ହିନ୍ଦୋଳ,୧୮/୧୨: ଘର ବାହାରକୁ ପରିସ୍ରା କରିବାକୁ ଯିବା ବେଳେ ଘୋଷାଡ଼ି ମାରିଲା ଦନ୍ତା । ମୃତକ ବଙ୍ଗୁ ଗ୍ରାମର ଶିଖର ସାହୁ ବୟସ (୭୫) ବୋଲି ଜଣାପଡିଛି । ଢେଙ୍କାନାଳ ଜିଲ୍ଲା ହିନ୍ଦୋଳ ବନାଞ୍ଚଳ ବଙ୍ଗୁ ଗ୍ରାମରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ମଙ୍ଗଳବାର ବିଳମ୍ୱିତ ରାତିରେ ଶିଖର ନିଜ ନାତିକୁ ଧରି ଘର ବାହାରକୁ ପରିସ୍ରା କରିବାକୁ ଯାଇଥିଲେ । ଏହି ସମୟରେ ଘର ବାହାରେ ଛକି ବସିଥିଲା ମୃତ୍ୟୁ । ଘର କବାଟ ଖୋଲୁ ଖୋଲୁ ଶିଖରଙ୍କୁ ଭିଡ଼ି ନେଇ ଗୋଡ଼ରେ ଦଳି ଚକଟି ପକାଇଥିଲା ହାତୀ । ନାତି ସୂର୍ଯ୍ୟକାନ୍ତକୁ ଗୋଡ଼ାଇବାରୁ ସେ ଘର ଭିତରକୁ ପଶିଯାଇ ଗ୍ରାମବାସୀଙ୍କୁ ଡାକିଥିଲେ । ଖବର ପାଇ ଘଟଣା ସ୍ଥଳରେ ଗ୍ରାମବାସୀ ପହଞ୍ଚିବା ବେଳକୁ ଶିଖରଙ୍କ ମୃତ୍ୟୁ ହୋଇ ସାରିଥିଲା । ଏହା ଦେଖି ଗ୍ରାମବାସୀ ତୁରନ୍ତ ବନ ବିଭାଗର କର୍ମଚାରୀଙ୍କୁ ଖବର ଦେଇଥିଲେ । ଖବର ପାଇ ଘଟଣା ସ୍ଥଳରେ ବନବିଭାଗ ଅଧିକାରୀ ପହଞ୍ଚିଥିଲେ । ସେଠାରେ ପହଞ୍ଚି ଲୋକଙ୍କୁ ବୁଝାଇ ଶବକୁ ଜବତ କରି ଶବ ବ୍ୟବଚ୍ଛେଦ ପାଇଁ ହିନ୍ଦୋଳ ମେଡିକାଲକୁ ପଠାଇଛନ୍ତି । ଅନ୍ୟପଟେ ଲୋକଙ୍କୁ ସୁରକ୍ଷା ଦେବାରେ ବନ ବିଭାଗ ଫେଲ ମାରିଥିବାରୁ ଘଟଣା ସ୍ଥଳରେ ଚାପା ଉତ୍ତେଜନା ସୃଷ୍ଟି ହୋଇଛି ।
