କଣ୍ଟାବାଞ୍ଜି, ୧୮/୦୭ : ମୃତ୍ୟୁ କେତେବେଳେ କାହାକୁ କେମିତି ଆସେ ତାହା କେହି କହିପାରିବେ ନାହିଁ। ଏଭଳି ଏକ ଘଟଣା ଘଟିଛି କଣ୍ଟାବାଞ୍ଜି ଥାନା କୁକୁଡ଼ାହାଡ଼ ଗାଁରେ। ରାତିରେ ପରିବାର ସହ ହସଖୁସିରେ ଖାଇଲେ ପିଇଲେ, ହେଲେ ସକାଳ ହେଲା ବେଳକୁ ଭେଣ୍ଡିଆ ପୁଅର ମୃତ୍ୟୁ ଖବର ଶୁଣିବେ ବୋଲି କେହି ଭାବି ନଥିଲେ। ପୋଖରୀରେ ଗାଧୋଇ ଘରକୁ ଫେରୁଥିବା ବେଳେ ବାଟରେ ପଡି କୁକୁଡ଼ାହାଡ଼ ଗାଁର ଜଣେ ଯୁବକଙ୍କ ମୃତ୍ୟୁ ହୋଇଛି।
ସୂଚନାନୁଯାୟୀ, କୁକୁଡ଼ାହାଡ଼ ଗାଁର ଗୋବିନ୍ଦ କୁଅର ସକାଳୁ ନିଜ ଚାଷ ଜମିକୁ କାମ କରିବାକୁ ଯାଇଥିଲା। କାମ ସାରି ଗାଁ ପୋଖରୀକୁ ଗାଧୋଇ ସେଠାରୁ ନିଜ ଘରକୁ ଫେରୁଥିଲେ। ହେଲେ ଘର ପହଞ୍ଚିବାର ପ୍ରାୟ ୫୦ ମିଟର ପୂର୍ବରୁ ରାସ୍ତାରେ ହଠାତ୍ ପଡିଯାଇଥିଲା। ତୁରନ୍ତ ଗାଁ ଲୋକ ଗୋବିନ୍ଦଙ୍କୁ ଆମ୍ବୁଲାନ୍ସ ଯୋଗେ କଣ୍ଟାବାଞ୍ଜି ଡାକ୍ତରଖାନାକୁ ଚିକିତ୍ସା ପାଇଁ ଆଣିଥିଲେ। ହେଲେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ତେବେ ଗୋବିନ୍ଦଙ୍କ ମୃତ୍ୟୁ ପରେ ଗାଁରେ ଶୋକାକୁଳ ପରିବେଶ ସୃଷ୍ଟି ହୋଇଛି। କଣ୍ଟାବାଞ୍ଜି ପୋଲିସ ଡାକ୍ତରଖାନା ପହଞ୍ଚି ଅଧିକ ତଦନ୍ତ ଆରମ୍ଭ କରିଛି।