ଖଲ୍ଲିକୋଟ,୨୫/୦୭: ପିଲାଙ୍କ ଖେଳ ନେଲା ଜୀବନ । ଖେଳିବା ସମୟରେ ପୋଖରୀରେ ବୁଡିଗଲେ ୩ ଶିଶୁ । ସେମାନଙ୍କ ମଧ୍ୟରୁ ୨ଜଣ ଭାଇ ଭଉଣୀଙ୍କ ଅକାଳ ମୃତ୍ୟୁ ହୋଇଥିବା ବେଳେ ଅନ୍ୟଜଣେ ଗୁରୁତର ଆବସ୍ଥାରେ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି ହୋଇଛନ୍ତି । ଗଞ୍ଜାମ ଜିଲ୍ଲା ଖଲ୍ଲିକୋଟ ବ୍ଲକରେ ଏଭଳି ଅଭାବନୀୟ ଘଟଣା ଘଟିଛି ।
ସୂଚନା ଅନୁଯାୟୀ, ମରେଇ ନୂଆଗାଁର ରାଜେନ୍ଦ୍ର ସବର ଏବଂ ସଜନୀ ସବରଙ୍କର ୨ ଶିଶୁ ଗାଁର ଅନ୍ୟ ପିଲାଙ୍କ ସହ ପୋଖରୀ ନିକଟରେ ଖେଳୁଥିଲେ । ଏହି ସମୟରେ ଅସାବଧାନତା ହେତୁ ୩ ଜଣ ଶିଶୁ ପୋଖରୀରେ ବୁଡି ଯାଇଥିଲେ । ୨ ଭାଇ ଭଉଣୀଙ୍କୁ ବାପା ରାଜେନ୍ଦ୍ର ସବର ପୋଖରୀରୁ ଖୋଜି ଉଦ୍ଧାର କରିଥିଲେ । ତୁରନ୍ତ ଉଭୟଙ୍କୁ ଖଲ୍ଲିକୋଟ ମେଡିକାଲରେ ଭର୍ତ୍ତି କରିଥିଲେ। ହେଲେ ସେଠାରେ ଡାକ୍ତର ଉଭୟଙ୍କୁ ମୃତ ଘୋଷଣା କରିଥିଲେ ।
ଅନ୍ୟପଟେ ଯଶୋଦା ସବରଙ୍କ ଜଣେ ୨ବର୍ଷୀୟ ଶିଶୁକୁ ଗୁରୁତର ଅବସ୍ଥାରେ ଉଦ୍ଧାର କରାଯାଇଛି । ଭାଇ-ଭଉଣୀଙ୍କ ମୃତ୍ୟୁ ପରେ ମରଇ ନୂଆଁଗାଁରେ ଶୋକର ଛାୟା ଖେଳି ଯାଇଛି । ୨ ସନ୍ତାନଙ୍କ ମୃତ୍ୟୁପରେ ଛୁଆଙ୍କୁ ଧରି ବାହୁନି ବାହୁନି କାନ୍ଧୁଛି ମା। ସେପଟେ ଖଲ୍ଲିକୋଟ ପୋଲିସ ଏକ ଅପମୃତ୍ୟୁ ମାମଲା ରୁଜୁ କରିଛି । ଏଥି ସହିତ ୨ଶିଶୁଙ୍କର ଶବ ବ୍ୟବଚ୍ଛେଦ ପାଇଁ ପ୍ରସ୍ତୁତି ଆରମ୍ଭ ହୋଇଛି ।