ନୂଆଦିଲ୍ଲୀ ୦୬/୦୭: ଆଭିଆନ୍ ଇନ୍ଫ୍ଲୁଏନ୍ଜା, ୱେଷ୍ଟ ନାଇଲ୍ ଭାଇରସ୍ ବା ଇବୋଲା ଭଳି ଜୁନୋଟିକ୍ ରୋଗ ବିରୋଧରେ ପ୍ରଥମ ଟିକାକରଣକୁ ସମ୍ମାନ ଜଣାଇ ପ୍ରତିବର୍ଷ ଜୁଲାଇ ୬ ତାରିଖରେ ପାଳିତ ହୁଏ ବିଶ୍ୱ ଜୁନୋସିସ୍ ଦିବସ ।
୧୮୮୫ ମସିହା, ଜୁଲାଇ ୬ ତାରିଖରେ ଫ୍ରାନ୍ସ ଜୀବବିଜ୍ଞାନୀ ଲୁଇସ ପାଶ୍ଚର ଜୁନୋଟିକ୍ ରୋଗ ଜଳାତଙ୍କ ବିରୋଧରେ ଟିକାକରଣର ପ୍ରଥମ ଡୋଜ୍ ଦେଇଥିଲେ । ତା’ରି ସ୍ମୃତିରେ ପ୍ରତିବର୍ଷ ଏହି ଦିବସ ପାଳିତ ହେଉଛି । ଜନ୍ତୁଙ୍କଠାରୁ ମଣିଷକୁ ବ୍ୟାପୁଥିବା ଜୁନୋଟିକ୍ ରୋଗ ବିଷୟରେ ଲୋକଙ୍କ ଜ୍ଞାନ ବଢ଼ାଇବା ଓ ସଚେତନତା ସୃଷ୍ଟି ଲାଗି ଏହି ଦିବସ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରେ । ଜୁନୋଟିକ୍ ରୋଗକୁ ସାଧାରଣତଃ ଜୁନୋସିସ୍ ବୋଲି କୁହାଯାଏ । ଏହା ଏକ ସଂକ୍ରାମକ ରୋଗ, ଯାହା ଜୀବାଣୁ ଦ୍ୱାରା ପଶୁଙ୍କଠାରୁ ମଣିଷକୁ ବ୍ୟାପିଥାଏ । ଏହି ଜୀବାଣୁ ଜନ୍ତୁ ଓ ମଣିଷ ମଧ୍ୟରେ ପ୍ରତ୍ୟେକ୍ଷ କିମ୍ବା ପରୋକ୍ଷ ସଂସ୍ପର୍ଶ ଜରିଆରେ ବ୍ୟାପିଥାଏ । ଏହା ବ୍ୟାକ୍ଟେରିଆ ଜନିତ, ଭାଇରାଲ୍ ଓ ପରଜୀବୀ ହୋଇପାରେ । ଚଳିତ ବର୍ଷ ଏହି ଦିବସ ଜୁନୋଟିକ୍ ରୋଗ ନିୟନ୍ତ୍ରଣରେ ପ୍ରଗତି ଉପରେ ଆଲୋକପାତ କରୁଛି ।