ପୁରୀ,୦୧/୦୭: ଦଇତାପତି ସେବକଙ୍କ ନିଷ୍ଠାପର ସେବାଯତ୍ନରେ ଆରୋଗ୍ୟଲାଭ କରୁଛନ୍ତି ମହାପ୍ରଭୁ । ସୋମବାର ଦଶମୀ ତିଥି । ଚତୁର୍ଦ୍ଧାମୂର୍ତ୍ତିଙ୍କ ଚକା ବିଜେ ନୀତି ଅନୁଷ୍ଠିତ ହେବ । ଅଣସର ପିଣ୍ଡିରେ ଠାକୁରଙ୍କୁ ଚକା ଉପରେ ବିଜେ କରାଯିବ । ଜାଗ୍ରତ ଅବସ୍ଥାକୁ ଆସିବେ ଦାରୁଦିଅଁ । ଦଇତାପତିମାନେ ଗୋଷ୍ଠୀଗତ ଭାବେ ଏହି ସେବା  କରିବେ । ରାଜବୈଦଙ୍କଦ୍ୱାରା ପ୍ରସ୍ତୁତ ଦଶମୂଳ ମହୋଷଧି  ଶ୍ରୀମନ୍ଦିରରେ ପହଞ୍ଚିବ । ଏହାକୁ ସେବନ କଲାପରେ ଠାକୁରେ ସମ୍ପୂର୍ଣ୍ଣ ସୁସ୍ଥ ହୋଇଯିବେ । ସ୍ନାନ ପୂର୍ଣ୍ଣିମାରେ  ୧୦୮ ଗରା ସୁନା କୂଅ ଜଳ ସ୍ନାନ ପରେ ଦାରୁବିଗ୍ରହ  ଜ୍ୱରରେ ପୀଡ଼ିତ ହେଲେ । ପଞ୍ଚମୀରେ ଫୁଲୁରି ତେଲ  ଲାଗି ହୋଇ ଉପଶମ ଲଭିଲେ । ପରେ ଷଷ୍ଠୀଠାରୁ ନବମୀ  ପର୍ଯ୍ୟନ୍ତ ଠାକୁରଙ୍କୁ ଓଷୁଅ ଲାଗି କରାଯାଇଥିଲା । ଦଶମୂଳ  ମହୌଷଧି ସେବନ କରି ସମ୍ପୂର୍ଣ୍ଣ ସୁସ୍ଥ ହେବେ ଠାକୁରେ ।