ନୂଆଦିଲ୍ଲୀ,୩୦।୧: ଆଦାନୀ ଗ୍ରୁପ୍ର ପ୍ରମୁଖ କମ୍ପାନୀ ଆଦାନୀ ଏଣ୍ଟରପ୍ରାଇଜସ୍ ଗୁରୁବାର ୩୦ ଜାନୁଆରୀରେ ଚାଲୁ ଆର୍ଥିକ ବର୍ଷ ପାଇଁ ଡିସେମ୍ବରର ଫଳାଫଳ ଜାରି କରିଛି। ଡିସେମ୍ବର ୨୦୨୪ରେ ଶେଷ ତୃତୀୟ ତ୍ରୟମାସିକରେ କମ୍ପାନୀର ଲାଭ ପ୍ରାୟ ଶେଷ ହୋଇଯାଇଛି। ଆଦାନୀ ଏଣ୍ଟରପ୍ରାଇଜେସ୍କୁ ଡିସେମ୍ବର ତ୍ରୟମାସିକରେ ୫୮ କୋଟି ନେଟ୍ ପ୍ରଫିଟ୍ ହୋଇଛି। ଗତ ବର୍ଷ ଏହି ତ୍ରୟମାସିକରେ କମ୍ପାନୀର ନେଟ୍ ପ୍ରଫିଟ୍ ୧,୮୮୮ କୋଟି ଥିଲା। ଅର୍ଥାତ ବାର୍ଷିକ ଆଧାରରେ କମ୍ପାନୀର ପ୍ରଫିଟ୍ରେ ୯୭% ହ୍ରାସ ଘଟିଛି। ସେଭଳି ଡିସେମ୍ବର ତ୍ରୟମାସିକରେ କମ୍ପାନୀର ରେଭିନ୍ୟୁ ୯ ପ୍ରତିଶତ ହ୍ରାସ ପାଇ ୨୨,୮୪୮ କୋଟି ଟଙ୍କା ହୋଇଯାଇଛି। ଗତ ବର୍ଷ ଏହି ତ୍ରୟମାସିକରେ ଏହା ୨୫,୦୫୦ କୋଟି ଟଙ୍କା ଥିଲା।
କମ୍ପାନୀ ୩ଳ୦୭୧ କୋଟିର EBITDA ରେକର୍ଡ କରିଛି, ଯାହାକି ବାର୍ଷିକ ଆଧାରରେ ୫% କମ୍। ଗତ ଆର୍ଥିକ ବର୍ଷର ଡିସେମ୍ବର ତ୍ରୟମାସିକରେ ଏହା ୩,୨୨୭ କୋଟି ଟଙ୍କା ଥିଲା। ତୃତୀୟ ତ୍ରୟମାସିକରେ ଅନ୍ୟ ଆୟ ବାର୍ଷିକ ଆଧାରରେ ୩୩% ବଢି ୬୫୨ କୋଟି ହୋଇଯାଇଛି, ଯାହାକି ଗତ ବର୍ଷର ସମାନ ଅବଧିରେ ୪୯୦ କୋଟି ଥିଲା। ଏହା ଭିତରେ ମୋଟ ଖର୍ଚ୍ଚରେ ପ୍ରତ୍ୟେକ ବର୍ଷ ୧% ମାମୁଲି ହ୍ରାସ ଘଟିଛି, ଯାହାକି ଅକ୍ଟୋବର-ଡିସେମ୍ବର ତ୍ରୟମାସିକରେ ୨୨,୯୨୫ କୋଟି ଟଙ୍କାରେ ଆସିଯାଇଛି, ସେଭଳି ଗତ ଆର୍ଥିକ ବର୍ଷରେ ଏହି ସମୟରେ ଏହା ୨୩,୧୮୦ କୋଟି ଥିଲା।
ଆଦାନୀ ଏଣ୍ଟରପ୍ରାଇଜେସ୍ର ଷ୍ଟକ୍ ଆଜି ଗୁରୁବାର ୫% ହ୍ରାସ ପାଇ ନିଜର ନିମ୍ନ ସ୍ତର ୨୨୦୨ ରେ ଆସିଯାଇଛି। ଆଦାନୀ ଗ୍ରୁପ୍ର ସେୟାର ଗତ ୧ ବର୍ଷରେ ୨୫% ଓ ଜାନୁଆରୀ ୨୦୨୫ ରେ ଏପର୍ଯ୍ୟନ୍ତ ୧୨ %ରୁ ଅଧିକ ହ୍ରାସ ପାଇଛି। ସେଭଳି ଷ୍ଟକ୍ ଏବେ ଜୁନ୍ ୨୦୨୪ ରେ ନିଜର ୫୨ ସପ୍ତାହର ଉଚ୍ଚତମ ସ୍ତର ୩,୭୪୩.୦୦ ରୁ ୪୧% ଦୂର ରହିଛି। ଏହା ଭିତରେ ଏହା ନଭେମ୍ବର ୨୦୨୪ ରେ ରେକର୍ଡ କରିଥିବା ନିଜର ୫୨ ସପ୍ତାହର ନିମ୍ନତମ ସ୍ତର ୨,୦୩୦ ରୁ ୮.୫% ବଢି ଯାଇଛି।
