ନୂଆଦିଲ୍ଲୀ, ୨୨।୧: ଓରାକେଲ ସିଇଓଙ୍କ ବଡ଼ ଘୋଷଣା । କର୍କଟ ରୋଗ ଚିହ୍ନଟଠାରୁ ଆରମ୍ଭ କରି ଟୀକାକରଣ ପର୍ଯ୍ୟନ୍ତ ସବୁକିଛି ସମ୍ଭବ ହେବ । ମାତ୍ର, ୪୮ ଘଣ୍ଟା ଭିତରେ କ୍ୟାନସର ଭ୍ୟାକ୍ସିନ ତିଆରି କରିବ AI । କର୍କଟ ରୋଗ ଭଳି ମାରାତ୍ମକ ରୋଗ ସମ୍ପର୍କରେ ଏହି ବଡ଼ ଦାବି କରିଛନ୍ତି ଲାରି ଏଲିସନ । ଲାରି ଏଲିସନ କହିଛନ୍ତି, କୃତ୍ରିମ ବୁଦ୍ଧିମତ୍ତା (AI) ସାହାଯ୍ୟରେ କର୍କଟ ରୋଗ ଚିହ୍ନଟ କରିବାଠାରୁ ଆରମ୍ଭ କରି ଏକ କଷ୍ଟମ୍ ଟିକା ତିଆରି କରିବା ପର୍ଯ୍ୟନ୍ତ ସବୁକିଛି ୪୮ ଘଣ୍ଟା ମଧ୍ୟରେ କରାଯାଇପାରିବ । କର୍କଟ ରୋଗ ପାଇଁ ଯଥାଶୀଘ୍ର ଏକ କଷ୍ଟମ କର୍କଟ ଟିକା ବିକଶିତ କରାଯିବ । ଆଗାମୀ ଭବିଷ୍ୟତରେ ଏହା ସଫଳ ହେବ ବୋଲି ସେ ଦାବି କରିଛନ୍ତି ।
ଆଗକୁ ଏହି ପରୀକ୍ଷା ସଫଳ ହେଲେ ଋଷ ପରେ ଟୀକା ତିଆରି କରିବାରେ ଆମେରିକା ଦ୍ୱିତୀୟ ଦେଶ ହେବ ! ଯଦି ଲାରି ଏଲିସନ ତାଙ୍କ ଦାବି ଅନୁଯାୟୀ କର୍କଟ ରୋଗର ଟିକା ତିଆରି କରିବାରେ ସଫଳ ହୁଅନ୍ତି, ତେବେ ଆମେରିକା କର୍କଟ ଭଳି ମାରାତ୍ମକ ରୋଗର ଟିକା ପ୍ରସ୍ତୁତ କରିବାରେ ଋଷ ପରେ ଦ୍ୱିତୀୟ ଦେଶ ହୋଇଯିବ । ଆମେରିକା ଏହି ଟୀକା ତିଆରି କରିବାର ବଡ଼ କାରଣ ମଧ୍ୟ ରହିଛି । କାରଣ ଋଷ ନିକଟରେ ବଡ଼ ଘୋଷଣା କରିଛି । ଋଷ କହିଛି ଯେ, ୨୦୨୫ରୁ ସାରା ଦେଶରେ କର୍କଟ ଟୀକା ଦିଆଯିବ । କେବଳ ଏତିକି ନୁହେଁ, ଋଷ ନିଜ ନାଗରିକମାନଙ୍କୁ ମାଗଣାରେ ଏହି ଟିକା ଯୋଗାଇବ ବୋଲି ଘୋଷଣା କରିଛି ।
କହିରଖୁ କି, କ୍ୟାନସର ରୋଗର ଚିକିତ୍ସା ପାଇଁ ଏହା ପୂର୍ବରୁ ଆମେରିକା ଅନେକ ପଦକ୍ଷେପ ନେଇଛି । ଫ୍ଲୋରିଡାରେ ୪ ଜଣ ରୋଗୀଙ୍କ ଉପରେ ଏକ ଟୀକା ପରୀକ୍ଷଣ କରାଯାଇଥିଲା-କର୍କଟ ଚିକିତ୍ସା ସମ୍ପର୍କରେ ଆମେରିକାରେ ପୂର୍ବରୁ ଅନେକ ପଦକ୍ଷେପ ନେଇଥିଲା । ମେ ୨୦୨୪ରେ, ଫ୍ଲୋରିଡା ବିଶ୍ୱବିଦ୍ୟାଳୟର ବୈଜ୍ଞାନିକମାନେ ୪ ଜଣ କର୍କଟ ରୋଗୀଙ୍କ ଉପରେ ଏକ ବ୍ୟକ୍ତିଗତ ଟୀକା ପରୀକ୍ଷା କରିଥିଲେ । ବୈଜ୍ଞାନିକମାନେ ଦାବି କରିଥିଲେ ଯେ ଟୀକାକରଣର ମାତ୍ର ଦୁଇ ଦିନ ପରେ ରୋଗୀଙ୍କଠାରେ ଦୃଢ଼ ରୋଗ ପ୍ରତିରୋଧକ ଶକ୍ତି ବିକଶିତ ହୋଇଥିଲା ।
ଋଷ ପରେ କ୍ୟାନସର ରୋଗ ଭଳି ମାରାତ୍ମକ ବିପଦକୁ ସାମନା କରିବାକୁ ଆମେରିକାର ଏହି ପଦକ୍ଷେପ ସାରା ବିଶ୍ୱ ପାଇଁ ଲାଭଦାୟକ । କାରଣ ପ୍ରତିବର୍ଷ ଏହି ରୋଗ ଲକ୍ଷ ଲକ୍ଷ ଲୋକଙ୍କ ଜୀବନ ନେଉଛି । ବିଶ୍ୱ ସ୍ୱାସ୍ଥ୍ୟ ସଙ୍ଗଠନର କହିବାନୁସାରେ, ସାରା ବିଶ୍ୱରେ ଲୋକଙ୍କର ମୃତ୍ୟୁର ଦ୍ୱିତୀୟ ସର୍ବବୃହତ୍ କାରଣ ହେଉଛି କ୍ୟାନସର । ପୃଥିବୀରେ ମୃତ୍ୟୁ ହେଉଥିବା ୬ ଜଣଙ୍କ ମଧ୍ୟରେ ଜଣେ କର୍କଟରେ ମୃତ୍ୟୁ ହେଉଥିବା ରିପୋର୍ଟରୁ ଜଣାପଡ଼ିଛି । ଭାରତରେ ମଧ୍ୟ କର୍କଟ ରୋଗରେ ମୃତ୍ୟୁ ମାମଲା କ୍ରମଶଃ ବଢ଼ିବାରେ ଲାଗିଛି । ୨୦୨୫ରେ ଭାରତରେ କ୍ୟାନସର ରୋଗୀଙ୍କ ସଂଖ୍ୟା ୧୫ ଲକ୍ଷ ପାର୍ ହୋଇଥିବା ଅନୁମାନ କରାଯାଉଛି । ସରକାରୀ ରିପୋର୍ଟ ଅନୁସାରେ, ଭାରତରେ ୨୦୨୯ରୁ ୨୦୨୩ ଏହି ୫ ବର୍ଷ ମଧ୍ୟରେ କ୍ୟାନସରର ୭୧ ଲକ୍ଷରୁ ଅଧିକ ମାମଲା ସାମନାକୁ ଆସିଛି । ଗତ ୫ ବର୍ଷ ମଧ୍ୟରେ ପାଖାପାଖି ୪୦ ଲକ୍ଷ ଲୋକଙ୍କର ମୃତ୍ୟୁ ହୋଇଛି ।
