ନୂଆଦିଲ୍ଲୀ: ଆସାମର ଭାରତୀୟ ଜନତା ପାର୍ଟି ସରକାର ବିଜ୍ଞାପନ ପାଇଁ ଅତ୍ୟଧିକ ଅର୍ଥ ଖର୍ଚ୍ଚ କରିଥିବା ନେଇ ତଥ୍ୟ ସାମ୍ନାକୁ ଆସିଛି । ଏନେଇ ରାଜ୍ୟ ସୂଚନା ଏବଂ ଲୋକସମ୍ପର୍କ ମନ୍ତ୍ରୀ ପୀୟୂଷ ହଜାରିକା ବୁଧବାର ବିଧାନସଭାରେ ତଥ୍ୟ ଦେଇଛନ୍ତି । ସେ କହିଛନ୍ତି ଯେ, ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମାଙ୍କ ସରକାର ଗତ ଚାରି ଆର୍ଥିକ ବର୍ଷରେ ବିଜ୍ଞାପନ ପାଇଁ ୩୭୦ କୋଟି ଟଙ୍କାରୁ ଅଧିକ ଖର୍ଚ୍ଚ କରିଛନ୍ତି । ହଜାରିକା କହିଛନ୍ତି ଯେ, ୨୦୧୬ ରୁ ୨୦୨୧ ପର୍ଯ୍ୟନ୍ତ ଆସାମର ମୁଖ୍ୟମନ୍ତ୍ରୀ ଥିବା ସର୍ବାନନ୍ଦ ସୋନୱାଲଙ୍କ ନେତୃତ୍ୱାଧୀନ ସରକାର ୫ ବର୍ଷରେ ବିଜ୍ଞାପନ ପାଇଁ ୧୨୫.୬ କୋଟି ଟଙ୍କା ଖର୍ଚ୍ଚ କରିଥିଲେ ।
କଂଗ୍ରେସ ବିଧାୟକ ଅବଦୁଲ ବାଟିନ ଖଣ୍ଡକରଙ୍କ ଦ୍ୱାରା ପଚରାଯାଇଥିବା ଏକ ପ୍ରଶ୍ନର ଲିଖିତ ଉତ୍ତରରେ ହଜାରିକା କହିଛନ୍ତି ଯେ, ବର୍ତ୍ତମାନର ଭାରତୀୟ ଜନତା ପାର୍ଟି ସରକାର ପ୍ରିଣ୍ଟ, ଇଲେକ୍ଟ୍ରୋନିକ୍ ଏବଂ ଅନ୍ୟ ଗଣମାଧ୍ୟମରେ ବିଜ୍ଞାପନ ପାଇଁ ମୋଟ ୩୭୨.୩୩ କୋଟି ଟଙ୍କା ଖର୍ଚ୍ଚ କରିଛନ୍ତି । ହିମନ୍ତ ବିଶ୍ୱ ଶର୍ମା ୨୦୨୧ ମେ’ ମାସରେ ଆସାମ ମୁଖ୍ୟମନ୍ତ୍ରୀ ଭାବରେ ଦାୟିତ୍ୱ ଗ୍ରହଣ କରିଥିଲେ । ବିଜେପିର ଉଭୟ କାର୍ଯ୍ୟକାଳ ପାଇଁ ବର୍ଷୱାରୀ ତଥ୍ୟ ଦର୍ଶାଉଛି ଯେ ୨୦୨୦-୨୧ ରେ ସୋନୱାଲ ସରକାର ୩୦.୨୪ କୋଟି ଟଙ୍କା ଖର୍ଚ୍ଚ କରିଥିଲେ । ରାଜ୍ୟରେ ଏନଡିଏ ସରକାରଙ୍କ ଦ୍ୱିତୀୟ କାର୍ଯ୍ୟକାଳରେ ହମନ୍ତ ବିଶ୍ବ ଶର୍ମା ଦାୟିତ୍ୱ ନେବା ପରେ ଗୋଟିଏ ବର୍ଷରେ ବିଜ୍ଞାପନ ଲାଗି ୭୨.୮୩ କୋଟି ଟଙ୍କା ଖର୍ଚ୍ଚ ହୋଇଥିଲା ।
ମନ୍ତ୍ରୀଙ୍କ ଲିଖିତ ଉତ୍ତର ଅନୁସାରେ, ଶର୍ମା ସରକାର ପ୍ରତିବର୍ଷ ବିଜ୍ଞାପନ ଖର୍ଚ୍ଚ ବୃଦ୍ଧି କରିଚାଲିଥିଲେ । ପରବର୍ତ୍ତୀ ବର୍ଷ ୨୦୨୨-୨୩ ରେ ଖର୍ଚ୍ଚ ବୃଦ୍ଧି ପାଇ ୭୮.୮୫ କୋଟି ଟଙ୍କା ହୋଇଥିଲା । ୨୦୨୩-୨୪ ରେ ଏହି ଅର୍ଥ ବୃଦ୍ଧି ପାଇ ୧୬୦.୯୨ କୋଟି ଟଙ୍କାରେ ପହଞ୍ଚିଥିଲା । ୨୦୨୪-୨୫ ଆର୍ଥିକ ବର୍ଷରେ ଏପର୍ଯ୍ୟନ୍ତ ସରକାର ବିଭିନ୍ନ ପ୍ରକାରର ବିଜ୍ଞାପନ ପାଇଁ ୫୯.୭୨ କୋଟି ଟଙ୍କା ଖର୍ଚ୍ଚ କରିଛନ୍ତି ।
ସ୍ୱାଧୀନ ବିଧାୟକ ଅଖିଳ ଗୋଗୋଇଙ୍କ ପ୍ରଶ୍ନର ଉତ୍ତର ଦେଇ ମନ୍ତ୍ରୀ ହଜାରିକା କହିଛନ୍ତି ଯେ, ଆସାମ ସରକାର ପୂର୍ବତନ ମୁଖ୍ୟମନ୍ତ୍ରୀ ତରୁଣ ଗୋଗୋଇଙ୍କ କାର୍ଯ୍ୟକାଳର ଶେଷ ଆର୍ଥିକ ବର୍ଷ ୨୦୧୫-୧୬ରେ ବିଜ୍ଞାପନ ପାଇଁ ୧୮.୫୮ କୋଟି ଟଙ୍କା ଖର୍ଚ୍ଚ କରିଥିଲେ । ଏହା ପରେ ବିଜେପି କ୍ଷମତାକୁ ଆସିଥିଲା ଏବଂ ସର୍ବାନନ୍ଦ ସୋନୱାଲ ରାଜ୍ୟର ମୁଖ୍ୟମନ୍ତ୍ରୀ ହୋଇଥିଲେ ।
