କଲମ୍ବୋ, ୧୭/୦୯: ନ୍ୟୁଜିଲାଣ୍ଡ ବିପକ୍ଷ ଘରୋଇ  ଟେଷ୍ଟ ସିରିଜ ପାଇଁ ଆଜି  ଶ୍ରୀଲଙ୍କା ଦଳ ଘୋଷଣା  ହୋଇଛି । ଅଭିଜ୍ଞ ବ୍ୟାଟର  ଓସାଡ଼ା ଫର୍ଣ୍ଣାଣ୍ଡୋ ଦୀର୍ଘ  ୧୮ମାସ ପରେ ଦଳକୁ  ଫେରିଛନ୍ତି । ସେ ଦକ୍ଷିଣ ଆଫ୍ରିକା ଗସ୍ତରେ ଥିବା ଶ୍ରୀଲଙ୍କା ଏ’ ଦଳ ସଦସ୍ୟ  ରହିଥିଲେ । ପ୍ରଥମ ଅନଫିସିଆଲ୍‌ ଟେଷ୍ଟରେ ଯଥାକ୍ରମେ ୧୨୨, ୮୦ରନ୍‌ର  ଜବରଦସ୍ତ ଇନିଂସ୍‌ ଖେଳି ଚୟନକର୍ତ୍ତାଙ୍କ ଦୃଷ୍ଟି ଆକର୍ଷଣ କରିଥିଲେ । 

ଅନ୍ୟ ପଟରେ ଗତ ଇଂଲଣ୍ଡ ଗସ୍ତରେ ବିଫଳ ହୋଇଥିବା ଯୁବ ଓପନର ନିଶାନ  ମଦୁଷ୍କା ବାଦ୍‌ ପଡ଼ିଛନ୍ତି । ସେ ୨ଟି ଟେଷ୍ଟ ଖେଳି ମାତ୍ର ୨୪ରନ୍‌ କରିପାରିଥିଲେ ।  ୱିକେଟ୍‌ କିପର ବ୍ୟାଟର ସଦିରା ସମରବିକ୍ରମାଙ୍କୁ ଡାକରା ମିଳିଛି । ଧନଞ୍ଜୟ  ଡି’ ସିଲ୍‌ଭା ଦଳର ନେତୃତ୍ୱ ନେବେ । ଆସନ୍ତା ୧୮ ତାରିଖରୁ ଶ୍ରୀଲଙ୍କା ଓ  ନ୍ୟୁଜିଲାଣ୍ଡ ମଧ୍ୟରେ ପ୍ରଥମ ଟେଷ୍ଟ ଆରମ୍ଭ ହେବ । ଦ୍ୱିତୀୟ ଟେଷ୍ଟ ୨୬ରୁ ୩୦  ତାରିଖ ପର୍ଯ୍ୟନ୍ତ ଖେଳାଯିବ । ଉଭୟ ମ୍ୟାଚ୍‌ ଗଲ୍‌ ଠାରେ ଅନୁଷ୍ଠିତ ହେବ । 

ଶ୍ରୀଲଙ୍କା ଦଳ: ଧନଞ୍ଜୟ ଡି’ ସିଲ୍‌ଭା (ଅଧିନାୟକ), ଦିମୁଥ କରୁଣାରତ୍ନେ,  ପଥୁମ ନିଶଙ୍କା, କୁଶଲ ମେଣ୍ଡିସ, ଆଞ୍ଜେଲୋ ମାଥ୍ୟୁସ, ଦିନେଶ ଚାନ୍ଦିମଲ,  କାମିଣ୍ଡୁ ମେଣ୍ଡିସ, ସଦିରା ସମରବିକ୍ରମା, ଓସାଡ଼ା ଫର୍ଣ୍ଣାଣ୍ଡୋ, ଅସିଥା ଫର୍ଣ୍ଣାଣ୍ଡୋ,  ବିଶ୍ୱ ଫର୍ଣ୍ଣାଣ୍ଡୋ, ଲାହିରୁ କୁମାରା, ପ୍ରବଥ ଜୟସୂରିୟା, ରମେଶ ମେଣ୍ଡିସ,  ଜେଫରେ ଭାଣ୍ଡରସେ, ମିଲନ ରତ୍‌ନାୟକେ ।