ନୂଆଦିଲ୍ଲୀ,୨୪/୦୨: ଘରୋଇ କ୍ରିକେଟ୍କୁ ଛାଡ଼ି ଆଇପିଏଲ୍କୁ ସର୍ବସ୍ୱ ମନେ କରୁଥିବା ଖେଳାଳିଙ୍କ ପାଇଁ ବିସିସିଆଇ କଡ଼ା ଆଭିମୁଖ୍ୟ ଗ୍ରହଣ କରିବ ବୋଲି ପୂର୍ବରୁ ସମ୍ପାଦକ ଜୟ ଶାହ ସତର୍କ କରାଇ ଦେଇଥିଲେ । ଏହାସତ୍ତେ୍ୱ ବି ଈଶାନ କିଷନ ଓ ଶ୍ରେୟାସ ଆୟର ରଣଜୀ ଟ୍ରଫି ଖେଳି ନଥିଲେ । ଏଭଳି ଆଚରଣ ସେମାନଙ୍କ ପାଇଁ ମହଙ୍ଗା ପଡ଼ିପାରେ ।
ଯାହା ସୂଚନା ରହିଛି, ବିସିସିଆଇ ବିଶୃଙ୍ଖଳିତ ଆଚରଣ ପାଇଁ କିଷନ ଓ ଆୟରଙ୍କୁ କେନ୍ଦ୍ରୀୟ ଚୁକ୍ତିରୁ ବାଦ ଦେଇପାରେ । ମୁଖ୍ୟ ଚୟନକର୍ତ୍ତା ଅଜିତ ଅଗରକର ୨୦୨୩-୨୪ର ବାର୍ଷିକ ଚୁକ୍ତି ତାଲିକା ଚୂଡ଼ାନ୍ତ କରି ସାରିଛନ୍ତି । ବିସିସିଆଇ ଖୁବ ଶୀଘ୍ର ତାଲିକା ପ୍ରକାଶ କରିବାକୁ ଯାଉଛି ।
ଦକ୍ଷିଣ ଆଫ୍ରିକା ଗସ୍ତରୁ ଫେରିବା ପରେ କିଷନ ବ୍ୟକ୍ତିଗତ କାରଣ ଦର୍ଶାଇ ଛୁଟିରେ ଥିଲେ । କିନ୍ତୁ ପରେ ସେ ମୁମ୍ବାଇ ଶିବିରରେ ଯୋଗ ଦେଇ ହାର୍ଦ୍ଦିକ ପାଣ୍ଡ୍ୟାଙ୍କ ସହ ବରୋଦାରେ ଅଭ୍ୟାସ କରୁଥିବା ଦେଖିବାକୁ ମିଳିଥିଲା । ବିସିସିଆଇର ଚେତାବନୀ ସତ୍ତେ୍ୱ ବି ସେ ରଣଜୀ ଖେଳିବା ପାଇଁ ଝାଡ଼ଖଣ୍ଡ ଦଳକୁ ଫେରି ନଥିଲେ ।
ସେହିପରି ଆସାମ ବିପକ୍ଷ ଲିଗ୍ର ଅନ୍ତିମ ରଣଜୀ ମ୍ୟାଚ୍ରେ ମୁମ୍ବାଇ ଦଳରେ ଯୋଗ ଦେଇ ନଥିଲେ ଆୟର । ବରୋଦା ବିପକ୍ଷ କ୍ୱାର୍ଟର ଫାଇନାଲ ମଧ୍ୟ ସେ ଖେଳିଲେ ନାହିଁ । ଆୟର ଅନୁପସ୍ଥିତ ରହିବାର କାରଣ ମୁମ୍ବାଇ କ୍ରିକେଟ୍ ସଂଘକୁ ଜଣାଇଥିଲେ । ପିଠିରେ ଯନ୍ତ୍ରଣା ଅନୁଭବ କରୁଥିବା କହିଥିଲେ । କିନ୍ତୁ ଜାତୀୟ କ୍ରିକେଟ୍ ଏକାଡେମୀର କ୍ରୀଡ଼ା ବିଜ୍ଞାନ ଓ ଔଷଧ ବିଭାଗର ମୁଖ୍ୟ ନିତିନ ପଟେଲ ବିସିସିଆଇକୁ ଇ-ମେଲ କରି ଜଣାଇଥିଲେ ଯେ ‘ଆୟର ଫିଟ୍ ରହିଛନ୍ତି’ ।
ସମ୍ପାଦକ ଜୟ ଶାହ କିନ୍ତୁ ଖେଳାଳିଙ୍କୁ ସତର୍କ କରାଇ କହିଥିଲେ ଯେ କେନ୍ଦ୍ରୀୟ ଚୁକ୍ତିରେ ଥିବା ଖେଳାଳି ଘରୋଇ କ୍ରିକେଟ୍ ଖେଳିବା ବାଧ୍ୟତାମୂଳକ । ଯଦି ସେମାନେ ଏଥିରୁ ଦୂରେଇ ରହନ୍ତି, ତେବେ ମୁଖ୍ୟ ଚୟନକର୍ତ୍ତା ଅଜିତ ଅଗରକରଙ୍କୁ ପୂର୍ଣ୍ଣ ସ୍ୱାଧୀନତା ଦେଇଛି, ସେ ଏ ବିଷୟରେ ନିଷ୍ପତ୍ତି ନେବେ ।
