ନୂଆଦିଲ୍ଲୀ,୨୧/୦୧: ଶପଥ ଗ୍ରହଣ ପୂର୍ବରୁ ଏବଂ ସେହି ସମୟରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଦେଇଥିବା କିଛି ପ୍ରତିଶୃତିକୁ ନେଇ ଏବେ ଅନେକ ପ୍ରଶ୍ନ ଉଠିଛି। ଯଦିଓ ଆମେରିକା ଆଜି ବିଶ୍ୱର ସର୍ବବୃହତ ଅର୍ଥନୀତି ତଥାପି ମାନ୍ଦାବସ୍ଥା ମଧ୍ୟ ଦ୍ରୁତ ଗତିରେ ଏହାର କବାଟ ଠକ୍ ଠକ୍ କରୁଛି। ଆର୍ଥିକ ମାନ୍ଦାବସ୍ଥା ଏବଂ କରୋନା ମହାମାରୀ ପରେ, ଗତ ବର୍ଷ ଜୁଲାଇରେ ଆମେରିକାର ଅର୍ଥନୀତି ସବୁଠାରୁ ବଡ଼ ସଙ୍କଟରେ ପଡ଼ିଥିବା ପରି ମନେ ହେଉଥିଲା। ପ୍ରକାଶିତ ତଥ୍ୟ ଅନୁସାରେ, ଆମେରିକା ଜୁଲାଇ ୨୦୨୪ ଠାରୁ ଆର୍ଥିକ ମାନ୍ଦାବସ୍ଥାର ଦ୍ୱାରଦେଶରେ ଅଛି। ଏହା ବ୍ୟତୀତ ଆମେରିକାରେ ଲୋକଙ୍କ ଜୀବନଯାପନ ଖର୍ଚ୍ଚ ବହୁତ ବୃଦ୍ଧି ପାଇଛି। ଗତ କିଛି ବର୍ଷ ମଧ୍ୟରେ ଆମେରିକା ଆର୍ଥିକ ଦୃଷ୍ଟିରୁ ଦୁର୍ବଳ ହୋଇଯାଇଛି। ସେଥିପାଇଁ ତାଙ୍କ ଶପଥ ଗ୍ରହଣ ସମାରୋହରେ, ନୂତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏହାକୁ ପୁଣି ଥରେ ଏକ ମହାନ ଦେଶ କରିବା ବିଷୟରେ କହିଥିଲେ। ତେବେ ଆସନ୍ତୁ ଜାଣିବା, କିପରି ଆମେରିକା ଦୁର୍ବଳ ସ୍ଥିତିରେ ପହଞ୍ଚିଲା।
ଜିଡିପିର ୧୨୫ ପ୍ରତିଶତରେ ପହଞ୍ଚିଲା ଋଣଭାର:
ଜୁଲାଇ ୨୦୨୪ରେ ପ୍ରକାଶିତ ତଥ୍ୟ ଅନୁସାରେ, ମେ-୨୪ରେ ଆମେରିକା ସରକାରଙ୍କ ଖର୍ଚ୍ଚ ୬.୫ ଟ୍ରିଲିୟନ ଡଲାରରେ ପହଞ୍ଚିଥିଲା। ଏଥି ସହିତ, ଏହି ଆର୍ଥିକ ମହାଶକ୍ତିର ବିତ୍ତିୟ ନିଅଣ୍ଟ ଜିଡିପିର ୬.୨ ପ୍ରତିଶତ ହୋଇଥିଲା। ଏହା ସାଧାରଣତଃ କେବଳ ଏକ ବଡ଼ ଆର୍ଥିକ ସଙ୍କଟ ସମୟରେ ଘଟେ। ଜୋ ବାଇଡେନଙ୍କ କାର୍ଯ୍ୟକାଳ ମଧ୍ୟରେ ଆମେରିକାର ମୋଟ ଋଣ ଏକ ନୂତନ ରେକର୍ଡରେ ପହଞ୍ଚିଥିଲା। ଏପ୍ରିଲ ୨୦୨୪ ର ତଥ୍ୟ ଅନୁଯାୟୀ, ସଂଘୀୟ ସରକାରଙ୍କ ଋଣ ୩୪.୬ ଅରବ ଡଲାରରେ ପହଞ୍ଚିଥିଲା। ଏହା ଆମେରିକା ଜିଡିପିର ପ୍ରାୟ ୧୨୫ ପ୍ରତିଶତ ଥିଲା। ଏହି ପରିସଂଖ୍ୟାନଗୁଡ଼ିକ ଏହା ମଧ୍ୟ ଦର୍ଶାଉଛି ଯେ ଆମେରିକା ଉତ୍ପାଦନ କ୍ଷେତ୍ରରେ ମଧ୍ୟ ପଛରେ ଅଛି। ଆମଦାନୀ ମଧ୍ୟ ବୃଦ୍ଧି ପାଇଛି ଏବଂ ରପ୍ତାନି ହ୍ରାସ ପାଇଛି। ଏହା ଆମେରିକାର ଅର୍ଥନୀତି ଉପରେ ସିଧାସଳଖ ପ୍ରଭାବ ପକାଇଛି।
ବିଶ୍ବର ସର୍ବବୃହତମ ଅର୍ଥବ୍ୟବସ୍ଥା ଉପରେ କରଜ କେତେ?
ଯଦି ଆମେ ତଥ୍ୟ ଉପରେ ନଜର ପକାଇବା, ତେବେ ଏହା ସ୍ପଷ୍ଟ ଯେ ଜୋ ବାଇଡେନଙ୍କ କାର୍ଯ୍ୟକାଳରେ, ଗତ ଚାରି ବର୍ଷ ମଧ୍ୟରେ ଆମେରିକାର ଋଣ ୪୭ ପ୍ରତିଶତ ଅର୍ଥାତ୍ ପ୍ରାୟ ୧୧ ଟ୍ରିଲିୟନ ଡଲାର ବୃଦ୍ଧି ପାଇଛି। ଏପରି ପରିସ୍ଥିତିରେ, ପ୍ରତ୍ୟେକ ଆମେରିକୀୟ କରଦାତାଙ୍କ ଉପରେ ପ୍ରାୟ ୨୬୭,୦୦୦ (ପ୍ରାୟ ୨,୨୧,୭୫,୭୭୮ ଟଙ୍କା) ଋଣ ଅଛି। ଯଦି ଏହି ଧାରା ଜାରି ରହେ, ତେବେ ଆମେରିକାର ଋଣ ଭାର ୨୦୨୫ ସୁଦ୍ଧା ୪୦ ଟ୍ରିଲିୟନ ଡଲାରରେ ପହଞ୍ଚିବାର ଆଶଙ୍କା ରହିଛି। ଫେଡ୍ ରିଜର୍ଭ ଯଦି ସୁଧ ହାରରେ ହ୍ରାସ ନକରେ ତେବେ ଏହି ଋଣରେ ଆମେରିକାକୁ ପ୍ରତିବର୍ଷ ୧.୬ ଟ୍ରିଲିୟନ ଡଲାର ସୁଧ ଦେବାକୁ ହେବ। ଏହି ପରିପ୍ରେକ୍ଷୀରେ କୁହାଯାଉଛି ଯେ, ପ୍ରଥମ ଥର ଆମେରିକାର ସୁଧ ପରିଶୋଧ ଏହାର ପ୍ରତିରକ୍ଷା ବଜେଟ ଏବଂ ସ୍ବାସ୍ଥ୍ୟ ଖର୍ଚ୍ଚରୁ ଉପରକୁ ପହଞ୍ଚିଯିବ।
ସାଧାରଣ ଲୋକଙ୍କ ଜୀବନଶୈଳୀର ଖର୍ଚ୍ଚ ବଢ଼ିଛି:
ଜୋ ବାଇଡେନଙ୍କ କାର୍ଯ୍ୟକାଳର ଶେଷ ସମୟରେ ଆମେରିକାରେ କର୍ମଜୀବୀ ଲୋକଙ୍କ ଜୀବନଯାପନ ଖର୍ଚ୍ଚ ବହୁତ ବୃଦ୍ଧି ପାଇଥିଲା। ଏପି ଭୋଟକାଷ୍ଟର ଏକ ରିପୋର୍ଟ ଅନୁଯାୟୀ, ୨୦୨୪ ଅକ୍ଟୋବର ୩୦ ରୁ ନଭେମ୍ବର ୫ ତାରିଖ ପର୍ଯ୍ୟନ୍ତ ୧ ଲକ୍ଷ ୨୦ ହଜାରରୁ ଅଧିକ ପଞ୍ଜିକୃତ ଭୋଟରଙ୍କ ମଧ୍ୟରେ ଏକ ସର୍ଭେ କରାଯାଇଥିଲା। ଏଥିମଧ୍ୟରୁ ୯୬ ପ୍ରତିଶତ କହିଛନ୍ତି ଯେ ସେମାନେ ପେଟ୍ରୋଲ ଏବଂ ଗ୍ରୋସରୀ ସାମଗ୍ରୀର ଉଚ୍ଚ ମୂଲ୍ୟକୁ ଧ୍ୟାନରେ ରଖି ନଭେମ୍ବର ୨୦୨୪ରେ ରାଷ୍ଟ୍ରପତି ନିର୍ବାଚନରେ ଭୋଟ ଦେଇଥିଲେ। ଆମେରିକାର ମୁଦ୍ରାସ୍ଫୀତି ତଥ୍ୟ ଦର୍ଶାଉଛି ଯେ ଆମେରିକାର ଲୋକମାନେ ବାଇଡେନ ରାଷ୍ଟ୍ରପତି ହେବା ପରେ ୨୨ ପ୍ରତିଶତ ଅଧିକ ଖର୍ଚ୍ଚ କରୁଛନ୍ତି। ମାର୍ଚ୍ଚ ୨୦୨୪ ଫେଡେରାଲ୍ ଟ୍ରେଡ୍ କମିଶନ (ଏଫ୍ଟିସି) ରିପୋର୍ଟରେ କୁହାଯାଇଛି ଯେ ୨୦୨୧ ମସିହାରେ ଖାଦ୍ୟପେୟ ବ୍ୟବସାୟ କରୁଥିବା ଲୋକଙ୍କ ରାଜସ୍ୱ ମୋଟ ଖର୍ଚ୍ଚର ଛଅ ପ୍ରତିଶତରୁ ଅଧିକ ବୃଦ୍ଧି ପାଇଛି।
ବର୍ଦ୍ଧିତ ଗୃହ ଖର୍ଚ୍ଚ ମଧ୍ୟ ଚିନ୍ତାର କାରଣ:
ବାଇଡେନଙ୍କ କାର୍ଯ୍ୟକାଳରେ କର୍ମଜୀବୀ ଲୋକମାନଙ୍କୁ ମଧ୍ୟ ବର୍ଦ୍ଧିତ ଗୃହ ଖର୍ଚ୍ଚ ସହିତ ସଂଘର୍ଷ କରିବାକୁ ପଡ଼ିଛି। ଆମେରିକାରେ ଘର ଖର୍ଚ୍ଚ ଏପ୍ରିଲ ୨୦୨୪ ରେ ରେକର୍ଡର ସର୍ବୋଚ୍ଚ ସ୍ତରରେ ପହଞ୍ଚିଥିଲା। ସେପ୍ଟେମ୍ବରରେ ଭଡ଼ା ୩.୩ ପ୍ରତିଶତ ବୃଦ୍ଧି ପାଇଛି। ସାରା ଦେଶରେ, ପ୍ରାୟ ଅଧା ଭଡ଼ାଟିଆ ସେମାନଙ୍କ ମୋଟ ଆୟର ୩୦ ପ୍ରତିଶତରୁ ଅଧିକ ଘର ପାଇଁ ଖର୍ଚ୍ଚ କରନ୍ତି। ଆମେରିକାର ଗୃହ ଏବଂ ନଗର ଉନ୍ନୟନ ବିଭାଗ ଦ୍ୱାରା ଏକ ରିପୋର୍ଟ ପ୍ରକାଶ କରାଯାଇଛି। ଏଥିରେ କୁହାଯାଇଛି ଯେ ଜାନୁଆରୀ ୨୦୨୪ ରେ, କେବଳ ଗୋଟିଏ ରାତିରେ ୭,୭୦,୦୦୦ ରୁ ଅଧିକ ଲୋକ ବାସହୀନ ହୋଇଥିଲେ।
ରୁଷ-ୟୁକ୍ରେନ ଯୁଦ୍ଧକୁ ସହାୟତା, ଚୀନ୍ ସହିତ ଶୀତଳ ଯୁଦ୍ଧ:
ବିଶ୍ୱରେ ଶାନ୍ତି ପ୍ରତିଷ୍ଠା କରିବା ପରିବର୍ତ୍ତେ, ଆମେରିକା ଯୁଦ୍ଧ ନିଆଁରେ ଘିଅ ଢାଳିବା ଭଳି ନଜର ଆସିଥିଲା। ବାଇଡେନ ପ୍ରଶାସନ ବିଫଳ ହୋଇଥିବା ଆଉ ଏକ ବଡ଼ ସମସ୍ୟା ହେଉଛି ରୁଷ ଏବଂ ୟୁକ୍ରେନ ମଧ୍ୟରେ ଯୁଦ୍ଧ। ଏହା ମଧ୍ୟ କୁହାଯାଇପାରେ ଯେ ଏହି ଦୁଇ ଦେଶ ମଧ୍ୟରେ ଶାନ୍ତିପୂର୍ଣ୍ଣ ଆଲୋଚନାରେ ଆମେରିକା ଏକ ପ୍ରମୁଖ ପ୍ରତିବନ୍ଧକ ହୋଇ ରହିଥିଲା ଏବଂ ଯୁଦ୍ଧକୁ ଆହୁରି କୁହୁଳାଇବା ପାଇଁ ୟୁକ୍ରେନକୁ କୋଟି କୋଟି ଡଲାର ମୂଲ୍ୟର ସାମରିକ ସାମଗ୍ରୀ ଯୋଗାଇ ଚାଲିଥିଲା। ଏହା ବ୍ୟତୀତ, ବାଇଡେନ ଚୀନ୍ ସହିତ ଚାଲିଥିବା ଶୀତଳ ଯୁଦ୍ଧ ମଧ୍ୟ ଜାରି ରଖିଥିଲେ। ଚୀନ୍ ଏବଂ ଏହାର ସହଯୋଗୀ ଉତ୍ତର କୋରିଆ ଉପରେ ନଜର ରଖି, ଆମେରିକା ପୂର୍ବ ଏସିଆରେ ସାମରିକ ଅଭ୍ୟାସ ବୃଦ୍ଧି କଲା। ପରିଣାମ ସ୍ୱରୂପ ବିଶ୍ୱର ବିଭିନ୍ନ ଦେଶରେ ଅସ୍ତ୍ରଶସ୍ତ୍ର ପ୍ରତିଯୋଗିତା ବୃଦ୍ଧି ପାଇଲା।
