ନୂଆଦିଲ୍ଲୀ,୧୭/୦୯: ଚୀନରେ ଚାଲିଥିବା ପୁରୁଷ ହକି ଏସିଆନ ଚାମ୍ପିଅନ୍ସ ଟ୍ରଫିର ସେମି ଫାଇନାଲରେ ଭାରତ ୪-୧ ଗୋଲରେ ଦକ୍ଷିଣ କୋରିଆକୁ ପରାଜିତ କରି ଫାଇନାଲରେ ପ୍ରବେଶ କରିଛି । ସେମିତି ପ୍ରଥମ ସେମିରେ ଆୟୋଜକ ଚୀନ ୧-୧ (୨-୦) ପାକିସ୍ତାନକୁ ସୁଟ୍ ଆଉଟ୍ କରି ଫାଇନାଲକୁ ଉନ୍ନୀତ ହୋଇଛି । ମଙ୍ଗଳବାର ଭାରତ ଟାଇଟଲ ଲଢ଼େଇରେ ଚୀନକୁ ଭେଟିବ । ସେମିତି ତୃତୀୟ ସ୍ଥାନ ପାଇଁ ପାକିସ୍ତାନ ଦଳ ଦକ୍ଷିଣ କୋରିଆକୁ ସାମ୍ନା କରିବ।
ସେମି ଫାଇନାଲ ପର୍ଯ୍ୟନ୍ତ ଭାରତ ଗୋଟିଏ ବି ମ୍ୟାଚ୍ ହାତଛଡ଼ା କରି ନାହିଁ । ସବୁ ମ୍ୟାଚ୍ରେ ବିଜୟୀ ହୋଇଛି । କୋରିଆ ବିପକ୍ଷରେ ଦଳ ଆଜି ବେଶ ଉନ୍ନତ ପ୍ରଦର୍ଶନ କରିଥିଲା । ପ୍ରଥମ କ୍ୱାର୍ଟରରେ (୧୩ ମିନିଟ) ଉତ୍ତମ ସିଂ ଆକର୍ଷଣୀୟ ଫିଲ୍ଡ ଗୋଲ୍ ସହ ଦଳର ଗୋଲ ଖାତା ଖୋଲିଥିଲେ ।
ପୁଣି ଦ୍ୱିତୀୟ କ୍ୱାର୍ଟରରେ ଅଧିନାୟକ ତଥା ଡ୍ରାଗ୍ ଫ୍ଲିକର ସ୍ପେଶାଲିଷ୍ଟ୍ ହର୍ମନପ୍ରୀତ ସିଂ (୧୯ ମିନିଟ) ଏକ ପେନାଲ୍ଟି କର୍ଣ୍ଣରକୁ ଗୋଲ୍ ରୂପ ଦେଇ ଦଳକୁ ୨-୦ରେ ଅଗ୍ରଣୀ କରାଇଥିଲେ । ପ୍ରଥମାର୍ଦ୍ଧରେ କୋରିଆ ଗୋଲ ଖାତା ଖୋଲିପାରି ନଥିଲା । ତୃତୀୟ କ୍ୱାର୍ଟର ଆରମ୍ଭରୁ ଖେଳ ସଂଘର୍ଷପୂର୍ଣ୍ଣ ହୋଇଥିଲା । ୩୨ ମିନିଟରେ ଜର୍ମନପ୍ରୀତ ସିଂ ଏକ ଫିଲ୍ଡ ଗୋଲ୍ ଦେଇଥିଲେ । ଏହାର ଗୋଟିଏ ମିନିଟ୍ ପରେ (୩୩ ମିନିଟ, ୟାଙ୍ଗ୍) ଦକ୍ଷିଣ କୋରିଆ ପ୍ରଥମ ଗୋଲ୍ ଦେଇ ସ୍ଥିତି ୩-୧ କରିଥିଲା ।
କ୍ୱାର୍ଟରର ପରବର୍ତ୍ତୀ ସମୟ ଖେଳ ପ୍ରତିଦ୍ୱନ୍ଦ୍ୱିତାପୂର୍ଣ୍ଣ ରହିଥିଲା । ମାତ୍ର ଶେଷ ମିନିଟ୍ରେ (୪୫ ମିନିଟ) ଭାରତକୁ ମିଳିଥିବା ପେନାଲ୍ଟି କର୍ଣ୍ଣରରୁ ଗୋଲ ମିଳିଥିଲା । ହର୍ମନପ୍ରୀତ ଏହି ଗୋଲ୍ କରିଥିଲେ । ଏହା ତାଙ୍କର ଦ୍ୱିତୀୟ ଗୋଲ୍ ଥିଲା ।
ଅନ୍ତିମ କ୍ୱାର୍ଟର ଖେଳ ଗୋଲ ଶୂନ୍ୟ ରହିଥିଲା । ଦକ୍ଷିଣ କୋରିଆ ମ୍ୟାଚ୍କୁ ପ୍ରତ୍ୟାବର୍ତ୍ତନ କରିବା ନେଇ ପ୍ରୟାସ କରିଥିଲା । ଭାରତ ରକ୍ଷଣାତ୍ମକ ପ୍ରଦର୍ଶନ ସହ ସୁଯୋଗ ଅନୁସାରେ ଆକ୍ରମଣ କରିଥିଲା । ଏଭଳି ଆକ୍ରମଣ ଓ ପ୍ରତି ଆକ୍ରମଣ ମଧ୍ୟରେ ଏହି ଭାଗ ଶେଷ ହୋଇଥିଲା । ୪-୧ ଗୋଲରେ ଅଗ୍ରଣୀ ସହ ଶେଷରେ ଭାରତ ମ୍ୟାଚ୍ ଜିତି ନେଇଥିଲା ।
ପ୍ରଥମ ସେମିରେ ଚୀନ ଘଟାଇଥିଲା ବିପର୍ଯ୍ୟୟ । ଶକ୍ତିଶାଳୀ ପାକିସ୍ତାନ ସହ ପ୍ରଥମେ ମ୍ୟାଚ୍ ୧-୧ ଗୋଲରେ ଅମୀମାଂସିତ ରଖିଥିଲା । ଏହାପରେ ପେନାଲ୍ଟି ସୁଟ୍ ଆଉଟ୍ରେ ୨-୦ ଗୋଲରେ ବିଜୟୀ ହୋଇ ପାକିସ୍ତାନକୁ ବିଦା କରିଥିଲା । ପ୍ରଥମ ଥର ଚୀନ ଟୁର୍ଣ୍ଣାମେଣ୍ଟର ଫାଇନାଲରେ ପ୍ରବେଶ କରିଛି । ପୂର୍ବରୁ ୨୦୧୨ ଓ ୨୦୧୩ରେ ଚତୁର୍ଥ ସ୍ଥାନ ହାସଲ କରିଥିଲା ।
