ଜୟପୁର,୧୨/୦୭: ଅଫ୍ରୋଡ୍ ସାଙ୍ଗକୁ ପ୍ରବଳ ଥଣ୍ଡା । ସେଥିରେ ଆବଡ଼ାଖାବଡ଼ା ପାଦଚଲା ରାସ୍ତା । ଖସିପଡ଼ିଲେ ଜୀବନ ଚାଲିଯିବାର ଭୟ । ପାଦ ପଛକୁ ଟାଣୁଥିଲେ ବି ମନ ମାନିନଥିଲା । ‘ଭୋଲେ ବାବା ପାର୍ କରେଗା’ ନାରା ଆତ୍ମବିଶ୍ୱାସକୁ ଆହୁରି ମଜଭୁତ କରିଥିଲା । ଦୀର୍ଘ ୫ କିଲୋମିଟର ଟ୍ରେକିଂ ପରେ ପହଞ୍ଚିଥିଲେ ଗୌରୀକୁଣ୍ଡରେ । ମହାଦେବଙ୍କ ଆବାସସ୍ଥଳି ଆଦିକୈଳାସର ମନଲୋଭା ଦୃଶ୍ୟ ଆଖିରେ ଆଣିଥିଲା ଲୁହ । ପ୍ରଣାମ ଉଦ୍ଦେଶ୍ୟରେ ଦୁଇ ହାତ ମୁଣ୍ଡ ଉପରକୁ ଉଠିଯାଇଥିବା ବେଳେ ମୁହଁରୁ ବାହାରି ପଡ଼ିଥିଲା ‘ହରହର୍ ମହାଦେବ’ । ପ୍ରବଳ ଥଣ୍ଡା, ଅମ୍ଳଜାନ ଅଭାବ ସହ ୨୨ ହଜାର ୫୦୦ ଫୁଟ ଉଚ୍ଚ ଚଢା ବେଳର କଷ୍ଟ ମୁହୂର୍ତ୍ତକେ ଉଭେଇ ଯାଇଥିଲା । ସରକାରୀ ତଥ୍ୟ ଅନୁଯାୟୀ ଅବିଭକ୍ତ କୋରାପୁଟର ପ୍ରଥମ ଟିମ୍ ସଦସ୍ୟଭାବେ ଆଦିକୈଳାସ ଦର୍ଶନର ସୌଭାଗ୍ୟ ପାଇଛନ୍ତି ରାଜେନ୍ଦ୍ର କୁମାର ଦାଶ ଏବଂ ଦୁର୍ଗାପ୍ରସାଦ ପାତ୍ର ।
ସ୍ଥାନୀୟ ଏନକେଟି ରୋଡ୍ର ରାଜେନ୍ଦ୍ର ବ୍ୟବସାୟ କରୁଥିବା ବେଳେ କେଲାନଗରର ଦୁର୍ଗାପ୍ରସାଦ ଏକ ଘରୋଇ କମ୍ପାନିରେ ମ୍ୟାନେଜର ଅଛନ୍ତି । ଉଭୟ କହିଛନ୍ତି, ମହାଦେବଙ୍କ ଆବାସସ୍ଥଳି ଆଦି କୈଳାସ ଯିବା ଲାଗି ପୂର୍ବରୁ ଯୋଜନା କରିଥିଲେ । ମାସେ ତଳୁ ଆରମ୍ଭ ହୋଇଥିଲା ପ୍ରସ୍ତୁତି । ଏଠାରୁ ବସ୍ରେ ଛତିଶଗଡ଼ର ରାୟପୁର ଏବଂ ସେଠାରୁ ଉତ୍ତରାଖଣ୍ଡର ଶେଷ ରେଳଷ୍ଟେସନ୍ କାଠଗୋଦାମରେ ପହଞ୍ଚିଥିଲେ । ଧାରଚୁଲା ତହସିଲରୁ ଇନର ପରମିଟ୍ ମିଳିବା ପରେ ପରଦିନ ସକାଳୁ ବାଇକ୍ରେ ପହଞ୍ଚିଥିଲେ ୯୦ କିମି ଦୂରରେ ଥିବା ଗୁଞ୍ଜିରେ । ଅଗମ୍ୟ ରାସ୍ତା, ଗଣେଶ ନାଳର କରାଳରୂପ, ଲ୍ୟାଣ୍ଡସ୍ଲାଇଡ୍, ବରଫପାତ, ବ୍ରହ୍ମପର୍ବତ ଗ୍ଲେସିୟର ପାଣି ସହ ଅନ୍ୟାନ୍ୟ ସମସ୍ୟା ବାଟ ଓଗାଳିଥିଲା । ପ୍ରଶାସନ ପକ୍ଷରୁ ରାସ୍ତା ସଫା ପରେ ଯିବାଆସିବା ସ୍ୱାଭାବିକ ହୋଇଥିଲା । ଗୁଞ୍ଜିରେ ରାତିର ତାପମାତ୍ର ଶୂନରୁ ତଳକୁ ଚାଲିଯାଇଥିଲା । ପରଦିନ ବାଇକ୍ରେ ବାହାରିଥିଲେ ୩୦ କିମି ଦୂର ଆଦି କୈଳାସର ବେସ୍ କ୍ୟାମ୍ପ୍ ଜଲିକମ୍କୁ । ଏହାର ଉଚ୍ଚତା ଥିଲା ୧୬ ହଜାର ୫୦୦ ଫୁଟ । ଆଇଟିବିପି ଯବାନମାନେ ପାହାଡ଼ଚଢା ଲାଗି ବିଭିନ୍ନ ଟିପ୍ସ ଦେଇଥିଲେ । ସାଙ୍ଗରେ ପିଇବା ପାଣି, ରେନ୍କୋଟ୍, ଶୁଖିଲା ଖାଦ୍ୟ ନେବା, ଅଳ୍ପ ଅଳ୍ପ ପାଣି ପିଇବା, ରାସ୍ତାରେ ବିଲକୁଲ୍ ନଖାଇବାକୁ ପରାମର୍ଶ ଦେଇଥିଲେ । ସ୍ୱାସ୍ଥ୍ୟ ସମସ୍ୟା ଥିଲେ ନଯିବାକୁ କହିଥିଲେ । ୬ ଜଣିଆ ଟିମ୍ କରି ଗୋଟିଏ ଅକ୍ସିଜେନ୍ ସିଲିଣ୍ଡର ଦେଇଥିଲେ ।
ଟିମ୍ରେ ୪ ଜଣ ବୟସ୍କ ଥିବାରୁ ସେମାନେ ଅମ୍ଳଜାନ ସିଲିଣ୍ଡର ନେଇ ଖଚରରେ ପାହାଡ଼ ଚଢା ଆରମ୍ଭ କରିଥିଲେ । ବେସ୍କ୍ୟାମ୍ପ୍ରେ ବାଇକ୍ ରଖି ସକାଳ ସାଢେ ୮ରେ ଆରମ୍ଭ ହୋଇଥିଲା ଟ୍ରେକିଂ । ଲଣ୍ଡାପାହାଡ଼, ପଥର ଭିତର ଦେଇ ତିଆରି ହୋଇଥିବା ପାଦଚଲା ରାସ୍ତାରେ ଅଢେଇ କିମି ଚଢିବା ପରେ ପଡ଼ିଥିଲା ପାର୍ବତୀ ମାନସରୋବର । ସେଠାରେ ରହିଛି ଶିବପାର୍ବତୀଙ୍କ ମନ୍ଦିର । ପାର୍ବତୀ ମାନସରୋବରରୁ ଗୌରୀକୁଣ୍ଡର ଦୂରତା ପ୍ରାୟ ୨ କିଲୋମିଟର । ଉଚ୍ଚତା ୨୨ ହଜାର ୫୦୦ ଫୁଟ । ଗୌରୀକୁଣ୍ଡ ହେଉଛି ଆଦି କୈଳାସର ପାଦଦେଶ । ସେଠାରୁ ମହାଦେବଙ୍କ ବାସସ୍ଥାନର ମନୋରମ ଦୃଶ୍ୟ ଅତୀବ ମନୋରମ । ଗୌରୀକୁଣ୍ଡ(ତାପମାତ୍ରା ୧୦ଡିଗ୍ରୀ ଥିଲା)ରେ ପହଞ୍ଚିବା ପରେ ଉଭୟ ପ୍ରାର୍ଥନା କରିଥିଲେ । ବାଧାବିଘ୍ନ ସତ୍ତେ୍ୱ ପହଞ୍ଚିଥିବାରୁ ଭୂମିଷ୍ଠ ପ୍ରମାଣ କରିଥିଲେ । ତା’ ପରେ ଆରମ୍ଭ ହୋଇଥିଲା ଲେଉଟାଣି ଯାତ୍ରା।