ନୂଆଦିଲ୍ଲୀ: ଆମେରିକାର ପ୍ରମୁଖ ବିମାନବନ୍ଦର ଗୁଡ଼ିକର ସୁରକ୍ଷା ଏବେ ପ୍ରଶ୍ନ ଘେରରେ । ବିମାନବନ୍ଦରରୁ ବିମାନ ଉଡ଼ାଣ କିମ୍ବା ଅବତରଣ ପାଇଁ ଡ୍ରୋନ ଏକ ଗମ୍ଭୀର ବିପଦ ପାଲଟିଛି। ଗତ ବର୍ଷ ଡ୍ରୋନ ସହିତ ଜଡିତ ଯେଉଁ ପରିସଂଖ୍ୟାନ ସାମ୍ନାକୁ ଆସିଥିଲା, ତାହା ଆଶ୍ଚର୍ଯ୍ୟଜନକ। ତଥ୍ୟ ଅନୁଯାୟୀ, ଡ୍ରୋନର ପାଖାପାଖି ଦୁଇ-ତୃତୀୟାଂଶ ନିକଟରୁ ଧକ୍କା ହେବା ନିଶ୍ଚିତ ହୋଇଥିଲା। ଏହି ସଂଖ୍ୟା ୨୦୨୦ ମସିହା ପରେ ସର୍ବାଧିକ। ଆସୋସିଏଟେଡ୍ ପ୍ରେସ ପକ୍ଷରୁ କରାଯାଇଥିବା ଅନୁସନ୍ଧାନରୁ ଏହି ସୂଚନା ସାମ୍ନାକୁ ଆସିଛି । 

ରିପୋର୍ଟ ଅନୁସାରେ, ନଭେମ୍ବର ମାସରେ ସାନ ଫ୍ରାନ୍ସିସ୍କୋ ଅନ୍ତର୍ଜାତୀୟ ବିମାନବନ୍ଦରରେ ଏକ ଯାତ୍ରୀବାହୀ ବିମାନ ଠାରୁ ମାତ୍ର ୩ ଶହ ଫୁଟ ଦୂରରେ ଏକ ଡ୍ରୋନ୍ ଦେଖାଯାଇଥିଲା। ଅକ୍ଟୋବରରେ ମିଆମିରେ ଏବଂ ଅଗଷ୍ଟରେ ନ୍ୟୁଆର୍କ ବିମାନବନ୍ଦର ନିକଟରେ ସମାନ ଘଟଣା ଘଟିଥିଲା। ଗତ ଦଶନ୍ଧିରେ ନିକଟରୁ ଘଟିଥିବା ୨୪୦ଟି ଦୁର୍ଘଟଣା ମଧ୍ୟରୁ ୧୨୨ଟି ଡ୍ରୋନ ସହିତ ଜଡିତ ଥିଲା।

ବିଶେଷଜ୍ଞ ମାନେ କହିଛନ୍ତି ଯେ ବିମାନବନ୍ଦର ନିକଟରେ ଏପରି ଘଟଣା ଭୟଙ୍କର ହୋଇପାରେ। ଫେଡେରାଲ୍ ଏଭିଏସନ୍ ଆଡମିନିଷ୍ଟ୍ରେସନ୍ (FAA) ଏପରି ବିପଦକୁ ହ୍ରାସ କରିବା ପାଇଁ ଅନେକ ପଦକ୍ଷେପ ନେଇଛି। ୨୫୦ ଗ୍ରାମରୁ ଅଧିକ ଓଜନର ଡ୍ରୋନ ପାଇଁ ପଞ୍ଜୀକରଣ ଏବଂ ରେଡିଓ ଟ୍ରାନ୍ସପଣ୍ଡରକୁ ବାଧ୍ୟତାମୂଳକ କରାଯାଇଛି। ଏହା ସହିତ, ବିମାନବନ୍ଦର ନିକଟରେ ଡ୍ରୋନ୍ ଉଡ଼ାଣ ଉପରେ ପ୍ରତିବନ୍ଧକ ଅଛି । 

ବିମାନବନ୍ଦର ନିକଟରେ ଡ୍ରୋନ ଗୁଡ଼ିକୁ ଚିହ୍ନଟ ଏବଂ ଅକ୍ଷମ କରିବା ପାଇଁ FAA ଜାମିଂ, ମାଇକ୍ରୋୱେଭ୍ ଏବଂ ଲେଜର ଟେକ୍ନୋଲୋଜି ପରୀକ୍ଷଣ କରୁଛି। ଡ୍ରୋନ୍ ସମ୍ବନ୍ଧୀୟ ଘଟଣାରେ ବୋଷ୍ଟନରେ ଦୁଇ ଜଣଙ୍କୁ ସମ୍ପ୍ରତି ଗିରଫ କରାଯାଇଥିଲା। କାଲିଫର୍ନିଆରେ ଏକ ବିମାନ ସହିତ ଏକ ଡ୍ରୋନ୍ ଧକ୍କା ହେବା ପରେ ଅପରେଟରଙ୍କୁ ଦାୟୀ କରାଯାଇଛି। ଏନେଇ ବିଶେଷଜ୍ଞ ମାନେ କହିଛନ୍ତି ଯେ,ଏପରି କଠୋର କାର୍ଯ୍ୟାନୁଷ୍ଠାନ ଭବିଷ୍ୟତରେ ଡ୍ରୋନ ଦ୍ୱାରା ସୃଷ୍ଟି ହେଉଥିବା ବିପଦକୁ ହ୍ରାସ କରିପାରିବ।