ଭୁବନେଶ୍ୱର, ୨୩।୯(ଶୁଭ୍ରଜିତ ବଳିଆରସିଂହ): ପୁରୀ ଜିଲ୍ଲାର କୃଷ୍ଣପ୍ରସାଦ ବ୍ଲକ ମାଲୁଦରେ ରହିଛି ଓଡ଼ିଶା ଆଦର୍ଶ ବିଦ୍ୟାଳୟ । ବ୍ଲକ୍ ଅଧୀନରେ ଥିବା ୨୧ଟି ପଞ୍ଚାୟତରୁ ଛାତ୍ରଛାତ୍ରୀ ପଢ଼ିବାକୁ ଆସୁଛନ୍ତି । କାହା ଘର ୧୦ କିଲୋମିଟର ଦୂର ତ ଆଉ କାହାର ୩୦ କିଲୋମିଟର ଦୂର । ଛାତ୍ରୀମାନେ ରହିବା ପାଇଁ ରାଜ୍ୟ ସରକାରଙ୍କ ପାଣ୍ଠିରେ ନିର୍ମାଣ ହୋଇଛି ନୂତନ ଛାତ୍ରୀନିବାସ । କିନ୍ତୁ ଏଠାରେ ଜଣେ ବି ଛାତ୍ରୀ ରହୁନାହାନ୍ତି । ସେହିପରି ଭୁବନେଶ୍ୱରରୁ ଅଳ୍ପ ଦୂରରେ ଜଟଣୀ ବ୍ଲକ ଷଣ୍ଢପୁରରେ ଥିବା ଆଦର୍ଶ ବିଦ୍ୟାଳୟରେ ଛାତ୍ରୀନିବାସ ନୂତନ ବିଲଡିଂ ନିର୍ମାଣ ସରିଛି । କିନ୍ତୁ ଏହା କାର୍ଯ୍ୟକ୍ଷମ ହୋଇପାରୁନି । ସାକ୍ଷୀଗୋପାଳ ବ୍ଲକ୍ ପଟ୍ଟନାୟିକିଆ ଛକ ପାଖେ ଥିବା ଓଡ଼ିଶା ଆଦର୍ଶ ବିଦ୍ୟାଳୟରେ ସମାନ ଅବସ୍ଥା । ହଷ୍ଟେଲ ନ ଥିବାରୁ ୧୦/୧୫ କିଲୋମିଟର ଦୂରରୁ ପ୍ରତିଦିନ ଛାତ୍ରଛାତ୍ରୀ ଆସି ପାଠ ପଢ଼ୁଛନ୍ତି । ହଷ୍ଟେଲ ନଥିବାରୁ ଅଭିଭାବକମାନେ ମିଶି ଘରୋଇ ବସ୍, ଟ୍ୟାକ୍ସି କରି ପିଲାଙ୍କୁ ପଠାଉଛନ୍ତି । ଏପରିକି ସ୍କୁଲ ପାଖରେ ଖୋଲିଥିବା ଘରୋଇ ହଷ୍ଟେଲରେ ରହୁଛନ୍ତି । ସରକାର ସିନା ମାଗଣାରେ ପାଠ ପଢ଼ାଉଛନ୍ତି । ହେଲେ ପ୍ରତିଦିନ ଘରରୁ ସ୍କୁଲ ଯିବା ଆସିବା ଖର୍ଚ୍ଚ ମୁଣ୍ଡ ବିନ୍ଧା କରୁଛି ।
ରାଜ୍ୟରେ ୩୧୪ ବ୍ଲକ୍ରେ ଥିବା ଓଡ଼ିଶା ଆଦର୍ଶ ବିଦ୍ୟାଳୟରୁ ୨୨୨ଟି ଛାତ୍ରୀନିବାସ ନିର୍ମାଣ କାର୍ଯ୍ୟ ସରିଛି । ହେଲେ ଏଥିରୁ ଶହେରୁ ଅଧିକ ଛାତ୍ରୀନିବାସ ଏ ପର୍ଯ୍ୟନ୍ତ କାର୍ଯ୍ୟକ୍ଷମ ହୋଇପାରୁନି । କାରଣ ହେଲା କେଉଁଠି ବିଜୁଳି ସଂଯୋଗ ଯାଇନି ତ ଆଉ କେଉଁଠି ପିଇବା ପାଣି ବ୍ୟବସ୍ଥା ନାହିଁ । ହଷ୍ଟେଲ ଚାଲିବା ପାଇଁ ଆବଶ୍ୟକ ଆସବାବପତ୍ର ଯୋଗାଇ ଦିଆଯାଇନି । କର୍ମଚାରୀ ମଧ୍ୟ ନିଯୁକ୍ତି କରାଯାଉନି । ତେଣୁ ଚକାଚକ୍ ବିଲଡିଂ ତିଆରି ହୋଇଥିଲେ ମଧ୍ୟ ସେଥିରେ ଭୂତ ରହୁଛନ୍ତି । ଏ ନେଇ ଓଡ଼ିଶା ଆଦର୍ଶ ବିଦ୍ୟାଳୟ ସଂଗଠନର ଜଣେ ବରିଷ୍ଠ ଅଧିକାରୀ କହିଛନ୍ତି ନିର୍ମାଣ ସରିଥିବା ଛାତ୍ରୀନିବାସ କାର୍ଯ୍ୟକ୍ଷମ କରିବାକୁ ରାଜ୍ୟ ସରକାରଙ୍କୁ ପ୍ରସ୍ତାବ ପଠାଯାଇଛି । ହଷ୍ଟେଲରେ ଯେଉଁ ଛାତ୍ରୀମାନେ ରହିବେ ସେମାନେ ଜଣ ପିଛା ମାସିକ ଦୁଇ ହଜାର ଟଙ୍କା ଦେବେ ବୋଲି ସରକାର କହୁଛନ୍ତି । ମାତ୍ର ଆଗରୁ କାର୍ଯ୍ୟକ୍ଷମ ଛାତ୍ରୀନିବାସଗୁଡିକରେ ଛାତ୍ରୀମାନେ ଏହି ଟଙ୍କା ଦେଉନାହାନ୍ତି । ସେଗୁଡ଼ିକୁ କସ୍ତୁରବା ଗାନ୍ଧୀ ଆବାସିକ ବିଦ୍ୟାଳୟ ସହ ସଂଯୁକ୍ତ କରାଯାଇଛି । ତେଣୁ ଅଧା ସ୍କୁଲ ଝିଅ ମାଗଣା ହଷ୍ଟେଲରେ ରହିବେ ଓ ଆଉ ଅଧା କିପରି ଟଙ୍କା ଦେବେ ତାହା ସମସ୍ୟା ହୋଇଛି । ଏ ନେଇ ଖୁବ୍ ଶୀଘ୍ର ନିଷ୍ପତ୍ତି ନିଆଯିବ ବୋଲି ଅଧିକାରୀ ଜଣକ ସୂଚନା ଦେଇଛନ୍ତି ।
୨୦୧୬ ମସିହାରେ ରାଜ୍ୟର ପ୍ରତ୍ୟେକ ବ୍ଲକ ମୁଖ୍ୟାଳୟରେ ଏକ ଉଚ୍ଚମାନର ଇଂରାଜୀ ମାଧ୍ୟମ ସ୍କୁଲ୍ ‘ଓଡ଼ିଶା ଆଦର୍ଶ ବିଦ୍ୟାଳୟ’ କରିବାକୁ ଘୋଷଣା କରାଯାଇଥିଲା । ଅର୍ଥାତ୍ ୨୦୧୬-୧୭ ଶିକ୍ଷା ବର୍ଷରେ ୧୦୦ଟି ଆଦର୍ଶ ବିଦ୍ୟାଳୟ କାର୍ଯ୍ୟକ୍ଷମ କରାଯାଇଥିଲା । ୨୦୧୭-୧୮ ବର୍ଷରେ ୬୦ଟି, ୨୦୧୮-୧୯ରେ ଆଉ ୩୦ଟି ବିଦ୍ୟାଳୟ କାର୍ଯ୍ୟକ୍ଷମ କରାଯାଇଥିଲା । ପର୍ଯ୍ୟାୟକ୍ରମେ ୩୧୪ ବ୍ଲକ୍ରେ ୩୧୪ଟି ଓଡ଼ିଶା ଆଦର୍ଶ ବିଦ୍ୟାଳୟ ରହିଥିବା ବେଳେ କୋଟିଆରେ ଗୋଟିଏ ଆଦର୍ଶ ବିଦ୍ୟାଳୟ ରହିଛି । ସେହିପରି ୫ଟି ମାଇନିଂ ଓଡ଼ିଶା ଆଦର୍ଶ ବିଦ୍ୟାଳୟ ପ୍ରତିଷ୍ଠା କରାଯାଇଛି । ରାଜ୍ୟରେ ମୋଟ୍ ୩୨୦ ଆଦର୍ଶ ବିଦ୍ୟାଳୟ ରହିଛି । ସମସ୍ତ ବିଦ୍ୟାଳୟ କେନ୍ଦ୍ରୀୟ ମାଧ୍ୟମିକ ବୋର୍ଡ ପରିଷଦ ଅନୁବନ୍ଧିତ ହୋଇଛି । ଷଷ୍ଠ ଶ୍ରେଣୀରୁ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ଶିକ୍ଷାର ବ୍ୟବସ୍ଥା ରହିଛି । ପ୍ରତି କ୍ଲାସ୍ରେ ୮୦ ଜଣ ପିଲା ପଢ଼ିବା କ୍ଷମତା ରହିଛି । ପ୍ରତି ବ୍ଲକ୍ରେ ଗୋଟିଏ ଲେଖାଏଁ ଓଡ଼ିଶା ଆଦର୍ଶ ବିଦ୍ୟାଳୟ ସହ ଉଭୟ ଛାତ୍ରାବାସ ଓ ଛାତ୍ରୀନିବାସ ନିର୍ମାଣ ଏଠାରେ ରହିବା କଥା । ୩୧୪ଟି ଆଦର୍ଶ ବିଦ୍ୟାଳୟ ମଧ୍ୟରୁ ୨୯୭ଟିର ନିର୍ମାଣ କାର୍ଯ୍ୟ ସରିଥିବା ବେଳେ ଏପର୍ଯ୍ୟନ୍ତ ଆହୁରି ୧୭ଟି ସ୍କୁଲର ନିର୍ମାଣ କାର୍ଯ୍ୟ ଶେଷ ହୋଇନି । ଏପର୍ଯ୍ୟନ୍ତ ମାତ୍ର ସବୁ ସ୍କୁଲରେ ହଷ୍ଟେଲ୍ ନିର୍ମାଣ କାର୍ଯ୍ୟ ଶେଷ ହୋଇନି । ୩୧୪ ବ୍ଲକ୍ରେ ଥିବା ଓଡ଼ିଶା ଆଦର୍ଶ ବିଦ୍ୟାଳୟରୁ ୨୨୨ଟି ଛାତ୍ରୀନିବାସ ନିର୍ମାଣ କାର୍ଯ୍ୟ ସରିଛି । ୮୨ଟିରେ ଛାତ୍ରୀନିବାସ ନିର୍ମାଣ ହୋଇନି । ଯେତିକି ତିଆରି ହୋଇଛି, ସବୁଥିରେ ଛାତ୍ରୀ ରହୁନାହାନ୍ତି । ସେହିପରି ମାତ୍ର ୩୨ଟି ସ୍କୁଲରେ ପୁଅ ପିଲାଙ୍କ ପାଇଁ ଛାତ୍ରାବାସ ନିର୍ମାଣ ହୋଇଛି । ୨୮୨ଟି ବାଳକ ହଷ୍ଟେଲ୍ ଏ ପର୍ଯ୍ୟନ୍ତ ନିର୍ମାଣ ହୋଇନି ।
