ନୂଆଦିଲ୍ଲୀ: ପାକିସ୍ତାନର ସିନ୍ଧ ପ୍ରଦେଶରେ ନୂତନ କେନାଲ ଯୋଜନା ବିରୋଧରେ ପ୍ରତିବାଦ କରୁଥିବା ପ୍ରଦର୍ଶନକାରୀମାନେ ଜଣେ ହିନ୍ଦୁ ରାଷ୍ଟ୍ରମନ୍ତ୍ରୀଙ୍କୁ ଆକ୍ରମଣ କରିଛନ୍ତି। ପାକିସ୍ତାନ ମୁସଲିମ ଲିଗ୍-ନୱାଜ୍ ସାଂସଦ ଏବଂ ଧାର୍ମିକ ବ୍ୟାପାର ରାଷ୍ଟ୍ରମନ୍ତ୍ରୀ ଖିଲ ଦାସ କୋହିସ୍ତାନୀ ଶନିବାର (୧୯ ଏପ୍ରିଲ୍, ୨୦୨୫) ଥାଟ୍ଟା ଜିଲ୍ଲା ଦେଇ ଯାଉଥିବା ସମୟରେ ପ୍ରଦର୍ଶନକାରୀମାନେ ତାଙ୍କ କାରକେଡ୍ ଉପରେ ଟମାଟୋ ଏବଂ ଆଳୁ ଫିଙ୍ଗିଥିଲେ । ଅଧିକାରୀମାନେ କହିଛନ୍ତି ଯେ, ଆକ୍ରମଣରେ କୋହିସ୍ତାନୀଙ୍କର କୌଣସି କ୍ଷତି ହୋଇନାହିଁ। ରେଡିଓ ପାକିସ୍ତାନ ରିପୋର୍ଟ କରିଛି ଯେ, ପ୍ରଧାନମନ୍ତ୍ରୀ ଶେହବାଜ ଶରିଫ କୋହିସ୍ତାନୀଙ୍କୁ ଫୋନ୍ କରି ଘଟଣାର ପୁଙ୍ଖାନୁପୁଙ୍ଖ ତଦନ୍ତ ପାଇଁ ପ୍ରତିଶ୍ରୁତି ଦେଇଛନ୍ତି । 

 ପ୍ରଧାନମନ୍ତ୍ରୀ କହିଛନ୍ତି, ‘ଜନ ପ୍ରତିନିଧିଙ୍କ ଉପରେ ଆକ୍ରମଣ ଗ୍ରହଣୀୟ ନୁହେଁ। ଘଟଣାରେ ସମ୍ପୃକ୍ତ ଲୋକଙ୍କୁ କଠୋର ଦଣ୍ଡ ଦିଆଯିବ।’ ସୂଚନା ମନ୍ତ୍ରୀ ଆତା ତାରାର ସିନ୍ଧ ପୋଲିସ ମହାନିରୀକ୍ଷକ (ଆଇଜିପି) ଗୁଲାମ ନବୀ ମେମନଙ୍କଠାରୁ ଘଟଣାର ବିବରଣୀ ଏବଂ ସଂଘୀୟ ଗୃହ ସଚିବଙ୍କଠାରୁ ଏକ ରିପୋର୍ଟ ମାଗିଛନ୍ତି। ସିନ୍ଧ ମୁଖ୍ୟମନ୍ତ୍ରୀ ସୟଦ ମୁରାଦ ଅଲ୍ଲୀ ଶାହ ମଧ୍ୟ ଏହି ଘଟଣାର କଡ଼ା ନିନ୍ଦା କରିଛନ୍ତି । 

 ନ୍ୟାସନାଲ ଆସେମ୍ବଲି ୱେବସାଇଟରେ ଉପଲବ୍ଧ ତାଙ୍କର ବ୍ୟକ୍ତିଗତ ବିବରଣୀ ଅନୁଯାୟୀ, କୋହିସ୍ତାନୀ ସିନ୍ଧର ଜାମଶୋରୋ ଜିଲ୍ଲାର ବାସିନ୍ଦା ଏବଂ ୨୦୧୮ରେ PML-N ରୁ ପ୍ରଥମ ଥର ପାଇଁ ସଂସଦକୁ ନିର୍ବାଚିତ ହୋଇଥିଲେ। ତାଙ୍କର ପାଞ୍ଚ ବର୍ଷର କାର୍ଯ୍ୟକାଳ ସମାପ୍ତ କରିବା ପରେ ସେ ୨୦୨୪ ରେ ପୁନଃ ନିର୍ବାଚିତ ହୋଇଥିଲେ ଏବଂ ତାଙ୍କୁ ରାଷ୍ଟ୍ରମନ୍ତ୍ରୀ କରାଯାଇଥିଲା।

 ପାକିସ୍ତାନ ସେନା ମୁଖ୍ୟ ଅସୀମ ମୁନିର କିଛି ଦିନ ପୂର୍ବରୁ ଏକ ଉତ୍ତେଜନାମୂଳକ ବୟାନ ଦେଇ କହିଥିଲେ ଯେ, ମୁସଲମାନମାନେ ହିନ୍ଦୁଙ୍କଠାରୁ ଭିନ୍ନ । ପ୍ରବାସୀ ପାକିସ୍ତାନ ସମ୍ମିଳନୀରେ ମୁନିର କହିଥିଲେ, ଆମକୁ ଏହି କାହାଣୀ ଭବିଷ୍ୟତ ପିଢ଼ିକୁ କହିବାକୁ ପଡିବ । ଆମେ ଧର୍ମ, ରୀତି, ପରମ୍ପରା, ଚିନ୍ତାଧାରା ଏବଂ ମହତ୍ତ୍ୱାକାଂକ୍ଷାରେ ହିନ୍ଦୁମାନଙ୍କଠାରୁ ଭିନ୍ନ ।