ପୁରୁଷୋତ୍ତମପୁର,୧୯/୦୯: ୧୧ କେଭି ତାର ଲାଗି ପ୍ରାଣ ହରାଇଲେ ଯୁବକ । ଏହି ଦୁର୍ଘଟଣାରେ ଜଣେ ଗୁରୁତର ମଧ୍ୟ ହୋଇଛନ୍ତି । ମୃତ ଯୁବକ ଜଣକ ପବିତ୍ର ସାହୁ ଏବଂ ଆହତ ଯୁବକ ଜଣକ ମନୋଜ ପ୍ରଧାନ ବୋଲି ଜଣାପଡ଼ିଛି । ଗଞ୍ଜାମ ଜିଲ୍ଲା ପୁରୁଷୋତ୍ତମପୁର ଥାନା ଅନ୍ତର୍ଗତ ଜଗନ୍ନାଥପୁର ବ୍ରାହ୍ମଣ ଶାସନ ଗ୍ରାମରେ ଏଭଳି ଅଘଟଣ ଘଟିଛି ।
ସୂଚନା ମୁତାବକ, ପ୍ରତିବର୍ଷ ଭଳି ଚଳିତବର୍ଷ ମଧ୍ୟ ବ୍ରାହ୍ମଣ ଶାସନ ଗ୍ରାମରେ ଖୁବ୍ ଧୁମଧାମ୍ରେ ଗଣେଶ ପୂଜା ହୋଇଥିଲା । ବୁଧବାର ସନ୍ଧ୍ୟା ସମୟରେ ଗଣେଶ ଭଷାଣୀ ଉତ୍ସବ ଚାଲିଥିଲା । ଏହି ସମୟରେ ହଠାତ ୧୧କେଭି ତାର ଛିଡ଼ି ଦୁଇ ଜଣ ଯୁବକଙ୍କ ଉପରେ ପଡିଥିଲା । । ଫଳରେ ଘଟଣାସ୍ଥଳରେ ଜଣଙ୍କ ମୃତ୍ୟୁ ଘଟିଥିବା ବେଳେ ଆଉ ଜଣେ ଯୁବକ ଗୁରୁତର ହୋଇଥିଲେ । ସ୍ଥାନୀୟଲୋକେ ଏହି ଘଟଣା ସମ୍ୱନ୍ଧରେ ପୁରୁଷୋତ୍ତମପୁର ପୋଲିସକୁ ଖବର ଦେଇଥିଲେ । ପରେ ତୁରନ୍ତ ଗୁରୁତର ଅବସ୍ଥାରେ ମନୋଜଙ୍କୁ ଭାତକୁମରଡ଼ା ମେଡିକାଲରେ ଚିକିତ୍ସା ପାଇଁ ଭର୍ତ୍ତି କରିଥିଲେ । ସେଠାରେ ଚିକିତ୍ସା ପରେ ସେ ସୁସ୍ଥ ହୋଇ ଘରକୁ ଫେରିଛନ୍ତି ।
ଅନ୍ୟପଟେ ଘଟଣାସ୍ଥଳରେ ପୁରୁଷୋତ୍ତମପୁର ପୋଲିସ ପହଞ୍ଚି ପବିତ୍ରଙ୍କ ମୃତଦେହକୁ ବ୍ରହ୍ମପୁର ଏମକେସିଜି ମେଡିକାଲକୁ ବ୍ୟବଚ୍ଛେଦ ପାଇଁ ପଠାଇଛି । ସାହିରେ ବିଦ୍ୟୁତ ତାର ଗୁଡ଼ିକ ଅସଜଡା ଭାବେ ପଡ଼ି ରହିଥିବା ଯୋଗୁଁ ଏଭଳି ଅଭାବନୀୟ ଘଟଣା ଘଟିଛି । ତେଣୁ ଅସଜଡା ଭାବେ ରହିଥିବା ବିଦ୍ୟୁତ୍ ତାର ଗୁଡ଼ିକ ସଜାଡାଯାଉ ବୋଲି ଦାବି କରିଛନ୍ତି ମୃତକଙ୍କ ପରିବାର ଲୋକେ ।
