ନୂଆଦିଲ୍ଲୀ, ୨୨/୦୧: ତୁର୍କୀର ବୋଲୁ ପ୍ରଦେଶରେ ଭୟାବହ ଅଗ୍ନିକାଣ୍ଡ। ଫଳରେ ୬୬ ଜଣଙ୍କ ମୃତ୍ୟୁ ଘଟିଥିବା ବେଳେ ୫୦ରୁ ଅଧିକ ଆହତ ହୋଇଛନ୍ତି । ରିସର୍ଟରେ ନିଆଁ ଲାଗିଥିବା ବେଳେ କିଛି ଲୋକ ଭୟଭୀତ ହୋଇ ପ୍ରାଣ ବିକଳରେ ୧୧ ମହଲାରୁ ଡେଇଁପଡ଼ିଥିଲେ । ଏହାଯୋଗୁ କିଛି ଆହତ ହୋଇଥିବା ବେଳେ ଆଉ କିଛି ପ୍ରାଣ ହରାଇଛନ୍ତି । ନିଆଁ ଲାଗିବା ପରେ ଦଳାଚକଟା ସ୍ଥିତି ଉପୁଜିଥିଲା । ତୁର୍କୀର ବୋଲୁ ପ୍ରଦେଶର କାର୍ତଲକାୟା ସ୍କି ରିସର୍ଟରେ ମଙ୍ଗଳବାର ଦିନ ଏହି ଅଘଟଣା ଘଟିଛି ।
ସୂଚନା ମୁତାବକ, ଗତକାଲି ସ୍ଥାନୀୟ ସମୟ ରାତି ୩ଟା ୩୦ରେ ହୋଟେଲରେ ନିଆଁ ଲାଗିଥିଲା । ଏହା ୧୧ଟି ମହଲା ପର୍ଯ୍ୟନ୍ତ ବ୍ୟାପିଥିଲା । କେଉଁ କାରଣରୁ ଏହି ଅଗ୍ନିକାଣ୍ଡ ଘଟିଲା, ତାହା ଜଣା ପଡ଼ିନାହିଁ । ତୁର୍କୀ ଗଣମାଧ୍ୟମ ଡେଲି ସବାହ ମୁତାବକ, କାର୍ତଲକାୟା ସ୍କି ରିସର୍ଟ ଏକ ଛୋଟ ପାହାଡ଼ ଉପରେ ରହିଛି । ଏହି କାରଣରୁ ଅଗ୍ନିକାଣ୍ଡ ବେଳେ ସେଠାରେ ଅଗ୍ନିଶମ ବାହିନୀର ଗାଡ଼ି ପହଞ୍ଚିବା କଷ୍ଟକର ହୋଇଥିଲା । ରିଲିଫ ସହାୟତା ବି ବିଳମ୍ବରେ ପହଞ୍ଚିଥିଲା । ବୋଲୁ ପ୍ରଦେଶର ଗଭର୍ଣ୍ଣର ଅବ୍ଦୁଲ ଅଜିଜ ଆୟଡିନ କହିଛନ୍ତି, ହୋଟେଲରେ ଅତିଥିମାନେ ରହୁଥିଲେ । ସେମାନଙ୍କୁ ଉଦ୍ଧାର ଲାଗି ୩୦ ଦମକଳ ଗାଡ଼ି ଓ ୨୮ ଆମ୍ବୁଲାନ୍ସ ପଠାଯାଇଥିଲା । ନିଆଁକୁ ଆୟତ୍ତ ନିମନ୍ତେ ୨୬୭ ଏମର୍ଜେନ୍ସି ୱାର୍କରଙ୍କୁ ମୁତୟନ କରାଯାଇଥିଲା । ତୁର୍କୀର ପର୍ଯ୍ୟଟନ ଓ ସ୍ୱାସ୍ଥ୍ୟ ମନ୍ତ୍ରୀ ଦୁର୍ଘଟଣା ସ୍ଥଳରେ ପହଞ୍ଚି ସ୍ଥିତି ସମୀକ୍ଷା କରିଛନ୍ତି । କାର୍ତଲକାୟା ଇସ୍ତାନବୁଲ ସହରଠାରୁ ପ୍ରାୟ ୩୦୦ କିଲୋମିଟର ପୂର୍ବରେ କୋରୋଗ୍ଲୁ ପାହାଡ଼ ଉପରେ ଏକ ଲୋକପ୍ରିୟ ସ୍କି ରିସର୍ଟ । ବର୍ତ୍ତମାନ ତୁର୍କୀରେ ସ୍କୁଲ ଛୁଟି ଚାଲିଥିବାରୁ ହୋଟେଲରେ ସ୍ୱାଭାବିକଠାରୁ ଅଧିକ ଭିଡ଼ ଥିଲା । ତୁର୍କୀ ରାଷ୍ଟ୍ରପତି ରିସେପ ତାୟିପ ଏର୍ଡୋଗାନ କହିଛନ୍ତି, ଏହି ଦୁର୍ଘଟଣା ପାଇଁ ଦାୟୀ ଥିବା ଲୋକଙ୍କର ପରିଚୟ ଜାଣିବାକୁ ତଦନ୍ତ ଆରମ୍ଭ ହୋଇଛି । ଦୋଷୀଙ୍କୁ ଦଣ୍ଡ ଦେବା ଲାଗି ଜରୁରି ପଦକ୍ଷେପ ନିଆଯିବ ।
