ଦାରିଙ୍ଗବାଡି,୧୫/୪(ଆପ୍ର): ସ୍କୁଲ ଛୁଟି ହେବା ପରେ ସେବାଶ୍ରମର ଛାତ୍ରୀମାନେ ଗାଧୋଉଥିଲେ । ହଠାତ ମହୁମାଛି ଦଳ ଦଳ ହୋଇ ଛାତ୍ରୀଙ୍କୁ ଆକ୍ରମଣ କରିଥିଲେ । ଫଳରେ ୪୧ ଜଣ ଛାତ୍ରୀ ଆହତ ହୋଇଛନ୍ତି। ଦାରିଙ୍ଗବାଡି ବ୍ଲକ ବାଡାବାଙ୍ଗା ସେବାଶ୍ରମରେ ଦେଖିବାକୁ ମିଳିଛି ଏଭଳି ଦୃଶ୍ୟ । ଛାତ୍ରୀମାନଙ୍କୁ ତୁରନ୍ତ ଡାକ୍ତରଖାନା ଆଣି ଚିକିତ୍ସା କରାଯାଇଥିଲା।
ସକାଳ ସାଢେ଼ ୧୦ ଟାରେ ବିଦ୍ୟାଳୟ ଛୁଟି ପରେ ଅନ୍ତେବାସୀ ଛାତ୍ରୀମାନେ ଗାଧୋଇବାକୁ ସେବାଶ୍ରମ ବାହାରକୁ ଯାଇଥିଲେ। କିଛି ଛାତ୍ରୀ ଗାଧୋଉଥିବା ବେଳେ ସେହି ସମୟରେ ସେବାଶ୍ରମ ପରିସର ମଧ୍ୟରେ ଥିବା ମହୁମାଛି ବସାକୁ ଏକ ଚଢ଼େଇ ଆସି ଧକ୍କା ହୋଇଥିଲା । ଫଳରେ ମହୁମାଛିମାନେ ବସାରୁ ବାହାରି ପାଖରେ ଥିବା ଛାତ୍ରୀମାନଙ୍କୁ ଆକ୍ରମଣ କରିଥିଲେ। ଛାତ୍ରୀମାନେ ଏଣେ ତେଣେ ଦୌଡ଼ି ବିଦ୍ୟାଳୟ ଭିତରକୁ ପଶିଯାଇଥିଲେ। ମହୁମାଛି ଆକ୍ରମଣରେ ଛାତ୍ରୀମାନଙ୍କ ହାତ, ଗୋଡ଼, ମୁହଁ ଆଦି ଫୁଲିଯାଇଥିଲା। ବିଦ୍ୟାଳୟର ପ୍ରଧାନ ଶିକ୍ଷକ ପ୍ରାଣବନ୍ଧୁ ମହାନାୟକଙ୍କ ସମେତ ସରପଞ୍ଚ ପ୍ରସନ୍ନ ପ୍ରଧାନ ଦୁହେଁ ମିଶି ଛାତ୍ରୀମାନଙ୍କୁ ଅଟୋରେ ଆଣି ଦାରିଙ୍ଗବାଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଚିକିତ୍ସା ପାଇଁ ଭର୍ତ୍ତି କରିଥିଲେ । ସେଠାରେ ସେମାନଙ୍କ ଚିକିତ୍ସା କରାଯାଇଥିଲା ।
