ନୂଆଦିଲ୍ଲୀ: ଆନ୍ଧ୍ରପ୍ରଦେଶରେ ଜଣେ ୨ ବର୍ଷର ଝିଅ ବାର୍ଡ ଫ୍ଲୁରେ ଆକ୍ରାନ୍ତ ହୋଇ ମୃତ୍ୟୁବରଣ କରିଛି । ଏହା ସହ ଦେଶରେ ବାର୍ଡ ଫ୍ଲୁ ଯୋଗୁଁ ମଣିଷ ମୃତ୍ୟୁର ଏହା ଦ୍ବିତୀୟ ଘଟଣା। ପୂର୍ବରୁ ୨୦୨୧ ମସିହାରେ ଜଣେ ବ୍ୟକ୍ତିଙ୍କର ମୃତ୍ୟୁ ଘଟିଥିଲା। ସ୍ବାସ୍ଥ୍ୟ ବିଭାଗ ଅନୁଯାୟୀ, ଝିଅଟି କଞ୍ଚା କୁକୁଡ଼ା ମାଂସ ଖାଇଥିଲା। ଏହି କାରଣରୁ ସେ ବାର୍ଡ ଫ୍ଲୁରେ ସଂକ୍ରମିତ ହୋଇଥିଲା। ଝିଅଟିକୁ ପୂର୍ବରୁ ସାମାନ୍ୟ ଜ୍ବର ହୋଇଥିଲା। ଏହା ପରେ ତାକୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା। କିଛି ଦିନର ଚିକିତ୍ସା ପରେ ତାର ମୃତ୍ୟୁ ହୋଇଥିବା ଜଣାପଡ଼ିଛି।
ବାର୍ଡ ଫ୍ଲୁ ଯୋଗୁଁ ଝିଅଟିର ମୃତ୍ୟୁ ହୋଇଥିବା ନେଇ ପୁଣେର ନ୍ୟାସନାଲ ଇନଷ୍ଟିଚ୍ୟୁଟ୍ ଅଫ୍ ଭାଇରୋଲୋଜିର ବୈଜ୍ଞାନିକମାନେ ନିଶ୍ଚିତ କରିଛନ୍ତି। ଏହି ଝିଅଟିର ନମୂନା NIVକୁ ପଠାଯାଇଥିଲା। ସେପଟେ ଏହି ଭାଇରସ ପରିବାରର ଅନ୍ୟ କୌଣସି ସଦସ୍ୟଙ୍କୁ ସଂକ୍ରମିତ କରିନାହିଁ। ଯଦିଓ ରାଜ୍ୟ ସରକାର ଲୋକଙ୍କୁ ସତର୍କ କରାଇଛନ୍ତି ଏବଂ ସତର୍କତା ଅବଲମ୍ବନ କରିବାକୁ ପରାମର୍ଶ ଦେଇଛନ୍ତି, କିନ୍ତୁ ଏହି ଘଟଣା ପରେ କୁକୁଡ଼ା ମାଂସ ଖାଇବା ଉପରେ ପ୍ରଶ୍ନ ଉଠିଛି।
ବାର୍ଡ ଫ୍ଲୁ ସଂପର୍କରେ ରାଜସ୍ଥାନର ପ୍ରାଣୀ ବିଜ୍ଞାନ ବିଭାଗର ଡାକ୍ତର ଏନଆର ରାୱତ ଜାତୀୟ ଗଣମାଧ୍ୟମକୁ ପ୍ରତିକ୍ରିୟା ଦେଇଛନ୍ତି । ସେ କହିଛନ୍ତି, ବାର୍ଡ ଫ୍ଲୁ ଭୂତାଣୁ ଜନିତ ସଂକ୍ରମଣ। ଏହା ପକ୍ଷୀମାନଙ୍କଠାରେ, ମୁଖ୍ୟତଃ କୁକୁଡ଼ାଠାରେ ଦେଖାଯାଏ। କିନ୍ତୁ ଏହା ଅନ୍ୟ ପ୍ରାଣୀ ଏବଂ ମଣିଷମାନଙ୍କୁ ମଧ୍ୟ ବ୍ୟାପିପାରେ। ଗତ କିଛି ବର୍ଷ ଧରି, ଗାଈ ଏବଂ ବିଲେଇ ସମେତ ଅନେକ ପ୍ରାଣୀ ମଧ୍ୟ ଏହାର ଶିକାର ହୋଇଛନ୍ତି। ମଣିଷମାନଙ୍କ ଠାରେ ମଧ୍ୟ ଏହି ଭାଇରସର ମାମଲା ବୃଦ୍ଧି ପାଉଛି । ଭାଇରସରେ ହେଉଥିବା ପରିବର୍ତ୍ତନ ଯୋଗୁଁ ଏହା ଘଟୁଛି।
ଆମେରିକାରୁ ଭାରତ ପର୍ଯ୍ୟନ୍ତ ବାର୍ଡ ଫ୍ଲୁର ମାମଲା ବୃଦ୍ଧି ପାଉଛି । ଡାକ୍ତର ରାୱତ କହିଛନ୍ତି ଯେ, ବାର୍ଡ ଫ୍ଲୁ ସଂକ୍ରମଣ ସଂକ୍ରମିତ ପକ୍ଷୀ କିମ୍ବା ପଶୁଙ୍କଠାରୁ ମଣିଷକୁ ବ୍ୟାପିଥାଏ। ତଥାପି ଏହା ଜଣେ ବ୍ୟକ୍ତିଠାରୁ ଅନ୍ୟ ଜଣଙ୍କୁ ସଂକ୍ରମଣ ହେବା ଘଟଣା ବହୁତ କମ୍। ସଂକ୍ରମିତ ପକ୍ଷୀ ଠାରୁ ମଣିଷ ଶରୀରକୁ ଏହି ଭାଇରସ୍ ପହଞ୍ଚିଥାଏ । ଯଦି ଜଣେ ବ୍ୟକ୍ତି ସଂକ୍ରମିତ ପଶୁ କିମ୍ବା ପକ୍ଷୀଙ୍କ ସଂସ୍ପର୍ଶରେ ଆସନ୍ତି, ତେବେ ତାଙ୍କ ଶରୀରରେ ଭାଇରସ ପ୍ରବେଶ କରିବାର ଆଶଙ୍କା ବହୁତ ବଢ଼ିଯାଏ। ଏହି ଭାଇରସ କୁକୁଡ଼ା ଦ୍ବାରା ମଧ୍ୟ ସଂକ୍ରମିତ ହୋଇପାରେ।
ଡାକ୍ତର ରାୱତ କହିଛନ୍ତି ଯେ, କୁକୁଡ଼ା ମାଂସ ଖାଇବା ଦ୍ବାରା ବାର୍ଡ ଫ୍ଲୁ ହେବାର ଆଶଙ୍କା ଥାଏ । କିନ୍ତୁ ଏହା କେବଳ ସେତେବେଳେ ହୁଏ ଯେତେବେଳେ କୁକୁଡ଼ା ଠିକ୍ ଭାବରେ ରନ୍ଧା ହୋଇନଥାଏ । ଯଦି କୁକୁଡ଼ାକୁ ସଠିକ୍ ଢ଼ଙ୍ଗରେ ରୋଷେଇ କରାଯାଏ ତେବେ ଭୂତାଣୁ ବ୍ୟାପିବାର କୌଣସି ଆଶଙ୍କା ନଥାଏ । କିନ୍ତୁ ଯେଉଁ ଅଞ୍ଚଳରେ ଭାଇରସ୍ ବ୍ୟାପିଛି ସେହି ଅଞ୍ଚଳର ଲୋକମାନେ କିଛି ସମୟ ପାଇଁ କୁକୁଡ଼ା ମାଂସ ନଖାଇବା ଭଲ ବୋଲି ଡାକ୍ତର କହିଛନ୍ତି ।
