ପୁରୀ, ୧୭।୯ :  ଶ୍ରୀମନ୍ଦିର ରତ୍ନଭଣ୍ଡାରର ପ୍ରାରମ୍ଭିକ ଯାଞ୍ଚ ୧୮ ତାରିଖ ତଥା ବୁଧବାର    କରିବ ଏଏସଆଇ। ରତ୍ନଭଣ୍ଡାରରେ ସୁଡ଼ଙ୍ଗ ଅଛି କି ନାହିଁ ସେନେଇ ଅନୁଧ୍ୟାନ କରିବ । ଅତ୍ୟାଧୁନିକ ଜ୍ଞାନକୌଶଳ ପ୍ରୟୋଗ କରାଯାଇ ଏବଂ ସରକାରଙ୍କ ଏସଓପି ଅନୁଯାୟୀ ଶ୍ରୀମନ୍ଦିର ରତ୍ନଭଣ୍ଡାରର ଯାଞ୍ଚ କରାଯିବ। ଏହି ଯାଞ୍ଚ ପ୍ରକ୍ରିୟା ଶେଷ ହେବା ପରେ ରତ୍ନଭଣ୍ଡାରର ମରାମତି କାର୍ଯ୍ୟ କରାଯିବ ବୋଲି ଜିଲ୍ଲାପାଳ କହିଛନ୍ତି। 

ଏଏସଆଇ ରତ୍ନଭଣ୍ଡାରର ସମ୍ପୂର୍ଣ୍ଣ ଯାଞ୍ଚ  ଆସନ୍ତା କାଲି କରିବ। ରତ୍ନଭଣ୍ଡାରର ଭୂମି ତଳେ ସୁଡ଼ଙ୍ଗ ଅଛି କି ନାହିଁ ତାହାର ସନ୍ଧାନ ପାଇଁ ଜିପିଆର ସର୍ଭେ କରିବ । ଏଥିସହିତ ରତ୍ନଭଣ୍ଡାରର କାନ୍ଥ ଗୁଡ଼ିକର ଲେଜର ସ୍କାନିଂ କରାଯାଇ କାନ୍ଥର ଅପରପାର୍ଶ୍ବରେ କିଛି କୋଠରୀ ଅଛି କି ନାହିଁ ତାହାର ମଧ୍ୟ ସନ୍ଧାନ କରାଯିବ। ତେବେ ବୁଧବାର ଅପରାହ୍ନ ଗୋଟାଏରୁ ରତ୍ନଭଣ୍ଡାରରେ ଏଏସଆଇ ଅଧିକାରୀ ପ୍ରବେଶ କରି ସମସ୍ତ ଦିଗକୁ ଯାଞ୍ଚ କରିବେ। 

 ସୂଚନାଯୋଗ୍ୟ ଯେ,  ଶ୍ରୀମନ୍ଦିର ରତ୍ନଭଣ୍ଡାର ଖୋଲିବା ନେଇ ଏକ କମିଟି ଗଠନ ହୋଇଥିଲା। ଜଷ୍ଟିସ ବିଶ୍ୱନାଥ ରଥଙ୍କ ଅଧକ୍ଷତାରେ ରତ୍ନଭଣ୍ଡାର ତଦାରଖ କମିଟି ଗଠନ କରାଯାଇଥିଲା। ଗତ ଜୁଲାଇ ୧୪ ତାରିଖରେ ପ୍ରଥମେ ବାହାର ରତ୍ନଭଣ୍ଡାର ଓ ୧୮ ତାରିଖରେ ଭିତର ରତ୍ନଭଣ୍ଡାର ଖୋଲାଯାଇ ସମସ୍ତ ରତ୍ନ ଅଳଙ୍କାରକୁ ଶ୍ରୀମନ୍ଦିର ଭିତରେ ଥିବା ଖଟଶେଜ ଗୃହ ଏବଂ ଚାଙ୍ଗଡ଼ା ଗୃହକୁ ସ୍ଥାନାନ୍ତର କରାଯାଇ କଡ଼ା ନିରାପତ୍ତା ବ୍ୟବସ୍ଥା ମଧ୍ୟରେ ରଖାଯାଇଛି। ତେବେ ପ୍ରଥମେ ରତ୍ନଭଣ୍ଡାରର ଯାଞ୍ଚ କାର୍ଯ୍ୟ ଶେଷ ହେବା ପରେ ରତ୍ନଭଣ୍ଡାରର ମରାମତି କାର୍ଯ୍ୟ ଆରମ୍ଭ ହେବ।