ନୂଆଦିଲ୍ଲୀ: ତୁର୍କିର ଏକ ସ୍କି ରିସର୍ଟରେ ଭୟଙ୍କର ଅଗ୍ନିକାଣ୍ଡ ଘଟଣାରେ ଏପର୍ଯ୍ୟନ୍ତ ୭୬ ଜଣଙ୍କର ମୃତ୍ୟୁ ହୋଇସାରିଲାଣି । ଏହି ଘଟଣା ପରେ ଆଖପାଖ ଅଞ୍ଚଳରେ ଆତଙ୍କ ଖେଳିଯାଇଛି । ଅଗ୍ନିକାଣ୍ଡରେ ମୃତ୍ୟୁବରଣ କରିଥିବା ଲୋକଙ୍କ ଶରୀର ଏତେ ପୋଡ଼ି ଯାଇଛି ଯେ ସେମାନଙ୍କୁ ଚିହ୍ନଟ କରିବା ପାଇଁ ଏବେ ଡିଏନଏ ପରୀକ୍ଷା ଆବଶ୍ୟକ ହେଉଛି । ସୂଚନାଥାଉକି, ଏହି ଦୁର୍ଘଟଣା ତୁର୍କୀର ବୋଲୁ ପର୍ବତମାଳାରେ ଅବସ୍ଥିତ କାର୍ଟାଲକାୟା ସ୍କି ରିସର୍ଟର ୧୨ ମହଲା ବିଶିଷ୍ଟ ଗ୍ରାଣ୍ଡ କାର୍ଟାଲ ହୋଟେଲର ରେଷ୍ଟୁରାଣ୍ଟରେ ଘଟିଛି।
ସୂଚନା ମୁତାବକ ପୋଲିସ ଏହି ଘଟଣାରେ ନଅ ଜଣଙ୍କୁ ଗିରଫ କରିଛି। ଏ ସମ୍ପର୍କରେ ତୁର୍କୀର ଗୃହମନ୍ତ୍ରୀ ଅଲି ୟେରଲିକାୟା କହିଛନ୍ତି ଯେ ସୁରକ୍ଷା ପଦକ୍ଷେପକୁ ବୃଦ୍ଧି କରାଯାଉଛି । ଘଟଣାର ତଦନ୍ତ ପାଇଁ ଛଅ ଜଣ ପବ୍ଲିକ ପ୍ରୋସିକ୍ୟୁଟରଙ୍କୁ ନିଯୁକ୍ତ କରାଯାଇଛି। ଏହି ଅଗ୍ନିକାଣ୍ଡରେ ମୃତ୍ୟୁବରଣ କରିଥିବା ୭୬ ଜଣଙ୍କ ମୃତଦେହ ଚିହ୍ନଟ ସମ୍ପର୍କରେ ଅନେକ କଥା ସାମ୍ନାକୁ ଆସୁଛି। ଏ ସମ୍ପର୍କରେ ମନ୍ତ୍ରୀ ୟେରଲିକାୟା କହିଛନ୍ତି ଯେ ୪୫ ଜଣ ମୃତକଙ୍କ ମୃତଦେହ ସେମାନଙ୍କ ପରିବାରକୁ ହସ୍ତାନ୍ତର କରାଯାଇଛି। ବାକିମାନଙ୍କୁ ଚିହ୍ନଟ କରିବା ପାଇଁ ଡିଏନଏ ପରୀକ୍ଷା କରାଯାଉଛି।
ଗଣମାଧ୍ୟମ ରିପୋର୍ଟ ଅନୁସାରେ, ହୋଟେଲର ଅଗ୍ନି ଆଲାର୍ମ ସିଷ୍ଟମ ଠିକ୍ ଭାବରେ କାମ କରିନଥିଲା। ଏହି ସୂଚନା ଦୁର୍ଘଟଣାରୁ ବଞ୍ଚିଥିବା କିଛି ବ୍ୟକ୍ତି ଦେଇଛନ୍ତି। ସେମାନଙ୍କ କହିବା କଥା ଯେ ଫାୟାର ଆଲାର୍ମ ବାଜି ନଥିଲା ଏବଂ ତାଙ୍କୁ ଅନ୍ଧାର ଏବଂ ଧୂଆଁ ପୂର୍ଣ୍ଣ କରିଡର ଦେଇ ଚାଲିବାକୁ ପଡିଲା। କିଛି ଲୋକ ଝରକାରୁ ଡେଇଁ ଖସି ପଳାଇବାକୁ ଚେଷ୍ଟା କରୁଥିବା ଦେଖାଯାଇଥିଲା।
ଏହି ମାମଲାରେ, ଘଟଣା ପରେ ହୋଟେଲ କର୍ତ୍ତୃପକ୍ଷଙ୍କୁ ପୂର୍ଣ୍ଣ ସହଯୋଗ ମଧ୍ୟ କରିଥିଲା। ସ୍କି ରିସର୍ଟ ପୋଲିସକୁ ଦେଇଥିବା ଏକ ବିବୃତ୍ତିରେ କହିଛି ଯେ ସେମାନେ ମାମଲାର ସମସ୍ତ ଦିଗ ଉନ୍ମୋଚନ ପାଇଁ କାମ କରୁଛନ୍ତି। ଏହା ସହିତ, ଏହି ଘଟଣା ପରେ ତୁର୍କୀ ରାଷ୍ଟ୍ରପତି ରେସେପ୍ ତାୟିପ୍ ଏର୍ଡୋଗାନ୍ ଏକ ଜାତୀୟ ଶୋକ ଦିବସ ଘୋଷଣା କରିଛନ୍ତି।
