ବ୍ରହ୍ମପୁର, ୧୨/୦୬ : ମଦ୍ୟପାନ କରି ଗାଡି ଚାଳନା ଏବଂ ଟ୍ରିପଲ ରାଇଡିଂ ବିରୋଧରେ ବ୍ରହ୍ମପୁର ପୁଲିସର ସ୍ପେଶାଲ୍ ଡ୍ରାଇଭ୍। ୨ ଦିନରେ ୭୩ଟି ନିୟମ ଉଲ୍ଲଙ୍ଘନ ମାମଲା। ୨୬ ଟି ମଦ୍ୟପାନ କରି ଗାଡି ଚାଳନା ଏବଂ ୪୭ ଟି ଟ୍ରିପଲ୍ ରାଇଡିଂ ଓ ଅନ୍ୟାନ୍ୟ ନିୟମ ଉଲ୍ଲଙ୍ଘନ ହୋଇଛି।
ସୂଚନାନୁଯାୟୀ, ମଦ୍ୟପାନ କରି ଗାଡି ଚାଳନା ଏବଂ ଟ୍ରିପଲ ରାଇଡିଂ ବିରୋଧରେ ବ୍ରହ୍ମପୁର ଜିଲ୍ଲା ପୁଲିସ ସବୁ ଥାନା ଅଞ୍ଚଳରେ ୧୦ ଏବଂ ୧୧ ତାରିଖରେ ସ୍ପେଶାଲ୍ ଡ୍ରାଇଭ୍ ଆରମ୍ଭ କରିଥିଲା। ଏହି ସମୟରେ ୨୬ ଜଣ ମଦ୍ୟପ ଗାଡି ଚାଳକ ମଦ୍ୟପାନ କରି ଗାଡି ଚଳାଇ ଧରାପଡ଼ିଥିଲେ। ସେମାନଙ୍କ ବିରୋଧରେ ଅପରାଧିକ ମାମଲା ରୁଜୁ ହୋଇ ଗାଡି ଜବତ କରାଯାଇଛି। ସେହିଭଳି ଟ୍ରିପଲ୍ ରାଇଡିଂ, ଗାଡି ଚାଳନା ବେଳେ ମୋବାଇଲ୍ ବ୍ୟବହାର କରି ୪୭ ଜଣ ଧରା ପଡ଼ିଛନ୍ତି।
ଏହି ଦୁଇ ଦିନ ମଧ୍ୟରେ ଟ୍ରାଫିକ୍ ପୁଲିସ ୯, ବଡ଼ବଜାର ଥାନା ପୁଲିସ ୫, ଟାଉନ୍ ଥାନା ପୁଲିସ ୪, ଜରଡ଼ା ଥାନା ପୁଲିସ ୩ ଏବଂ ଦିଗପହଣ୍ଡି ଥାନା ପୁଲିସ ୨ ମଦୁଆ ଡ୍ରାଇଭର୍ଙ୍କୁ ଧରିବାରେ ସଫଳ ହୋଇଛି। ଟ୍ରାଫିକ୍ ଆଇନକୁ ସମସ୍ତେ ମାନିବାକୁ ନିବେଦନ କରାଯାଇଛି।
