ଝରିଗାଁ, ୧୬/୭ : ଝରିଗାଁ ଚନ୍ଦାହାଣ୍ଡି ମୁଖ୍ୟ ରାସ୍ତାର ଘାଟି ନିକଟରେ ଦୁର୍ଘଟଣା। ମଙ୍ଗଳବାର ସକାଳ ପ୍ରାୟ ସାଢେ ୯ଟାରେ ଏକ ଚାରା ବୋଝେଇ ଅଟୋ ବ୍ରେକ୍ ଫେଲ୍ ହେବାରୁ ଭାରସାମ୍ୟ ହରାଇ ଘାଟିରେ ଓଲଟି ପଡିଛି। ଫଳରେ ଚାରା ବ୍ୟବସାୟୀ ଆହତ ହୋଇଛନ୍ତି। ଆହତ ବ୍ୟବସାୟୀ ଜଣକ ହେଲେ କଲିକତା ଗୋପୀନାଥପୁର ଗ୍ରାମର ଶିବା ଦେବନାଥ (୪୨ ବର୍ଷ)। ଦେବନାଥଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି କଲେଗାଁ ହାଇସ୍କୁଲ ପ୍ରଧାନ ଶିକ୍ଷକ ବିଶ୍ଵନାଥ ସାହୁ ଓ ଅନ୍ୟମାନେ ଆମ୍ବୁଲାନ୍ସ ଯୋଗେ ଝରିଗାଁ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଛନ୍ତି।
ସୂଚନାନୁଯାୟୀ, ଉମରକୋଟ ବ୍ଲକ ଡ଼ଙ୍ଗରୀଗୁଡ଼ା ସ୍ଥିତ ନର୍ସରୀ ମାଲିକ ଏସ କେ ଜୁଲଫୁକର ନିକଟରୁ ବିଭିନ୍ନ ପ୍ରକାର ଫୁଲ ଫଳ ଚାରା ଗଛ ଅଟୋରେ ଲଦି ଚନ୍ଦାହାଣ୍ଡି ଅଞ୍ଚଳକୁ ବିକ୍ରି କରିବା ଉଦ୍ଦେଶ୍ୟରେ ଯାଉଥିଲେ। ଚନ୍ଦାହାଣ୍ଡି ଘାଟି ନିକଟରେ ଅଟୋଟି ବ୍ରେକ୍ ଫେଲ୍ ହୋଇ ଭାରସାମ୍ୟ ହରାଇ ଓଲଟି ପଡିଥିଲା। ଅଟୋଟି ଦେବନାଥଙ୍କ ଉପରେ ଚାପି ହୋଇଯିବା ଫଳରେ ଦେବନାଥଙ୍କୁ ଗଭୀର ଆଘାତ ଲାଗିଛି। ଦେବନାଥଙ୍କ ମୁଣ୍ଡର ମଝି ଅଂଶ, ବାମ ହାତ ପାପୁଲି, ଛାତି ଓ ଉଭୟ ଗୋଡ଼ରେ ଗଭୀର ଆଘାତ ଲାଗିଛି। ତାଙ୍କୁ ଝରିଗାଁ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ପ୍ରାଥମିକ ଚିକିତ୍ସା ପରେ ଜିଲ୍ଲା ମୁଖ୍ୟ ହସ୍ପିଟାଲକୁ ରେଫର୍ କରାଯାଇଥିବା ଡାକ୍ତର ସୂଚନା ଦେଇଛନ୍ତି। ଦେବନାଥଙ୍କ ସହ ଡ୍ରାଇଭର ଓ ଅନ୍ୟ ଜଣକର ପରିଚୟ ମିଳିପାରି ନାହିଁ।