ଭୁବନେଶ୍ୱର, ୧୩/୦୪: ଟିକିଏ ଅସାବଧାନତାରୁ ଚାଲିଗଲା ଜୀବନ । ଶିଶୁପାଳଗଡ଼ରେ ୧୧ କେଭି ବିଦ୍ୟୁତ୍ ତାର ସଂପର୍ଷରେ ଆସି ଜଣେ ଯୁବକ ମୃତ୍ୟୁ ବରଣ କରିଛନ୍ତି । ମୃତକ ହେଉଛନ୍ତି ଦଶପଲ୍ଲା ଥାନା ଗୋଡ଼ିବିଡା ଗ୍ରାମର ୨୨ ବର୍ଷିୟ ମାନସ ନାୟକ । ଭୁବନେଶ୍ୱରର ବାଲିପାଟଣା ଅଞ୍ଚଳରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ମାନସ ଶିଶୁପାଳଗଡ଼ରେ ଭଡାରେ ରହୁଥିଲେ । ଶୁକ୍ରବାର ରାତିରେ ଶିଶୁପାଳଗଡ ସ୍ଥିତ ଭଡା ଘରକୁ ଫେରିଥିଲେ । ବାଲକୋନିରେ କିଛି ସମୟ ଠିଆ ପରେ ସାମ୍ନା ଥିବା ୧୧ କେଭି ତାରକୁ ଅନ୍ୟମନସ୍କ ଭାବେ ଧରି ପକାଇଥିଲେ । ଏଥିରେ ମାନସଙ୍କ ଶରୀର ଜଳି ଉଠିଥିଲା । ପରେ ସେ ମୃତ୍ୟ ବରଣ କରିଥିଲେ । ଅଘଟଣ ସମୟରେ ମାନସଙ୍କୁ ନିକଟରେ ଥିବା ଅନ୍ୟ ଜଣେ ଯୁବକ ଅଳ୍ପକେ ରକ୍ଷା ପାଇଯାଇଛନ୍ତି । ତେବେ ଏହି ଘଟଣାର ସମ୍ପୂର୍ଣ୍ଣ ଦୃଶ୍ୟ ସିସିଟିଭିରେ କଏଦ ହୋଇଛି । ଏନେଇ ଖବର ପାଇବା ପରେ ଧଉଳି ଥାନା ପୋଲିସ ମୃତଦେହ ଜବତ କରି ବ୍ୟବଛେଦ ପାଇଁ ପଠାଇଛନ୍ତି ।
