ପାଟନା, ୨୭/୦୯: ଲୋକ ଜନଶକ୍ତି ପାର୍ଟି (ଏଲଜେପି) ନେତାଙ୍କୁ ସ୍ପଷ୍ଟ ଦିବାଲୋକରେ ଗୁଳି କରି ହତ୍ୟା କଲେ ଦୁର୍ବୃତ୍ତ । ସେଲୁନ୍ରେ ଥିବା ବେଳେ ଏଲଜେପି ନେତା ଅନଓ୍ବର ଖାନଙ୍କୁ ଦୁର୍ବୁତ୍ତ ଗୁଳି କରି ହତ୍ୟା କରିଥିବା ଜଣାପଡ଼ିଛି । ବିହାରର ଗୟାରେ ଅନଓ୍ବର ଖାନ ଏକ ସେଲୁନ୍ରେ ଦାଢ଼ି କାଟୁଥିବା ବେଳେ ୩ ଜଣ ଦୁର୍ବୃତ୍ତ ବାଇକ୍ରେ ଆସି ତାଙ୍କ ଉପରେ ଗୁଳିମାଡ଼ କରିଥିଲେ । ଘଟଣାସ୍ଥଳରେ ହିଁ ଟଳିପଡ଼ିଲେ ଅନଓ୍ବର ଅଲି ଖାନ ।
ଏହା ପରେ ସମଗ୍ର ଅଞ୍ଚଳରେ ହଇଚଇ ଖେଳିଯାଇଛି । ଅନଓ୍ବର ଖାନ ଶ୍ରମିକ ସେଲର ଅଧ୍ୟକ୍ଷ ଥିଲେ । ଗୁଳିମାଡ଼ ଘଟଣା ପରେ ସ୍ଥାନୀୟ ଅଞ୍ଚଳରେ ଭୟର ବାତାବରଣ ଖେଳିଯାଇଥିବା ବେଳେ ଦୋକାନ ବଜାର ବନ୍ଦ ହୋଇଯାଇଥିବା ଜଣାପଡ଼ିଛି। ସେପଟେ ଅନଓ୍ବରଙ୍କୁ ନିର୍ମମ ହତ୍ୟା କରାଯିବା ନେଇ ଖବର ପ୍ରଚାର ହେବା ପରେ ତାଙ୍କ ସମର୍ଥକ ଏବଂ ପରିବାର ଲୋକେ ଜାତୀୟ ରାଜପଥ ଅବରୋଧ କରିଛନ୍ତି ।
ଅପରାଧୀମାନଙ୍କୁ ତୁରନ୍ତ ଗିରଫ କରିବାକୁ ଦାବି ହୋଇଥିବା ବେଳେ ମସର୍ଥକଙ୍କ ଗହଣରେ ଆକ୍ରୋଶ ବୃଦ୍ଧି ପାଇବାରେ ଲାଗିଛି । ନେତାଙ୍କୁ ହତ୍ୟା ମାମଲାରେ ଗୟା ଜିଲ୍ଲା ଏସପି ହିମାଂଶୁ କହିଛନ୍ତି ଯେ, ଅନଓ୍ବର ଖାନ ଏକ ସେଲୁନ୍ରେ ଦାଢ଼ି କାଟୁଥିବା ବେଳେ ତାଙ୍କ ଉପରେ ଆଖିବୁଜା ଫାୟାରିଂ କରିଥିଲେ ୩ ଦୁର୍ବୃତ୍ତ । ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଯାଇଛି । ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଯାଇଛି ।ସେପଟେ ଲୋକଙ୍କ ଆକ୍ରୋଶ କମ୍ କରିବା ଲାଗି ପୋଲିସ ବୁଝାସୁଝା ଚଳାଇଛି ।