଲ୍ଲୀ,୦୬/୦୪:ପାକିସ୍ତାନରେ ଶାନ୍ତି ସମିତିର ସଦସ୍ୟଙ୍କ ଆବାସ ଉପରେ ଆତ୍ମଘାତୀ ଆକ୍ରମଣ। ଫଳରେ ୫ ଜଣଙ୍କର ମୃତ୍ୟୁ ହୋଇଛି । ଏହି ଘଟଣାଟି ଉତ୍ତର ୱାଜିରିସ୍ତାନ ଜିଲ୍ଲାର ମିର ଅଲି ତହସିଲରେ ଘଟିଛି। ଯେଉଁଠାରେ ଆତଙ୍କବାଦୀମାନେ କାଦିର ଜମାନଙ୍କ ଘରକୁ ଟାର୍ଗେଟ କରିଥିଲେ।
ତେବେ ଶନିବାର ଦିନ ପାକିସ୍ତାନର ଅଶାନ୍ତ ଖାଇବର ପଖତୁନଖ୍ୱା ପ୍ରଦେଶରେ ନିଷିଦ୍ଧ ତେହେରିକ୍-ଏ-ତାଲିବାନ ପାକିସ୍ତାନ (ଟିଟିପି) ସହିତ ଜଡିତ ଆତଙ୍କବାଦୀମାନେ ଜଣେ ଶାନ୍ତି କମିଟି ସଦସ୍ୟଙ୍କ ବାସଭବନ ଉପରେ ଆକ୍ରମଣ କରିଥିବା ଜଣାପଡ଼ିଛି। ଫଳରେ ପରିବାରର ପାଞ୍ଚ ଜଣଙ୍କ ମୃତ୍ୟୁ ହୋଇଛି । ମୃତ୍ୟୁବରଣ କରିଥିବା ପାଞ୍ଚ ଜଣଙ୍କ ମଧ୍ୟରେ ଜଣେ ମହିଳା ଥିଲେ, ଆକ୍ରମଣ ସମୟରେ ଅନେକ ଲୋକ ଆହତ ହୋଇଥିଲେ। ଟିଟିପି ବିବୃତ୍ତି ଅନୁଯାୟୀ, ଶରିଆ ଲାଗୁ କରିବା ପାଇଁ ଏହି ଆକ୍ରମଣ କରାଯାଇଥିଲା।
ପ୍ରକାଶ ଥାଉକି, ଏହି ଆକ୍ରମଣ ଟିଟିପି ଏକ ବିବୃତ୍ତି ଜାରି କରିବାର ଗୋଟିଏ ଦିନ ପରେ ଘଟିଛି। ଯେଉଁଥିରେ କୁହାଯାଇଥିଲା ଯେ ଏହାର ଇସ୍ରାଏଲ,ଆମେରିକା କିମ୍ବା ଭାରତ ସହିତ କୌଣସି ଶତ୍ରୁତା ନାହିଁ। ଆତଙ୍କବାଦୀ ସଂଗଠନ ପୁନରାବୃତ୍ତି କରିଛି ଯେ ଏହାର ଏକମାତ୍ର ଶତ୍ରୁ ହେଉଛି ପାକିସ୍ତାନ। ଗତ ମାସ ପ୍ରାରମ୍ଭରେ, ଖାଇବର ପଖତୁନଖ୍ୱା ପ୍ରଦେଶରେ ଏକ ପାକିସ୍ତାନୀ ସେନା ଶିବିର ଉପରେ ଏକ ଆତ୍ମଘାତୀ ଆକ୍ରମଣ ହୋଇଥିଲା। ଏହି ଆକ୍ରମଣରେ ଅନେକ ଲୋକ ପ୍ରାଣ ହରାଇଥିଲେ। ଏଥିରେ ଜଣେ ଆତ୍ମଘାତୀ ଆକ୍ରମଣକାରୀ ପାକିସ୍ତାନୀ ସେନା ଘାଟିରେ ପ୍ରବେଶ କରି ନିଜକୁ ବିସ୍ଫୋରଣ କରିଦେଇଥିଲେ। ଏହି ଆକ୍ରମଣ ପାକିସ୍ତାନର ଖାଇବର ପଖତୁନଖ୍ୱା ପ୍ରଦେଶର ଟାଙ୍କ ଜିଲ୍ଲାର ଜାଣ୍ଡୋଲା ସାମରିକ ଶିବିର ଉପରେ ହୋଇଥିଲା। ଏହି ଆକ୍ରମଣ ପଛରେ ଆଫଗାନ-ପାକିସ୍ତାନ ସୀମାରେ ସକ୍ରିୟ ଆତଙ୍କବାଦୀ ଗୋଷ୍ଠୀ ତେହେରିକ-ଏ-ତାଲିବାନ ପାକିସ୍ତାନର ହାତ ଥିବା ଜଣାପଡ଼ିଥିଲା।
