ଉତ୍ତରପ୍ରଦେଶ, ୧୫/୪ : ପ୍ରେମ କରି ବାହା ହେବା କିମ୍ବା କେଉଁଆଡ଼େ ଚାଲିଯିବା କିଛି ନୂଆ ଘଟଣା ନୁହେଁ । ପ୍ରତ୍ୟେକ ଦିନ ଆମେ ସୋସିଆଲ ମିଡ଼ିଆରେ ନୂଆ ନୂଆ ଘଟଣା ଦେଖୁଛେ । ପ୍ରେମରେ ପାଗଳ ହେଲେ ମଣିଷ ତା’ର ହିତାହିତ ଜ୍ଞାନ ଭୁଲିଯାଏ । ସବୁବେଳେ ନିଜର ପ୍ରେମକୁ ଜାହିର କରିବାକୁ ପ୍ରେମିକ-ପ୍ରେମିକା ଭିନ୍ନ ଭିନ୍ନ ଉପାୟ ଅବଲମ୍ବନ କରିଥାନ୍ତି । ଏଠି ବି ଠିକ୍ ଏଭଳି କିଛି ଘଟିଛି । ମାତ୍ର ତାହା ଆଶ୍ଚର୍ଯ୍ୟ ଲାଗୁଥିଲେ ବି ସତ । ଭାବି ଶାଶଙ୍କୁ ପ୍ରେମରେ ପଡ଼ିଯାଇଛନ୍ତି ଜ୍ବାଇଁ ପୁଅ । ଜ୍ବାଇଁକୁ ପ୍ରେମ କରି ବସିଛି ଭାବି ଶାଶୁ । ଯାହାକୁ ନେଇ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି । ୯ଦିନ ହେବ ତାଙ୍କର କୌଣସି ଖୋଜଖବର ମିଳିପାରୁନାହିଁ ।
ଉତ୍ତରପ୍ରଦେଶର ଆଲିଗଡ଼ରୁ ଏଭଳି ଘଟଣା ସାମ୍ନାକୁ ଆସିଛି । ଜ୍ବାଇଁ ରାହୁଲଙ୍କ ସହ ଭାବି ଶାଶୁ ଅପନା ଦେବୀ କେଉଁଆଡ଼େ ପଳାଇଛନ୍ତି । ଯାହାକୁ ନେଇ ଦିନକୁ ଦିନ ନୂଆ ଖବର ସାମ୍ନାକୁ ଆସିବାରେ ଲାଗିଛି । ଏବେ ଶାଶୁ ଏବଂ ଜ୍ବାଇଁଙ୍କ ବୟସ ସାମ୍ନାକୁ ଆସିଛି । କୁହାଯାଉଛି ଯେ, ଜ୍ବାଇଁଙ୍କ ବୟସ ମାତ୍ର ୨୪ବର୍ଷ ହୋଇଥିବାବେଳେ ତାଙ୍କର ଭାବି ଶାଶୁଙ୍କ ବୟସ ୩୪ବର୍ଷ । ପ୍ରାୟ ୧୦ବର୍ଷ ବଡ଼ ବୋଲି କୁହାଯାଉଛି । ଉଭୟଙ୍କର ଏବେ ଯାଏଁ କୌଣସି ଖୋଜ୍ ଖବର ମିଳିପାରିନାହିଁ ।
ରାହୁଲଙ୍କ ବାପା ତାଙ୍କୁ ତାଙ୍କ ସମ୍ପତ୍ତିରୁ ବାହାର କରିବା ବିଷୟରେ କହିଛନ୍ତି । ସେ କହିଛନ୍ତି କି ଯଦି ରାହୁଲ ଫେରି ଆସେ ତେବେ ସେ ତାଙ୍କୁ ତାଙ୍କ ଘରେ ପ୍ରବେଶ କରିବାକୁ ଦେବେ ନାହିଁ । ସେହିଭଳି ଅପନା ଦେବୀଙ୍କୁ ନେଇ ତାଙ୍କ ପଡ଼ୋଶୀ କହିଛନ୍ତି କି ଏଭଳି ମହିଳାଙ୍କୁ ମୃତ୍ୟୁଦଣ୍ଡ ଦେବା ଆବଶ୍ୟକ । ଉଭୟ ଯିବାର ୯ଦିନ ହୋଇଥିବାବେଳେ ଏବେ ଯାଏଁ ପୋଲିସ କୌଣସି ପତ୍ତା ପାଇନାହିଁ । ସେମାନଙ୍କୁ ଖସିଯିବାରେ ସାହାଯ୍ୟ କରିଥିବା ଲୋକଙ୍କୁ ମଧ୍ୟ ପୋଲିସ ଅଟକ ରଖିଛି ।
