ନୂଆଦିଲ୍ଲୀ: ଇସ୍ରାଏଲ ଏବଂ ହମାସ ମଧ୍ୟରେ ଆମେରିକା ମଧ୍ୟସ୍ଥତାରେ ହୋଇଥିବା ଅସ୍ତ୍ରବିରତି ଚୁକ୍ତିନାମା ବର୍ତ୍ତମାନ କାର୍ଯ୍ୟକାରୀ ହୋଇସାରିଛି । ହେଲେ ଏହି ସମୟ ମଧ୍ୟରେ ଇସ୍ରାଏଲୀ ସେନା ଦ୍ବାରା ଅଧିକୃତ ଓ୍ବେଷ୍ଟ ବ୍ୟାଙ୍କର ଜେନିନ୍ ଅଞ୍ଚଳରେ ଏକ ବଡ଼ ସାମରିକ ଅଭିଯାନ ଆରମ୍ଭ କରିଛି । ଏଥିରେ ୧୦ ଜଣ ପାଲେଷ୍ଟାଇନୀୟଙ୍କ ମୃତ୍ୟୁ ହୋଇଛି ଏବଂ ପ୍ରାୟ ୪୦ ଜଣ ଆହତ ହୋଇଛନ୍ତି । ପାଲେଷ୍ଟାଇନ ସ୍ୱାସ୍ଥ୍ୟ ମନ୍ତ୍ରଣାଳୟ ଏ ବିଷୟରେ ସୂଚନା ଦେଇଛି । 

ପାଲେଷ୍ଟାଇନୀ ଗଣମାଧ୍ୟମ ରିପୋର୍ଟ ଅନୁସାରେ, ଇସ୍ରାଏଲ ସୁରକ୍ଷା ବାହିନୀ ମଙ୍ଗଳବାର ଦିନ ଅଧିକୃତ ଓ୍ବେଷ୍ଟ ବ୍ୟାଙ୍କର ଜେନିନ୍ ଅଞ୍ଚଳରେ ଏକ ସିରିଜ୍ ବିମାନ ଆକ୍ରମଣ କରିଥିଲେ। ଏହା ପୂର୍ବରୁ, ଇସ୍ରାଏଲୀ ସେନା ମଙ୍ଗଳବାର କହିଥିଲା ଯେ, ସୁରକ୍ଷା ବାହିନୀ ଏବଂ ଗୁଇନ୍ଦା ସେବା ଏକ "ଆତଙ୍କବାଦ ବିରୋଧୀ ଅଭିଯାନ" ଆରମ୍ଭ କରିଛନ୍ତି । ସେ ଏହି ଅଭିଯାନର ନାମ ‘ଆଇରନ୍ ଓ୍ବାଲ’ ରଖିଛନ୍ତି । ତଥାପି, IDF ଅଧିକ ସୂଚନା ଦେଇ ନଥିଲା। ଏହି ସମୟରେ, ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ କହିଛନ୍ତି ଯେ IDF ଦ୍ୱାରା ପରିଚାଳିତ ଏହି ଅପରେସନର ଲକ୍ଷ୍ୟ ହେଉଛି ଜେନିନ୍ ଅଞ୍ଚଳରୁ 'ଆତଙ୍କବାଦକୁ ମୂଳପୋଛ କରିବା । ସେ କହିଛନ୍ତି ଯେ ଏହି ଅଞ୍ଚଳକୁ ବହୁ ଦିନ ଧରି ପାଲେଷ୍ଟାଇନୀ ସଶସ୍ତ୍ର ଗୋଷ୍ଠୀ ଗୁଡ଼ିକର ଏକ ଗଡ଼ ଭାବରେ ବିବେଚନା କରାଯାଇ ଆସୁଛି।

ତେବେ ସବୁଠୁବଡ କଥା ହେଉଛି ଇସ୍ରାଏଲ ଏବଂ ହମାସ ମଧ୍ୟରେ ଯୁଦ୍ଧବିରତି ଚୁକ୍ତିନାମା କାର୍ଯ୍ୟକାରୀ ହେବାର ତିନି ଦିନ ପରେ ଏହି ଆକ୍ରମଣ ହୋଇଛି। ଏହି ଆକ୍ରମଣ ପରେ, ଓ୍ବେଷ୍ଟ ବ୍ୟାଙ୍କରେ ହିଂସା ବୃଦ୍ଧି ପାଇବାର ଆଶଙ୍କା ରହିଛି। ଆଉ ଏହି ସମୟରେ, ପାଲେଷ୍ଟାଇନ ପ୍ରାଧିକରଣ (PA) ର ସୁରକ୍ଷା ବାହିନୀର ମୁଖପାତ୍ର ଏହି ସାମରିକ କାର୍ଯ୍ୟାନୁଷ୍ଠାନକୁ ପାଲେଷ୍ଟାଇନ ବିରୁଦ୍ଧରେ ଏକ ଆକ୍ରମଣ ବୋଲି କହିଛନ୍ତି । ସେ କହିଛନ୍ତି ଯେ ଇସ୍ରାଏଲୀ ସେନା ହଠାତ୍ ଆମର ନାଗରିକ ଏବଂ ସୁରକ୍ଷା ବାହିନୀ ଉପରେ ଆକ୍ରମଣ କରିଥିଲା।