ଖଲ୍ଲିକୋଟ, ୧୦/୦୬: ଖଲ୍ଲିକୋଟ ଥାନା ଅନ୍ତର୍ଗତ ମାଣିକପୁର ଗ୍ରାମରେ ଜଣେ ଯୁବକଙ୍କୁ ଛୁରୀ ଭୁସି ହତ୍ୟା କରାଯାଇଛି। ମୃତ ଯୁବକ ଜଣକ ହେଉଛନ୍ତି ମାଣିକପୁର ଗ୍ରାମର ବସନ୍ତ ପ୍ରଧାନ।
ସୂଚନା ମୁତାବକ, ବସନ୍ତ ଆଜି ଦିନ ବେଳା ଗ୍ରାମରେ ଥିବା ବାବା ବେଲେଶ୍ୱର ମନ୍ଦିରରେ ଶୋଇଥିଲେ। ଅପରାହ୍ନ ସାଢେ ୫ଟାରେ ନିଦରୁ ଉଠି ମନ୍ଦିରରୁ ଘରକୁ ଫେରୁଥିବା ବେଳେ ପୋଖରୀ ହୁଡାରେ ଦୁଇ ରୁ ତିନି ଜଣ ଯୁବକ ପଛରୁ ଆସି ଅତର୍କିତ ଭାବେ ଛୁରୀ ଦ୍ୱାରା ବସନ୍ତଙ୍କୁ ଆକ୍ରମଣ କରିଥିଲେ। ଶରୀରର ବିଭିନ୍ନ ସ୍ଥାନକୁ ଛୁରୀରେ ଭୁସି ଅଭିଯୁକ୍ତ ମାନେ ଫେରାର ହୋଇଯାଇଥିଲେ।
ବସନ୍ତଙ୍କୁ ଗୁରୁତର ଅବସ୍ଥାରେ ତୁରନ୍ତ ଚିକିତ୍ସା ପାଇଁ ଖଲ୍ଲିକୋଟ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଅଣାଯାଇଥିଲା। କିନ୍ତୁ ଡାକ୍ତର ଏଠାରେ ବସନ୍ତ ପ୍ରଧାନଙ୍କୁ ମୃତ ଘୋଷଣା କରିଥିଲେ। ଖବର ପାଇ ଖଲ୍ଲିକୋଟ ପୁଲିସ ମେଡିକାଲରେ ପହଞ୍ଚି ଶବକୁ ଜବତ କରିବା ସହ ଘଟଣା ସ୍ଥଳକୁ ଯାଇ ତଦନ୍ତ ଆରମ୍ଭ କରିଛନ୍ତି। ତେବେ ପୂର୍ବ ଶତ୍ରୁତାକୁ କେନ୍ଦ୍ର କରି ଏଭଳି ଘଟଣା ଘଟିଥିବା ସନ୍ଦେହ କରାଯାଉଛି।
