ଭୁବନେଶ୍ୱର, ୨୦/୦୪: ହତ୍ୟା କରି ଜଣେ ବ୍ୟକ୍ତିକୁ ଜଙ୍ଗଲ ମଝିରେ ଫିଙ୍ଗିଦେବା ଘଟଣାରେ ହତ୍ୟାକାରୀକୁ ଗିରଫ କଲା ଯଶୀପୁର ପୋଲିସ । ବୁଧବାର ସକାଳେ ମୟୁରଭଞ୍ଜ ଜିଲ୍ଲା ଯଶିପୁର ଥାନା ଜାମଦା ଗାଁ ଜିଆଣୀ ସାହିର ଶାଳ ଜଙ୍ଗଲ ମଝିରେ ଧୋବାଡିହା ଗାଁର ମାଠାଇ ହୋଙ୍କ ମୃତଦେହ ଉଦ୍ଧାର ହୋଇଥିଲା । ଯାହାର ତଦନ୍ତ କରି ହତ୍ୟାକାରୀକୁ ଧରିବାରେ ସଫଳ ହୋଇଛି ପୋଲିସ । ପୂର୍ବ ଶତ୍ରୁତାକୁ ନେଇ ହତ୍ୟା କରିଥିବା ଅଭିଯୁକ୍ତ ସ୍ୱୀକାର କରିଛି ।ଆଜି ତାକୁ କୋର୍ଟ ଚାଲାଣ କରିବ ପୋଲିସ ।
ସୂଚନା ମୁତାବକ, ମଙ୍ଗଳବାର ରାତିରେ ଜାମଦା ଗାଁ ଜିଆଣୀ ସାହିକୁ ମଦ ପିଇବା ପାଇଁ ଯାଇଥିଲେ ମାଠାଇ ହୋ । ବିଳମ୍ବିତ ରାତି ଯାଏଁ ସେ ଘରକୁ ଫେରିନଥିଲେ । ପରିବାର ଲୋକ ବହୁ ଖୋଜାଖୋଜି କରିଥିଲେ ମଧ୍ୟ ତାଙ୍କର କୌଣସି ପତ୍ତା ମିଳିନଥିଲା । ଶେଷରେ ମାଠାଇଙ୍କ ଭଉଣୀ ବହୁ ଖୋଜାଖୋଜି କରିବା ପରେ ଜଙ୍ଗଲରେ ମୃତଦେହ ପଡିଥିବାର ଖବର ପାଇଥିଲେ । ଏହାପରେ ତୁରନ୍ତ ସ୍ଥାନୀୟ ପୋଲିସକୁ ଖବର ଦେଇଥିଲେ । ଖବର ପାଇ ଯଶୀପୁର ପୋଲିସ ଏବଂ ସାଇଣ୍ଟିଫିକ୍ ଟିମ୍ ଘଟଣାସ୍ଥଳରେ ପହଞ୍ଚିଥିଲା । ଏନେଇ ପରିବାର ପକ୍ଷରୁ ହତ୍ୟା ଅଭିଯୋଗ କରାଯାଇଥିଲା । ଏହା ପରେ ଘଟଣାର ତଦନ୍ତ ଆରମ୍ଭ କରିଥିଲା ପୋଲସି । ତଦନ୍ତ କରି ହତ୍ୟାକାରୀକୁ ଧରିବାରେ ସଫଳ ହୋଇଛି ପୋଲିସ । ପୂର୍ବ ଶତ୍ରୁତାକୁ କେନ୍ଦ୍ରକରି ଜିଆଣୀ ସାହିର ଲକ୍ଷ୍ମୀଧର ହୋ ମାଠାଇ ହୋକୁ ତଣ୍ଟି ଚିପି ଏକ ପଥରରେ ଛେଚି ହତ୍ୟା କରିଛି । ପୋଲିସ ଆଗରେ ନିଜ ଦୋଷ ସ୍ଵୀକାର କରିଛି ଅଭିଯୁକ୍ତ ଲକ୍ଷ୍ମୀଧର ହୋ । ଆଜି ତାକୁ କୋର୍ଟ ଚାଲାଣ କରିବ ପୋଲିସ ।
