ପୁନେ: ନ୍ୟୁଜିଲାଣ୍ଡ ବିପକ୍ଷରେ ଦକ୍ଷିଣ ଆଫ୍ରିକାର ବିଶାଳ ବିଜୟ । ଡି’କକ୍ ଓ ଭାନ ଡର ଡସେନଙ୍କ ଦମଦାର ଶତକ ପରେ ବୋଲରଙ୍କ ଘାତକ ବୋଲିଂ ବଳରେ ଦକ୍ଷିଣ ଆଫ୍ରିକା, ନ୍ୟୁଜିଲାଣ୍ଡକୁ ୧୯୦ ରନରେ ପରାସ୍ତ କରିଛି । ଏହି ବିଜୟ ସହ ଦକ୍ଷିଣ ଆଫ୍ରିକା ୧୨ ପଏଣ୍ଟ ସହ ଉନ୍ନତ ରନ ରେଟ୍ ଆଧାରରେ ପଏଣ୍ଟ ତାଲିକାର ଶୀର୍ଷକୁ ଉଠିଛି । ଏହି ପରାଜୟ ସହ ନ୍ୟୁଜିଲାଣ୍ଡ ଚତୁର୍ଥ ସ୍ଥାନକୁ ଖସି ଆସିଛି । ନ୍ୟୁଜିଲାଣ୍ଡ ଦଳର ପରାଜୟ ଯୋଗୁଁ ଏବେ ସେମି ଫାଇନାଲ୍ ଦୌଡ଼ ରୋଚକପୂର୍ଣ୍ଣ ସ୍ଥିତିରେ ପହଞ୍ଚିଯାଇଛି ।
ପ୍ରଥମେ ବ୍ୟାଟିଂ କରି ଦକ୍ଷିଣ ଆଫ୍ରିକା ଡି କକଙ୍କ ୧୧୪ ରନ ଓ ଭାନ ଡର ଡସେନଙ୍କ ୧୩୩ ରନର ଶତକୀୟ ଇନିଂସ ସହ ନିର୍ଦ୍ଧାରିତ ଓଭରରେ ୪ ଓ୍ଵିକେଟ୍ ହରାଇ ୩୫୭ରନର ବିଶାଳ ସ୍କୋର କରିଥିଲା । ଜବାବରେ ନ୍ୟୁଜିଲାଣ୍ଡ ଦକ୍ଷିଣ ଆଫ୍ରିକା ବୋଲରଙ୍କ ଘାତକ ବୋଲିଂର ମୁକାବିଲା କରିପାରି ନଥିଲା । ୩୫.୩ ଓଭରରେ ୧୬୭ ରନରେ ଅଲଆଉଟ୍ ହୋଇଛି କିଓ୍ବି ଦଳ । ବୋଲିଂରେ କେଶବ ମହାରାଜ ୪୬ ରନ ଦେଇ ୪ ଓ ମାର୍କୋ ଜନସେନ ୩୧ ରନ ଦେଇ ୩ଟି ଓ୍ଵିକେଟ୍ ଅକ୍ତିକାର କରିଛନ୍ତି ।
ନ୍ୟୁଜିଲାଣ୍ଡର ବ୍ୟାଟିଂ କଥା କହିଲେ ଆଜିର ମ୍ୟାଚରେ ଗ୍ଲେନ ଫିଲିପ୍ସ ସର୍ବାଧିକ ୬୦ ରନ୍ କରିଛନ୍ତି । ତାଙ୍କ ପରେ ଓ୍ବିଲ ୟଙ୍ଗ ୩୩ ଏବଂ ଡାରିଲ ମିଚେଲ ୨୪ ରନ୍ କରିଛନ୍ତି । ଏହି ୩ ପ୍ଲେୟରଙ୍କ ପରେ ଆଉ କେହି ଦୁଇ ଅଙ୍କ ଛୁଇଁପାରି ନାହାନ୍ତି । ଡେବନ କନଓ୍ବେ ୨ ରନ୍, ଟମ ଲାଥମ ୪, ରଚିନ ରବିନ୍ଦ୍ର ୯, ମିଚେଲ୍ ସାଣ୍ଟନର ୭ ଏବଂ ଟିମ୍ ସାଉଥି ୭ ରନ୍ କରିବାରେ ସଫଳ ହେଉଛି । ସେପଟେ ଟ୍ରେଣ୍ଟ ବୋଲ୍ଟ ୯ ରନ୍ କରି ଆଉଟ ହୋଇଛନ୍ତି ।
