ହିନ୍ଦୋଳ,୦୩/୧୦: କୁକୁର ଗୋଡାଇବାରୁ ପୋଖରୀକୁ ଡେଇଁ ପଡିଲେ ମହିଳା । ଗଭୀର ପାଣିରେ ବୁଡ଼ି ଚାଲିଗଲା ମହିଳାଙ୍କ ଜୀବନ । ମୃତ ମହିଳା ଜଣକ ୪୫ ବର୍ଷୀୟ ମହିଳା କୁନି ପ୍ରଧାନ ବୋଲି ଜଣାପଡ଼ିଛି । ଢେଙ୍କାନାଳ ଜିଲ୍ଲା ହିନ୍ଦୋଳ ବ୍ଲକ ବମ୍ପା ପଞ୍ଚାୟତ ବ୍ରାହ୍ମଣିଆ ପାଳ ଗାଁରେ ଏଭଳି ଘଟଣା ଘଟିଛି ।
କୁନି ପ୍ରଧାନ ତାଙ୍କ ଗାଁ ପୋଖରୀକୁ ଗାଧୋଇବାକୁ ଯାଉଥିଲେ । ଏହି ସମୟରେ ତାଙ୍କୁ କିଛି କୁକୁର ଗୋଡ଼ାଇଥିଲା । ସେ ଭୟଭୀତ ହୋଇ ପୋଖରୀକୁ ଡେଇଁ ପଡ଼ିଥିଲେ । ପୋଖରୀର ଗଭୀର ପାଣିରେ ବୁଡ଼ି ଯାଇଥିଲେ କୁନି । ଏହା ଦେଖି ସ୍ଥାନୀୟଲୋକେ ତାଙ୍କୁ ତୁରନ୍ତ ସେଠାରୁ ଉଦ୍ଧାର କରିଥିଲେ । କିନ୍ତୁ ସେତେବେଳକୁ ଗଭୀର ପାଣିରେ ଶ୍ୱାସରୁଦ୍ଧ ହୋଇ ମହିଳାଙ୍କ ମୃତ୍ୟୁ ହୋଇସାରିଥିଲା । ପରେ ଏହି ଘଟଣା ସମ୍ବନ୍ଧରେ ପୋଲିସକୁ ଖବର ଦେଇଥିଲେ ସ୍ଥାନୀୟଲୋକେ । ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ମହିଳାଙ୍କ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି । ତେବେ ଏଭଳି ଏକ ଅଭାବନୀୟ ଘଟଣା ହେବା ଫଳରେ ଗାଁରେ ଶୋକର ଛାୟା ଖେଳିଯାଇଛି ।
