ଭୁବନେଶ୍ୱର,୨୫/୦୬: ଖୁବ୍ଶୀଘ୍ର ଖୋର୍ଦ୍ଧାରୋଡ୍ ଷ୍ଟେସନରେ ନିର୍ମାଣ ହେବ ରେଳ ଫ୍ଲାଏଓଭର । ଏନେଇ ସୋମବାର ରେଳ ମନ୍ତ୍ରାଳୟ ପକ୍ଷରୁ ଗ୍ରୀନ ସିଗନାଲ ମିଳିଛି । ବୃଦ୍ଧି ପାଉଥିବା ଟ୍ରେନ ଚଳାଚଳ ଏବଂ ଯାତାୟାତକୁ ଦୃଷ୍ଟିରେ ରଖି ପ୍ରକଳ୍ପକୁ ମଞ୍ଜୁରି ଦିଆଯାଇଛି । ୭.୪୧ କିଲୋମିଟର ଲମ୍ବା ଫ୍ଲାଏଓଭର ପାଇଁ ମୋଟ ୧୯୧.୮୭ କୋଟି ଟଙ୍କା ଖର୍ଚ୍ଚ ହେବ । ପୁରୀରୁ ଭୁବନେଶ୍ୱର ଦିଗକୁ ଯାତାୟାତ କରୁଥିବା ଟ୍ରେନ୍ ଚଳାଚଳକୁ ସୁଗମ କରିବା ଏବଂ ହାୱଡ଼ା-ଚେନ୍ନାଇ ମୁଖ୍ୟ ରେଳପଥ ଏବଂ ଖୋର୍ଦ୍ଧାରୋଡ୍-ପୁରୀ ଶାଖା ପଥରେ ଟ୍ରେନ ବିଳମ୍ବକୁ ହ୍ରାସ ପାଇଁ ପୂର୍ବତଟ ରେଳପଥ ଫ୍ଲାଏଓଭର ନିର୍ମାଣ ପାଇଁ ପୂର୍ବରୁ ପ୍ରସ୍ତାବ ଦେଇଥିଲା । ଯାହାକୁ ମଞ୍ଜୁରି ମିଳିଛି । ଭାରତୀୟ ରେଳ ବିଭାଗର ଶକ୍ତି କରିଡର ଯୋଜନା ଅଧୀନରେ କାର୍ଯ୍ୟକାରୀ ହେବାକୁ ଥିବା ଏହି ପ୍ରକଳ୍ପ ବ୍ୟସ୍ତବହୁଳ ରେଳ ସେକ୍ସନରେ ଟ୍ରେନ୍ ଚଳାଚଳର ଦକ୍ଷତା ବୃଦ୍ଧି ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ହେବ ।
ବିଭିନ୍ନ ଟ୍ରେନ୍ର ଗତିବିଧିକୁ ପରିଚାଳନା କରୁଥିବା ଖୋର୍ଦ୍ଧାରୋଡ୍ ରେଳ ଷ୍ଟେସନ୍ ଏକ ପ୍ରମୁଖ ସଂଯୋଗ ସ୍ଥାନ ବା ଜଙ୍କ୍ସନ ଅଟେ । ଏହି ଫ୍ଲାଏଓଭର ନିର୍ମାଣ ପରେ ଭୁବନେଶ୍ୱର-ବ୍ରହ୍ମପୁର ଏବଂ ଖୋର୍ଦ୍ଧାରୋଡ-ପୁରୀ ରେଳ ସେକ୍ସନରେ ଟ୍ରେନର ଏକକାଳୀନ ଗତିବିଧି ନିରୀକ୍ଷଣ କରିବାରେ ସହଜ କରିବ । ପୁରୀ ଦିଗରୁ କ୍ରସ୍ ଟ୍ରାଫିକ୍ ଅନୁମତି ଦେବା ପାଇଁ ଖୋର୍ଦ୍ଧାରୋଡରେ ଟ୍ରେନ୍ ଚଳାଚଳ ବନ୍ଦ କରିବାକୁ ପଡୁଥିଲା, ଯାହାଦ୍ୱାରା ବିଳମ୍ବ ଟ୍ରେନ ଚଳାଚଳ କ୍ଷେତ୍ରରେ ପ୍ରତିବନ୍ଧକ ଦେଖାଦେଇଥିଲା । ତେଣୁ ସମସ୍ୟା ଦେଖାଉଥିବା ଟ୍ରେନ୍ ଚଳାଚଳକୁ ବ୍ୟବସ୍ଥିତ କରିବା ଏବଂ କ୍ରସ୍-ମୁଭ୍ମେଣ୍ଟ ଦୂର କରି ଏହି ନୂତନ ରେଳ ଫ୍ଲାଏଓଭର ଯାତ୍ରୀଙ୍କ ପାଇଁ ଏକ ସୁଗମ ଯାତ୍ରା ଅଭିଜ୍ଞତାକୁ ବୃଦ୍ଧି କରିବ । ଏଥିସହ ସ୍ଥାନୀୟ ଅଞ୍ଚଳରେ ଭାରତୀୟ ରେଳବାଇର କାର୍ଯ୍ୟକ୍ଷମତା ବୃଦ୍ଧି ପାଇବ । ଏଥିପାଇଁ ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବଙ୍କୁ ପୂର୍ବତଟ ରେଳପଥ ପକ୍ଷରୁ ଧନ୍ୟବାଦ ଦିଆଯାଇଛି ।