ନୂଆଦିଲ୍ଲୀ: ବ୍ରିଟେନର ପ୍ରଧାନମନ୍ତ୍ରୀ କୀର ଷ୍ଟାର୍ମର ଆସନ୍ତା ସୋମବାର ଏକ ଐତିହାସିକ ଘୋଷଣା କରିବାକୁ ଯାଉଛନ୍ତି। ଆମେରିକା ପ୍ରଥମ ନୀତି ଯୋଗୁଁ ଗ୍ଲୋବାଲାଇଜେସନର ଯୁଗ ଶେଷ ହୋଇଛି ବୋଲି ଏହି ଘୋଷଣାର ମୂଳ ବିଷୟ ରହିବ। ଏହି ଘୋଷଣା ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଦ୍ୱାରା ଲଗାଯାଇଥିବା ୧୦% ବେସଲାଇନ ଟାରିଫ ଯୋଗୁଁ ବିଶ୍ୱ ବାଣିଜ୍ୟରେ ସୃଷ୍ଟି ହୋଇଥିବା ଅନିଶ୍ଚିତତା ଏବଂ ଉତ୍ତେଜନା ପାଇଁ ଏପରି ଗୋଷଣା କରିବାକୁ ଯାଉଛନ୍ତି। ଷ୍ଟାର୍ମର ୧୯୯୧ରେ ହୋଇଥିବା ସୋଭିଏତ ସଂଘର ପତନ ସହିତ ଆରମ୍ଭ ହୋଇଥିବା ଗ୍ଲୋବାଲାଇଜେସନ ଓ ପାଲଟା ଶୁଳ୍କ ପାଇଁ ଲକ୍ଷ ଲକ୍ଷ ଭୋଟର ନିରାଶ ହେବା ଏବଂ ଏହାର ଲାଭ ସମସ୍ତଙ୍କୁ ସମାନ ଭାବେ ମିଳିନାହିଁ ବୋଲି ବିଷୟରେ ନିଜ ମନ୍ତବ୍ୟ ରଖିବାକୁ ଯାଉଛନ୍ତି ବୋଲି ଟାଇମ୍ସରେ ଏକ ରିପୋର୍ଟ ପ୍ରକାଶିତ ହୋଇଛି।
ଟ୍ରମ୍ପଙ୍କ "ଆମେରିକା ଫାଷ୍ଟ" ନୀତି ଏବଂ ସୁରକ୍ଷାବାଦୀ ଅର୍ଥନୈତିକ ପଦକ୍ଷେପ ବିଶ୍ୱ ଅର୍ଥନୀତିରେ ଏକ ନୂତନ ମୋଡ଼ ଆଣିଛି। ଏହି ପରିପ୍ରେକ୍ଷୀରେ ଷ୍ଟାର୍ମର ଗ୍ଲୋବାଲାଇଜେସନର ପୁରୁଣା ମଡେଲ ଏବେ ଅଚଳ ହୋଇପଡ଼ିଛି ବୋଲି ଘୋଷଣା କରିବାକୁ ଯାଉଛନ୍ତି। ସେ ଟ୍ରମ୍ପଙ୍କ ଅର୍ଥନୈତିକ ଜାତୀୟତାବାଦକୁ ବୁଝିଥିବା କଥା ମଧ୍ୟ ଉଲ୍ଲେଖ କରିବେ ଏବଂ ଏହାର ପ୍ରଭାବରୁ ବ୍ରିଟେନ ନିଜର ଅର୍ଥନୀତିକୁ ସୁରକ୍ଷା ଦେବା ପାଇଁ ନୂତନ ରଣନୀତି ପ୍ରସ୍ତୁତ କରିବାକୁ ଯାଉଛି। ଏହି ଘୋଷଣା ବ୍ରିଟେନର ଅର୍ଥନୈତିକ ନୀତିରେ ଏକ ବଡ଼ ପରିବର୍ତ୍ତନର ସୂଚନା ଦେଉଛି।
ଗ୍ଲୋବାଲାଇଜେସନ ଯୋଗୁଁ ବିଶ୍ୱରେ ବାଣିଜ୍ୟ ଓ ସଂସ୍କୃତିର ବିନିମୟ ବଢ଼ିଥିଲା। କିନ୍ତୁ ବର୍ତ୍ତମାନ ଟ୍ରମ୍ପଙ୍କ ପାଲଟା ଶୁଳ୍କ ପ୍ରଭାବରେ ଅନେକ ଦେଶରେ ଅସମାନତା ଏବଂ ଅସନ୍ତୋଷ ବୃଦ୍ଧି ପାଉଛି। ଷ୍ଟାର୍ମରଙ୍କ ମତରେ, ଏହି ଅସନ୍ତୋଷ ଏବେ ରାଜନୈତିକ ଏବଂ ଅର୍ଥନୈତିକ ନିଷ୍ପତ୍ତିଗୁଡ଼ିକୁ ମଧ୍ୟ ପ୍ରଭାବିତ କରୁଛି। ଟ୍ରମ୍ପଙ୍କ ଟାରିଫ ନୀତି ଯୋଗୁଁ ବ୍ରିଟେନ ଏବଂ ଅନ୍ୟ ଇଉରୋପୀୟ ଦେଶମାନଙ୍କୁ ନିଜ ଅର୍ଥନୀତିକୁ ପୁନର୍ଗଠନ କରିବାକୁ ବାଧ୍ୟ କରିଛି। ଏହି ପରିସ୍ଥିତିରେ ବ୍ରିଟେନ ସରକାର ଘରୋଇ ଉତ୍ପାଦନ ଏବଂ ସ୍ୱାବଲମ୍ବୀ ଅର୍ଥନୀତି ଉପରେ ଅଧିକ ଗୁରୁତ୍ୱ ଦେବାକୁ ଯୋଜନା କରୁଛନ୍ତି।
ଏହି ଘୋଷଣା ବିଶ୍ୱ ଅର୍ଥନୀତି ଏବଂ ବାଣିଜ୍ୟ ଉପରେ ଏକ ଦୀର୍ଘମିଆଦି ପ୍ରଭାବ ପକାଇପାରେ। ବ୍ରିଟେନର ଏହି ପଦକ୍ଷେପ ଅନ୍ୟ ଦେଶମାନଙ୍କୁ ମଧ୍ୟ ସୁରକ୍ଷାବାଦୀ ନୀତି ଆପଣାଇବାକୁ ଉତ୍ସାହିତ କରିପାରେ। ଷ୍ଟାର୍ମରଙ୍କ ଏହି ନିଷ୍ପତ୍ତି ବିଶ୍ୱରେ ଏକ ନୂତନ ଅର୍ଥନୈତିକ ବ୍ୟବସ୍ଥାର ସୂଚନା ଦେଉଛି ବୋଲି ବିଶେଷଜ୍ଞମାନେ ମତ ଦେଇଛନ୍ତି।
