ନୂଆଦିଲ୍ଲୀ: ରାଜଧାନୀ ଦିଲ୍ଲୀର ସରକାରୀ କୋଠା ଗୁଡ଼ିକ ଉଡାଇ ଦେବାକୁ ଗୋଟିଏ ପରେ ଗୋଟିଏ ଧମକ ମିଳୁଛି । ଦିଲ୍ଲୀର ସ୍କୁଲ ପରେ ଏବେ ଗୃହ ମନ୍ତ୍ରଣାଳୟ ଭବନକୁ ଉଡାଇ ଦେବାକୁ ବୋମା ଧମକ ମିଳିଛି । ଗୃହ ମନ୍ତ୍ରଣାଳୟର ଜଣେ ଅଧିକାରୀ ଇମେଲରେ ଏହି ଧମକ ପାଇଛନ୍ତି । ଏ ସମ୍ପର୍କରେ ସୂଚନା ପାଇବା ମାତ୍ରେ ସୁରକ୍ଷା କର୍ମୀଙ୍କ ମଧ୍ୟରେ ଆତଙ୍କ ଖେଳିଯାଇଛି । ସୂଚନା ଅନୁଯାୟୀ, ଏହି ଇମେଲ୍ ଆଜି( ବୁଧବାର) ଅପରାହ୍ନ ୩ ଟା ସମୟରେ ଆସିଛି । ଏହି ଧମକକୁ ତୁରନ୍ତ ପୋଲିସ କଣ୍ଟ୍ରୋଲ ରୁମ୍ ଏବଂ ସୁରକ୍ଷା କର୍ମୀଙ୍କୁ ଅବଗତ କରାଯାଇଥିଲା । ଏହା ପରେ ଗୃହ ମନ୍ତ୍ରଣାଳୟର କୋଠା ଯାଞ୍ଚ କରାଯାଇଥିଲା । ପୋଲିସ ବିଶେଷଜ୍ଞମାନେ ଇମେଲର ଅନୁସନ୍ଧାନ କରିଛନ୍ତି।

ଦିଲ୍ଲୀ ଅଗ୍ନିଶମ ସେବା ଅନୁଯାୟୀ, ନୂଆଦିଲ୍ଲୀ ଅଞ୍ଚଳର ଉତ୍ତର ବ୍ଲକରେ ଅବସ୍ଥିତ ପୋଲିସ କଣ୍ଟ୍ରୋଲ ରୁମକୁ ଏକ ବୋମା ବିପଦ ଥିବା ଏକ ମେଲ ଆସିଥିଲା । ଦୁଇଟି ଫାୟାର ଇଞ୍ଜିନ୍ ଘଟଣାସ୍ଥଳକୁ ପଠାଯାଇଛି । ବିଭାଗର ଜଣେ ଅଧିକାରୀ କହିଛନ୍ତି ଯେ, ପୂରା କୋଠାକୁ ପୁଙ୍ଖାନୁପୁଙ୍ଖ ଯାଞ୍ଚ କରାଯାଇଛି । ହେଲେ ସନ୍ଧାନ ସମୟରେ କୌଣସି ସନ୍ଦେହଜନକ ଜିନିଷ ମିଳି ନାହିଁ । 

ସୂଚନାଥାଉକି, ଯେ ନିକଟରେ ଦିଲ୍ଲୀ ଏବଂ ନୋଏଡାର ୧୫୦ ରୁ ଅଧିକ ବିଦ୍ୟାଳୟକୁ ବୋମା ଧମକ ଆସିଥିଲା । ଏହି ଧମକ ଇମେଲ ମାଧ୍ୟମରେ ମଧ୍ୟ ମିଳିଥିଲା ।  ପୋଲିସର ଅନୁସନ୍ଧାନରୁ ଜଣାପଡିଛି ଯେ, ଧମକପୂର୍ଣ୍ଣ ଇମେଲର ଆଇପି ଠିକଣା ହଙ୍ଗେରୀର ରାଜଧାନୀ ବୁଦ୍ଧାପେଷ୍ଟରୁ ଆସିଛି । ଏହି ପ୍ରସଙ୍ଗରେ ହଙ୍ଗେରୀ ଅନୁସନ୍ଧାନକାରୀ ସଂସ୍ଥା ସହିତ ଦିଲ୍ଲୀ ପୋଲିସ ଯୋଗାଯୋଗରେ ରହିଛି।