ନୂଆଦିଲ୍ଲୀ,୨୧।୧: ଆଫଗାନିସ୍ତାନର ତାଲିବାନ ସରକାର ମଙ୍ଗଳବାର ଆମେରିକା ସହ ହୋଇଥିବା ଡିଲ୍ ବିଷୟରେ ଖୁଲାସା କରିଛି। ତାଲିବାନ ବୈଦେଶିକ ମନ୍ତ୍ରଣାଳୟ କହିଛି, ସେ ଆମେରିକାରେ ସଜା କାଟୁଥିବା ମୁଜାହିଦ ଖାନ୍‌ ମହମ୍ମଦ ବଦଳରେ ଦୁଇ ଆମେରିକୀୟ କଏଦୀଙ୍କୁ ମୁକ୍ତ କରିଛି। ସେ ହେଉଛନ୍ତି ଆଫଗାନିସ୍ତାନରେ ତାଲିବାନର ଜଣେ ଯୋଦ୍ଧା। କଏଦୀଙ୍କ ଏହି ଅଦଳ ବଦଳ ସୋମବାର ଡୋନାଲ୍ଡୋ ଟ୍ରମ୍ପଙ୍କ ଶପଥ ଦିନ ହୋଇଛି। ଖାନ୍ ମହମ୍ମଦ ଆମେରିକାରେ ଆଜୀବନ ସଜା କାଟୁଥିଲେ।

ଅଫଗାନ ଅଧିକାରୀଙ୍କ କହିବା ଅନୁସାରେ, ଖାନ ମହମ୍ମଦଙ୍କୁ ମୁକ୍ତ କରିବା ପରେ କାବୁଲକୁ ପଠାଇ ଦିଆଯାଇଛି। ମହମ୍ମଦ ୨୦୦୮ ରେ ଆମେରିକା କୋର୍ଟଙ୍କ ନିକଟରେ ଆଜୀବନ ସଜା ଶୁଣାଇଥିଲେ। ଏହି ସଜା ନାର୍କୋ-ଟୋରୋରିଜମ୍‌ ଅଭିଯୋଗରେ ଦିଆଯାଇଥିଲା ଓ ଏହାକୁ ଆମେରିକା ନ୍ୟାୟ ବିଭାଗ(ଡିଓଜେ) ନିଜର ପ୍ରଥମ ବଡ଼ ସଫଳତା ଘୋଷଣା କରିଛି।

ଅଫଗାନିସ୍ତାନର ବୈଦେଶିକ ମନ୍ତ୍ରଣାଳୟ କହିଛି, ଏଭଳି କଏଦୀ ଅଦଳ-ବଦଳ ‘ଲମ୍ବା ଓ ପ୍ରଭାବୀ’ ଆଲୋଚନାର ଫଳାଫଳ। ମହମ୍ମଦଙ୍କୁ ୨୦୦୬ ରେ ଆଫଗାନିସ୍ତାନର ପୂର୍ବ ଅଞ୍ଚଳରୁ ଗିରଫ କରାଯାଥିଲା ଓ ବର୍ଷେ ପରେ ଆମେରିକାକୁ ପ୍ରଦାନ କରାଯାଇଥିଲା। ତାଲିବାନ ପ୍ରଶାସନର ମୁଖପାତ୍ର ଜବିଉଲ୍ଲାହ ମୁଜାହିଦ କହିଛନ୍ତି, ଦୁଇ ଆମେରିକୀୟ ନାଗରିକଙ୍କୁ ମୁକ୍ତ କରି ଦିଆଯାଇଛି। କିନ୍ତୁ ତାଙ୍କ ନାଁ କହିବାକୁ ମନା କରିଦେଇଛନ୍ତି। ଖାନ୍ ମହମ୍ମଦ ଅଫଗାନ ତାଲିବାନର ଯୋଦ୍ଧା। ତାଙ୍କୁ ଆମେରିକା ସୈନିକଙ୍କ ଉପରେ ରକେଟ ମାଡ କରିବା ଓ ଡ୍ରଗ୍ସ ତସ୍କରି କରିବାର ଅଭିଯୋଗରେ ଆଜୀବନ ସଜା ଦିଆଯାଇଥିଲା।