ବାରିପଦା, ୧୮/୦୭ : ଶିମିଳିପାଳରେ ବଢୁଛି ବନ୍ୟଜନ୍ତୁ ଶିକାର। ୨ ଶିକାରୀ ସମେତ ମାଂସ ଗ୍ରାହକ ଅଟକ। ଝିଙ୍କ ମାଂସ ସହ ବନ୍ଧୁକ ଏବଂ ଧନୁଶର ଜବତ। ଗିରଫ ଅଭିଯୁକ୍ତମାନେ ହେଲେ ଚାମୁଟୁ ହେମ୍ବ୍ରମ ଏବଂ ବାଇଧର ସୋରେନ।
ସୂଚନାନୁଯାୟୀ, ଶିକାରୀ ଚାମଟୁ ହେମ୍ବ୍ରମ୍ ଶିମିଳିପାଳରେ ଏକ ଝିଙ୍କ ଶିକାର କରି ମାଂସ ଓ ୮୮ଟି ଝିଙ୍କ କଣ୍ଟା ନେଇ ସାମାଖୁଣ୍ଟା ଅଞ୍ଚଳର ବାଇଧର ସୋରେନଙ୍କୁ ବିକ୍ରି କରୁଥିଲା। ଆଗରୁ ଖବର ପାଇ ବନ ବିଭାଗର ଟିମ୍ କିଣାବିକା ବେଳେ ଦୁଇଜଣଙ୍କୁ ମାଡି ବସିଥିଲେ। ସେମାନଙ୍କ ନିକଟରୁ ମାଂସ ସହିତ ଗୋଟିଏ ଦେଶୀ ବନ୍ଧୁକ ଓ ଧନୁତୀର ଜବତ କରାଯାଇଛି। ଗ୍ରାହକ ବାଇଧର ସୋରେନ୍ ହଳଦୀବଣୀ ଉଚ୍ଚ ପ୍ରାଥମିକ ବିଦ୍ୟାଳୟର ଭାରପ୍ରାପ୍ତ ପ୍ରଧାନ ଶିକ୍ଷକ ବୋଲି ସୂଚନା ମିଳିଛି। ଦକ୍ଷିଣ ବନଖଣ୍ଡର ଉପନିର୍ଦ୍ଦେଶକ ସମ୍ରାଟ ଗୌଡ଼ା ଏନେଇ ସୂଚନା ଦେଇଛନ୍ତି।