କଟକ, ୨୪/୦୬: ମାଟ୍ରିକ୍ ପରୀକ୍ଷା ଫଳାଫଳକୁ ନେଇ ଅସନ୍ତୁଷ୍ଟ ପରୀକ୍ଷାର୍ଥୀଙ୍କ ମଧ୍ୟରୁ ପ୍ରାୟ ୫ ହଜାର ପରୀକ୍ଷାର୍ଥୀ ଉତ୍ତରଖାତା ପୁନଃଯାଞ୍ଚ୍ (ରି ଚେକିଂ) ପାଇଁ ମାଧ୍ୟମିକ ଶିକ୍ଷା ପରିଷଦ (ବୋର୍ଡ) କର୍ତ୍ତୃପକ୍ଷଙ୍କନିକଟରେ ଆବେଦନ କରିଛନ୍ତି । ୫ ହଜାର ପରୀକ୍ଷାର୍ଥୀଙ୍କର ବିଭିନ୍ନ ବିଷୟରୁ ପ୍ରାୟ ୧୮ ହଜାର ଉତ୍ତର ଖାତା ରି ଚେକିଂ କରାଯିବ ବୋଲି ସୂଚନା ମିଳିଛି । ଉତ୍ତର ଖାତା ରିଂ ଚେକିଂ କାର୍ଯ୍ୟ ଆସନ୍ତା ଏକ ସପ୍ତାହ ପରେ ଆରମ୍ଭ କରାଯିବ ବୋଲି ବୋର୍ଡ ପକ୍ଷରୁ କୁହାଯାଇଛି । ତେବେ ଏହି ଉତ୍ତର ଖାତା ପୁନଃ ଯାଞ୍ଚ କାର୍ଯ୍ୟ ସୁରକ୍ଷା ବ୍ୟବସ୍ଥାରେ କରାଯିବ । ଏଥିଲାଗି ବୋର୍ଡ ପକ୍ଷରୁ ସ୍ୱତନ୍ତ୍ର ଭାବେ କର୍ମଚାରୀମାନଙ୍କୁ ନିୟୋଜିତ କରିବା ଲାଗି ବ୍ୟବସ୍ଥା କରାଯାଇଛି ବୋଲି ବୋର୍ଡ ସୂତ୍ରରୁ ସୂଚନା ମିଳିଛି ।
ସୂଚନା ଥାଉ କି, ଫ୍ରେବ୍ରୁଆରୀ ୨୦ ତାରିଖରୁ ମାର୍ଚ୍ଚ ୪ ତାରିଖ ପର୍ଯ୍ୟନ୍ତ ଅନୁଷ୍ଠିତ ମାଟ୍ରିକ୍ ପରୀକ୍ଷାରେ ୫ ଲକ୍ଷ ୪୪ ହଜାର ୬୧ ଜଣ ପରୀକ୍ଷାର୍ଥୀ ପରୀକ୍ଷା ଦେଇଥିଲେ । ୧୦୦ ନମ୍ବର ବିଶିଷ୍ଠ ୬ଟି ବିଷୟ ପରୀକ୍ଷାରେ ୫ ଲକ୍ଷ ୩୦ ହଜାର ୧୫୩ ଜଣ ପରୀକ୍ଷାର୍ଥୀ ପାସ୍ କରିଥିବା ବେଳେ ୧୦ ହଜାର ଫେଲ୍ ହୋଇଥିଲେ । ତେବେ ପରୀକ୍ଷା ଫଳକୁ ନେଇ ଅସନ୍ତୁଷ୍ଟ ଥିବା ପରୀକ୍ଷାର୍ଥୀ ଏବଂ ଫେଲ୍ ହୋଇଥିବା ପରୀକ୍ଷାର୍ଥୀଙ୍କ ଉତ୍ତର ଖାତା ରି ଚେକିଂ ପାଇଁ ବୋର୍ଡ ପକ୍ଷରୁ ପ୍ରତିବର୍ଷ ପରି ଏଥର ସୁଯୋଗ ଦିଆଯାଇଥିଲା ।
ଖାତା ରି ଚେକିଂ ଲାଗି ମେ ୨୯ ତାରିଖରୁ ଗତ ୧୨ ତାରିଖ ପର୍ଯ୍ୟନ୍ତ ବୋର୍ଡ ୱେବ୍ସାଇଟ୍ରେ ଅନ୍ଲାଇନ୍ରେ ଆବେଦନ କରିବା ପାଇଁ ଆବେଦନକାରୀଙ୍କୁ କର୍ତ୍ତୃପକ୍ଷ ସୁଯୋଗ ଦେଇଥିଲେ । ତେବେ ଏହି ଧାର୍ଯ୍ୟ ସମୟ ସୀମା ମଧ୍ୟରେ ଆବେଦନ କରିଥିବା ପରୀକ୍ଷାର୍ଥୀମାନଙ୍କର ୧୮ ହଜାର ଉତ୍ତର ଖାତା ରି ଚେକିଂ ହେବ ବୋଲି ସୂଚନା ମିଳିଛି । ଅନ୍ୟପକ୍ଷରେ ୨୦୨୪ ମାଟ୍ରିକ ପରୀକ୍ଷାରେ ପାସ୍ କରିପାରିନଥିବା ପରୀକ୍ଷାର୍ଥୀମାନଙ୍କ ପାଇଁ ସପ୍ଲିମେଣ୍ଟାରୀ ପରୀକ୍ଷା ଆସନ୍ତା ଜୁଲାଇ ୨୨ ତାରିଖରୁ ୩୧ ତାରିଖ ପର୍ଯ୍ୟନ୍ତ ଚାଲିବ ବୋର୍ଡ ପକ୍ଷରୁ ବ୍ୟବସ୍ଥା କରାଯାଇଛି ।