ଖଲ୍ଲିକୋଟ,୨୭/୦୭: ରୂପା ବ୍ୟବସାୟୀଙ୍କ ଠାରୁ ବସ୍ରେ ହେଲା ଲୁଟ୍ । ବ୍ୟବସାୟ ସାରି ଫେରୁଥିବା ବେଳେ ୫୦ କେଜି ରୂପା ସହିତ ୪ଲକ୍ଷ ୯୨ହଜାର ଟଙ୍କା ଲୁଟିନେଲେ ଦୁର୍ବୃତ୍ତ । ଅଭିଯାଗକାରୀ ଜଣକ ମିଥୁନ ମଣ୍ଡଳ ।
ସୂଚନା ଅନୁଯାୟୀ, କଲିକତାର ରୂପା ବ୍ୟବସାୟୀ ମିଥୁନ ମଣ୍ଡଳ ବ୍ରହ୍ମପୁରରୁ ବ୍ୟବସାୟ ସାରି ଖମ୍ବେଶ୍ବରୀ ନାମକ ଏକ ଘରୋଇ ବସ ଯୋଗେ କଲିକତା ଫେରୁଥିଲେ । ଏହି ସମୟରେ ଖଲ୍ଲିକୋଟ ନିକଟସ୍ଥ ୧୬ ନମ୍ବର ଜାତୀୟ ରାଜପଥରେ ଥିବା ଭେଜିପୁଟ ଫାଣ୍ଡି ନିକଟରେ ବସଟି ଯାତ୍ରୀ ମାନେ ଜଳଖିଆ ଖାଇବା ପାଇଁ ଅଟକିଥିଲା । ମିଥୁନ ମଣ୍ଡଳ ବସର ସ୍ଲିପର ସିଟରେ ଏକ ବ୍ୟାଗ୍ରେ ୫୦ କେଜି ଓଜନର ରୂପା ଓ ନଗଦ ୪ ଲକ୍ଷ ୯୨ ହଜାର ଟଙ୍କା ରଖି ଚା ପିଇବା ପାଇଁ ବସରୁ ତଳକୁ ଆସିଥିଲେ । ସେହି ସମୟରେ ପୁର୍ବରୁ ପିଛା କରୁଥିବା ଚାରି ଜଣ ଲୁଟେରା ଏକ କାର ଯୋଗେ ଆସି ବସ ଭିତରୁ ଉକ୍ତ ବ୍ୟାଗ୍ ଟିକୁ ଧରି ଆଖି ପିଛୁଳାକେ ଚମ୍ପଟ ମାରିଥିଲେ । ମିଥୁନ ଚା ପିଆ ସାରି ବସ ଭିତରକୁ ଆସି ତାଙ୍କ ବ୍ୟାଗ୍ ନ ଥିବା ଦେଖି ଭାଙ୍ଗି ପଡିଥିଲେ । ସଙ୍ଗେ ସଙ୍ଗେ ନିକଟସ୍ଥ ଭେଜିପୁଟ ଫାଣ୍ଡିରେ ଏତଲା ଦେଇଥିଲେ ।
ତେବେ ପୋଲିସ ଫାଣ୍ଡି ନିକଟରୁ ଏହି ଚୋରି ହେବା ଘଟଣା ପୋଲିସ ପାଇଁ ଏକ ଚ୍ୟାଲେଞ୍ଜ ସୃଷ୍ଟି କରିଛି । ଏ ସମ୍ପର୍କରେ ଆମ ପ୍ରତିନିଧୀ ମିଥୁନ ମଣ୍ଡଳଙ୍କ ପ୍ରତିକ୍ରିୟା ନେବାକୁ ଚେଷ୍ଟା କରିଥିଲେ । ଲକ୍ଷାଧିକ ଟଙ୍କାର ରୂପା ଓ ନଗଦ ଲକ୍ଷାଧିକ ଟଙ୍କା ହରାଇଥିବା ମିଥୁନ ଦୁଃଖର ସହିତ ପ୍ରତିକ୍ରିୟା ଦେବାକୁ ମନା କରିଥିଲେ। । ବର୍ତ୍ତମାନ ଖଲ୍ଲିକୋଟ ପୋଲିସ ଏ ଘଟଣା ସଂପର୍କ ରେ ଅଧିକ ତଦନ୍ତ ଜାରି ରଖିଛି।
