ନୂଆଦିଲ୍ଲୀ, ୨୪/୦୭ : କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ଲୋକସଭାରେ ମୋଦି ସରକାରଙ୍କ ତୃତୀୟ ପାଳିର ପ୍ରଥମ ବଜେଟ୍ ଉପସ୍ଥାପନ କରିଛନ୍ତି । ଏଥିରେ ଚାଷୀଙ୍କ ପାଇଁ ବଡ଼ ଘୋଷଣା କରାଯାଇଛି । ବଜେଟ୍ରେ ଚାଷକାର୍ଯ୍ୟ କରୁଥିବା କୃଷକଙ୍କ ସହ ଜଡ଼ିତ ଯୋଜନା ଏବଂ କାର୍ଯ୍ୟ ନିମନ୍ତେ ୧.୫୨ ଲକ୍ଷ କୋଟି ଟଙ୍କା ଖର୍ଚ୍ଚ କରିବା ଲାଗି ଘୋଷଣା ହୋଇଛି । ନିର୍ବାଚନ ପୂର୍ବରୁ ଆଗତ ହୋଇଥିବା ଅନ୍ତରୀଣ ବଜେଟ୍ରେ କୃଷି କ୍ଷେତ୍ର ଲାଗି ୧.୪୭ ଲକ୍ଷ କୋଟି ଟଙ୍କାର ବଜେଟ୍ ରଖାଯାଇଥିଲା । ଗତବର୍ଷର ୧.୨୫ ଲକ୍ଷ କୋଟି ଟଙ୍କା ତୁଳନାରେ ଏଥର କୃଷି ବଜେଟ୍ ୨୧.୬% ବା ୨୭ ହଜାର କୋଟି ଟଙ୍କା ବଢ଼ିଛି । ବଜେଟ୍ ଆଗତ ହେବା ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଥିଲେ, ଏହି ସାଧାରଣ ବଜେଟ୍ ଅମୃତ କାଳ ଦୃଷ୍ଟିରୁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ହେବ । ଏହା ୫ ବର୍ଷ ନିମନ୍ତେ ଆମ ଯାତ୍ରା ସ୍ଥିର କରିବା ସହ ୨୦୪୭ ସୁଦ୍ଧା ବିକଶିତ ଭାରତ ନିମନ୍ତେ ଭିତ୍ତି ସ୍ଥାପନ କରିବାରେ ସହାୟକ ହେବ । ବଜେଟ୍ରେ ଅର୍ଥମନ୍ତ୍ରୀ ଚାଷୀଙ୍କ ନିମନ୍ତେ ସ୍ୱତନ୍ତ୍ର ଫୋକସ୍ କରିଛନ୍ତି । ସେମାନେ ଯେମିତି ନିଜ ପରିଶ୍ରମର ମୂଲ୍ୟ ପାଇବେ, ସେଥିପାଇଁ ଚେଷ୍ଟା କରାଯାଇଛି ।
ପ୍ରାକୃତିକ ଚାଷକୁ ଫୋକସ୍
କୋଟିଏ ଚାଷୀଙ୍କୁ ପ୍ରସ୍ତୁତ କରାଯିବ ଆଗାମୀ ଦୁଇବର୍ଷ ମଧ୍ୟରେ ଦେଶବ୍ୟାପୀ ୧ କୋଟି ଚାଷୀଙ୍କୁ ପ୍ରମାଣନ ଏବଂ ବ୍ରାଣ୍ଡିଙ୍ଗ୍ ଜରିଆରେ ନାଚୁରାଲ୍ ଫାର୍ମିଂ ବା ପ୍ରାକୃତିକ ଚାଷ ସହ ସାମିଲ କରାଯିବ । ଗ୍ରାମପଞ୍ଚାୟତ ଓ ବୈଜ୍ଞାନିକ ପ୍ରତିଷ୍ଠାନ ଜରିଆରେ ଏହା କାର୍ଯ୍ୟକାରୀ ହେବ । ୧୦ ହଜାର ଆବଶ୍ୟକଭିତ୍ତିକ ବାୟୋ-ଇନ୍ପୁଟ୍ ରିସୋର୍ସ ସେଣ୍ଟର ସ୍ଥାପନ କରାଯିବ।
ଜାରି ହେବ ନୂଆ କିଷାନ କ୍ରେଡିଟ୍ କାର୍ଡ
ଚାଷୀଙ୍କ ସହାୟତା ଲାଗି ୫ଟି ରାଜ୍ୟରେ ନୂଆ କିଷାନ କ୍ରେଡିଟ୍ କାର୍ଡ ଜାରି କରାଯିବ । ନାବାର୍ଡ ଜରିଆରେ ଚାଷୀଙ୍କୁ ସହାୟତା ଯୋଗାଇ ଦିଆଯିବ । ଗ୍ରାମୀଣ ଅର୍ଥ ବ୍ୟବସ୍ଥାକୁ ମଜଭୁତ କରିବା ପାଇଁ ଫୋକସ୍ କରାଯିବ । ଚାଷୀଙ୍କ ଉତ୍ପାଦକତାକୁ ପରିବର୍ତ୍ତିତ ପାଣିପାଗ ସ୍ଥିତିରୁ ସୁରକ୍ଷା ଯୋଗାଇବା ଲାଗି ଉଦ୍ୟମ କରାଯିବ ।
ଫସଲ ଅମଳ ବଢ଼ିବ , କାଟୁ କରିବନି ଜଳବାୟୁ
କେନ୍ଦ୍ର ବଜେଟ୍ରେ ଚାଷୀଙ୍କ ଅମଳ ବଢ଼ାଇବା ଉପରେ ଧ୍ୟାନ ଦିଆଯାଇଛି । ବିଶେଷକରି ଜଳବାୟୁର ପ୍ରଭାବ ଯେମିତି ଚାଷ ଉପରେ ନ ପଡ଼ିବ, ସେଥିପାଇଁ ନୂଆ କିସମ ଆଣିବା ଲାଗି ଯୋଜନା କରାଯିବ । ୩୨ଟି ଉଚ୍ଚ ଅମଳକ୍ଷମ ଫସଲ ଉପରେ ଫୋକସ୍ ଲାଗି ଚାଷୀଙ୍କୁ ପ୍ରୋତ୍ସାହିତ କରାଯିବ । ସେହିଭଳି ଜଳବାୟୁ ଦ୍ୱାରା ପ୍ରଭାବିତ ହେଉ ନ ଥିବା ୧୦୯ ନୂଆ କିସମ ଅଣାଯିବ । ଏହି ଜଳବାୟୁ ଅନୁକୂଳ ଫସଲ କରି ଚାଷୀମାନେ ସେମାନଙ୍କ ଅଣ୍ଟା ସଳଖି ପାରିବେ । ପାରମ୍ପରିକ ଫସଲ ଅମଳ ଉପରେ ଚାଷୀମାନେ ନିର୍ଭର କରି ବେଳେବେଳେ ଜଳବାୟୁ ଜନିତ ପ୍ରଭାବରେ କ୍ଷତିର ସମ୍ମୁଖୀନ ହେଉଛନ୍ତି । ଏଥିରୁ ସେମାନଙ୍କୁ ସୁରକ୍ଷା ଯୋଗାଇବାକୁ ଚେଷ୍ଟା କରାଯାଇଛି ।
ଏମ୍ଏସ୍ପି ନେଇ ଘୋଷଣା ହେଲାନି
ବଜେଟ୍ ୨୦୨୪-୨୫ରେ ଚାଷୀଙ୍କର ସବୁଠୁ ବଡ଼ ଦାବି କୁହାଯାଉଥିବା ଏମ୍ଏସ୍ପି (ସର୍ବନିମ୍ନ ସହାୟକ ମୂଲ୍ୟ) ବାବଦରେ କୌଣସି ଘୋଷଣା ହୋଇନାହିଁ । ଅର୍ଥମନ୍ତ୍ରୀ ନିର୍ମଳା ସୀତାରମଣ କହିଛନ୍ତି, ସରକାର ୧ ମାସ ପୂର୍ବେ ପ୍ରାୟ ସମସ୍ତ ପ୍ରମୁଖ ଫସଲ ଉପରେ ବର୍ଦ୍ଧିତ ଏମ୍ଏସ୍ପି ଘୋଷଣା କରିଥିଲେ । ବଜେଟ୍ରେ ଚାଷୀଙ୍କୁ ମିଳୁଥିବା ସମ୍ମାନ ନିଧିରେ ବି କୌଣସି ପ୍ରକାର ବୃଦ୍ଧି କରାଯାଇ ନାହିଁ ।
୫ ବର୍ଷ ବଢ଼ିଛି ଗରିବ କଲ୍ୟାଣ ଅନ୍ନ ଯୋଜନା
ବଜେଟ୍ ଉପସ୍ଥାପନ କରି ଅର୍ଥମନ୍ତ୍ରୀ ନିର୍ମଳା ସୀତାରମଣ କହିଛନ୍ତି, ଆମକୁ ପୃଥକ୍ ଜାତି, ଗରିବ, ମହିଳା, ଯୁବଗୋଷ୍ଠୀ ଏବଂ ଚାଷୀଙ୍କ ଉପରେ ଧ୍ୟାନ ରଖିବାକୁ ହେବ । ଚାଷୀଙ୍କ ଲାଗି ଆମେ ସମସ୍ତ ପ୍ରମୁଖ ଫସଲ ନିମନ୍ତେ ବର୍ଦ୍ଧିତ ଏମ୍ଏସ୍ପି ଘୋଷଣା କରିଥିଲୁ । ଯାହା ଚାଷ କାର୍ଯ୍ୟ ଖର୍ଚ୍ଚର ୫୦% ଭରଣା କରିପାରିବ । ପିଏମ୍ ଗରିବ କଲ୍ୟାଣ ଅନ୍ନ ଯୋଜନାକୁ ୫ ବର୍ଷ ନିମନ୍ତେ ବଢ଼ାଯାଇଛି । ଏହାଦ୍ୱାରା ୮୦ କୋଟିରୁ ଅଧିକ ଲୋକଙ୍କୁ ଫାଇଦା ମିଳୁଛି । ଏଥର ଝିଙ୍ଗା ଚିଙ୍ଗୁଡ଼ି ଉତ୍ପାଦନ ଓ ରପ୍ତାନି ଉପରେ ଗୁରୁତ୍ୱ ଦିଆଯିବ । ଝିଙ୍ଗା ଚାଷ ଓ ରପ୍ତାନି ଲାଗି ନାବାର୍ଡ ପକ୍ଷରୁ ପାଣ୍ଠି ଯୋଗାଇ ଦିଆଯିବ ।
ଡାଲି ଓ ତୈଳବୀଜରେ ଆତ୍ମନିର୍ଭରତା
ଡାଲି ଓ ତୈଳବୀଜରେ ଚାଷୀମାନଙ୍କୁ ଆତ୍ମନିର୍ଭର କରାଇବା ଲାଗି ଏମାନଙ୍କ ଉତ୍ପାଦନ, ଭଣ୍ଡାରଣ ଏବଂ ବିପଣନକୁ ସୁଦୃଢ଼ କରାଯିବ । ଅନ୍ତରୀଣ ବଜେଟ୍ରେ ହୋଇଥିବା ଘୋଷଣା ଅନୁସାରେ ସୋରିଷ, ଚିନାବାଦାମ, ରାଶି, ସୋୟାବିନ ଏବଂ ସୂର୍ଯ୍ୟମୁଖୀ ଭଳି ତୈଳବୀଜ ଉତ୍ପାଦନକୁ ବଢ଼ାଇବା ସକାଶେ ରଣନୀତି ପ୍ରସ୍ତୁତ କରାଯିବ ।
ସୁଦୃଢ଼ ହେବ ପରିବା ଯୋଗାଣ ଶୃଙ୍ଖଳ
ପନିପରିବାର ଯୋଗାଣ ଶୃଙ୍ଖଳକୁ ମଜଭୁତ କରିବା ପାଇଁ ଚାଷୀ-ଉତ୍ପାଦନକାରୀ ସଙ୍ଗଠନ, ସମବାୟ ସମିତି ଏବଂ ଷ୍ଟାର୍ଟଅପ୍ଗୁଡ଼ିକୁ ପ୍ରୋତ୍ସାହନ ଦିଆଯିବ । ଏମାନଙ୍କ ସଂଗ୍ରହଣ, ଭଣ୍ଡାରଣ ଓ ବିପଣନ ଉପରେ ଗୁରୁତ୍ୱ ପ୍ରଦାନ କରାଯିବ । ରାଜ୍ୟଗୁଡ଼ିକ ସହ ସହଯୋଗିତା ସ୍ଥାପନ କରାଯାଇ ସରକାର ୩ ବର୍ଷରେ ଚାଷୀ ଓ ସେମାନଙ୍କ ଜମିକୁ ସୁରକ୍ଷିତ ରଖିବା ସକାଶେ ଡିଜିଟାଲ ପବ୍ଲିକ ଇନ୍ଫ୍ରାଷ୍ଟ୍ରକ୍ଚର (ଡିପିଆଇ) ପ୍ରସ୍ତୁତ ଲାଗି କାମ କରିବେ । ୬ କୋଟି ଚାଷୀ ଓ ସେମାନଙ୍କ ଜମିର ବିବରଣୀକୁ ରେଜିଷ୍ଟ୍ରିଭୁକ୍ତ କରାଯିବ । ଏହାବ୍ୟତୀତ ଝିଙ୍ଗା ଚିଙ୍ଗୁଡ଼ି ଉତ୍ପାଦନକାରୀଙ୍କ ସହାୟତା ସକାଶେ ବ୍ରିଡିଙ୍ଗ୍ ସେଣ୍ଟରଗୁଡ଼ିକର ନେଟ୍ୱର୍କ ବନାଇବା ନିମନ୍ତେ ଆର୍ଥିକ ସହାୟତା ଯୋଗାଇ ଦିଆଯିବ ।
କୃଷି ଅଭିବୃଦ୍ଧି ପାଇଁ...
- ଦେଶର ୪୦୦ ଜିଲ୍ଲାରେ ଖରିଫ ଫସଲର ଡିଜିଟାଲ ସର୍ବେକ୍ଷଣ ହେବ
- ୫ ରାଜ୍ୟରେ ଜନ ସମର୍ଥ ଆଧାରିତ କିଷାନ କ୍ରେଡିଟ୍ କାର୍ଡ ଜାରି କରାଯିବ
- ରୋଜଗାର ସୃଷ୍ଟିକୁ ଗତିଶୀଳ କରାଇବା ଲକ୍ଷ୍ୟରେ ରାଷ୍ଟ୍ରୀୟ ସମବାୟ ନୀତି ପ୍ରସ୍ତୁତ କରାଯିବ
- ପ୍ରାକୃତିକ ଚାଷ ନିମନ୍ତେ ୧ କୋଟି ଚାଷୀଙ୍କୁ ସହଯୋଗ ଯୋଗାଇ ଦିଆଯିବ
- ୧୦ ହଜାର ଜୈବ-ଇନ୍ପୁଟ୍ ସଂସାଧନ କେନ୍ଦ୍ର ସ୍ଥାପିତ କରାଯିବ
- ଝିଙ୍ଗା ଚିଙ୍ଗୁଡ଼ି ବ୍ରୁଡ୍ଷ୍ଟକ୍ ନିମନ୍ତେ କେନ୍ଦ୍ରୀକୃତ ପ୍ରଜନନ କେନ୍ଦ୍ରଗୁଡ଼ିକର ନେଟ୍ୱର୍କ ସ୍ଥାପନ ଲାଗି
- ବିତ୍ତୀୟ ସହଯୋଗ ଉପଲବ୍ଧ କରାଯିବ
- ଚାଷୀଙ୍କ ପାଇଁ ୩୨ କୃଷି ଓ ଉଦ୍ୟାନ କୃଷି ଫସଲର ୧୦୯ ଉଚ୍ଚ ଉତ୍ପାଦନକ୍ଷମ ଓ ଜଳବାୟୁ
- ଅନୁକୂଳ କିସମ ଜାରି କରାଯିବ