ଫିରିଙ୍ଗିଆ/ କନ୍ଧମାଳ/ଫୁଲବାଣୀ,୨୬/୭ : ଗତ କିଛି ଦିନ ହେବ କନ୍ଧମାଳ ଜିଲ୍ଲାରେ ଲଗାଣ ବର୍ଷା ଜାରି ରହିଛି । ବର୍ଷା ଯୋଗୁଁ ଜିଲ୍ଲାର ବିଭିନ୍ନ ନଦୀରେ ଜଳସ୍ତର ବୃଦ୍ଧି ପାଇବାରେ ଲାଗିଛି । ଫିରିଙ୍ଗିଆ ବ୍ଲକର ମାଳିଜିରୁ, ସୁନାମୁଦି, ବାଘ ଆଦି ନଦୀରେ ବନ୍ୟା ଜଳ ପ୍ରବାହିତ ହେଉଛି l ଗୋଟିଏ ଦୁଇଟି ସ୍ଥାନରେ ନିର୍ମାଣାଧୀନ ବ୍ରିଜ ନିକଟ ରାସ୍ତା ଧୋଇ ନେଇଥିବାବେଳେ ଅନେକ ସ୍ଥାନରେ ରାସ୍ତା ଉପରେ ୪ରୁ ୫ଫୁଟ ପାଣି ପ୍ରବାହିତ ହେଉଛି l ଫଳରେ ଫିରିଙ୍ଗିଆ ବ୍ଲକର ଦୁଇଟି ପଞ୍ଚାୟତର ୩୦ରୁ ଊର୍ଦ୍ଧ୍ବ ଗ୍ରାମ ଏବେ ବାହ୍ୟ ଜଗତରୁ ବିଛିନ୍ନ ହୋଇ ରହିଛି ।
ମାଳିଜିରୁ ଓ ସୁନାମୁଦି ନଦୀରେ ବନ୍ୟା ଜଳ ଆସି ଗୋଛାପଡାଠାରୁ ସଲାଗୁଡା ସଂଯୋଗ କରୁଥିବା ତାଡିକିଆଠାରେ ନିର୍ମାଣାଧୀନ ବ୍ରିଜ ନିକଟ ରାସ୍ତା ଧୋଇ ନେବା ଫଳରେ ସଲାଗୁଡା ପଞ୍ଚାୟତର ନେଡି ପଦର, କୁମ୍ଭାର ଖୋଲ, ସଲାଗୁଡା, ପୋଡି ପଦର, ବାକେ ପଙ୍ଗା, ଡାନ୍ସ ପାଲି, ବଦା ପାଜୁ ଭଳି ୨୫ରୁ ଊର୍ଦ୍ଧ୍ବ ଗାଁ ବାହ୍ୟ ଜଗତରୁ ବିଛିନ୍ନ ହୋଇଥିବାବେଳେ ବାଘ ନଦୀର ଜଳସ୍ତର ବୃଦ୍ଧି ଯୋଗୁଁ ଗ୍ରାମବାସୀଙ୍କ ଦ୍ଵାରା ନିର୍ମିତ କାଠ ପୋଲ ଉପରେ ୮ ରୁ ୧୦ଫୁଟ ପାଣି ପ୍ରବାହିତ ହେଉଥିବାରୁ ପାଙ୍ଗା ପଞ୍ଚାୟତର ମାର୍କାଲି, ସିକେରୀ, ଡେଡି ସରୁ, କାଲି କୁଟି ଆଦି ୪ଟି ଗାଁ ବାହ୍ୟ ଜଗତରୁ ବିଛିନ୍ନ ହୋଇଛି ।
ସେହିଭଳି ସୁନା ମୁଦି ନଦୀରେ ନିର୍ମାଣାଧୀନ ମେଗା ପାନୀୟ ଜଳ ପ୍ରକଳ୍ପର ପାଣି ଟାଙ୍କି ଭାସି ଯାଇଥିବାବେଳେ ଲଗାଣ ବର୍ଷା ଯୋଗୁଁ ଗୋଛାପଡା ଥାନା ପାଚେରୀ ଭାଙ୍ଗି ପଡ଼ିଛି । ଫିରିଙ୍ଗିଆ ବିଡିଓ ଅନୁପ ଅଭିଷେକ ବେହେରା, ଏବଂ ଆରଡି ଏସ୍ ଡି ଓ, ସୁନୀଲ କୁମାର ମହାନ୍ତି ବିଭିନ୍ନ ସ୍ଥାନ ବୁଲି ସ୍ଥିତି ଅନୁଧ୍ୟାନ କରିବା ସହ ବିଛିନ୍ନାଞ୍ଚଳକୁ କିଭଳି ସଂଯୋଗ ହୋଇପାରିବ ସେ ନେଇ ଉଦ୍ୟମ ଜାରି ରଖିଛନ୍ତି ।