ନୂଆଦିଲ୍ଲୀ,୭।୧୦: ଜମ୍ମୁ-କଶ୍ମୀର ବିଧାନସଭା ନିର୍ବାଚନର ଫଳାଫଳ ମଙ୍ଗଳବାର ଆସିବାକୁ ଯାଉଛି, କିନ୍ତୁ ଏହା ପୂର୍ବରୁ ଏକଜିଟ୍ ପୋଲ୍ର ଅନୁମାନକୁ ନେଇ ଚର୍ଚ୍ଚା ବଢିଛି। ଅଧିକାଂଶ ଏଗଜିଟ୍ ପୋଲ୍ ନ୍ୟାସନାଲ କନଫ୍ରେନ୍ସ ଓ କଂଗ୍ରେସ ମେଣ୍ଟକୁ ୩୫ରୁ ୪୦ଟି ଆସନ ମିଳିବାର ଅନୁମାନ କରାଯାଉଛି, ସେଭଳି ବିଜେପିର ପ୍ରାୟ ୨୫ ରୁ ୨୮ ଆସନରେ ରହିବାର ଯୋଜନା ରହିଛି। ୯୦ ଆସନ ଥିବା ବିଧାନସଭାରେ ଯଦି କଂଗ୍ରେସ ଓ ଏନ୍ସିର ମେଣ୍ଟ ୪୦ ଆସନ ନେଇଯାଏ ତେବେ ତା ପାଇଁ ଏହା ବହୁତ ବଡ ସଫଳତା, କିନ୍ତୁ ସରକାର ଗଠନ କରିବା ଠାରୁ ଦୂରରେ ରହିବ। ଏଭଳି ସ୍ଥିତିରେ କିଙ୍ଗ୍ଙ୍କଠାରୁ କିଙ୍ଗମେକର ଅଧିକ ଗୁରୁତ୍ବପୂର୍ଣ୍ଣ ହୋଇଯିବେ। ଆଉ ସେ ହେଉଛନ୍ତି ମେହବୁବା ମୁଫତି।
ସେ ପୂର୍ବରୁ ବିଜେପି ସହ ମିଶି ସରକାର ଗଠନ କରିସାରିଛନ୍ତି, କିନ୍ତୁ ଆର୍ଟିକିଲ ୩୭୦ ହଟିବା ପରେ ହିଁ ସେ ବିଜେପିଠାରୁ ଲଗାତାର ଦୂରତ୍ବ ବଢାଇ ଦେଇଛନ୍ତି। ବର୍ତ୍ତମାନ ସେ ବିଜେପି ବିରୋଧରେ ଲଢୁଛନ୍ତି। କଂଗ୍ରେସ ଓ ଏନ୍ସି ସହ ମେଣ୍ଟ ଉପରେ ସେ ଚୁପ୍ ରହିଛନ୍ତି, କିନ୍ତୁ ବିଜେପି ତୁଳନାରେ ଏହି ଲୋକଙ୍କ ସହ ଯିବା ସେ ଠିକ୍ ବୋଲି ବୁଝି ପାରନ୍ତି। ତଥାପି ମଧ୍ୟ ଏହାର ମୁଲ୍ୟ ସେ ନେବାକୁ ଚାହିଁବେ। ଯଦି ଏନ୍ସି ଓ କଂଗ୍ରେସ ମିଶି ୪୦ ଆସନ ପାଆନ୍ତି ତଥାପି ବହୁମତଠାରୁ ୬ ଆସନ ଦୂର ହେବ। ଏତେ ସିଟ୍ ଯଦି ପିଡିପି ନେଇଯିବ ତେବେ କିଙ୍ଗମେକର ହୋଇଯିବ।
ଏବେ ଏହା ବିଜେପିର ସ୍ଥିତି ଉପରେ ନିର୍ଭର କରିବ ଯେ, ପିଡିପି କିଭଳି ବାର୍ଗେନ କରିବ। ଯଦି ବିଜେପି ଭଲ ନମ୍ବର ଆଣେ ତେବେ ପୁଣିଥରେ ପିଡିପି ତା’ର ଭୟ ଦେଖାଇ ଉପଯୁକ୍ତ ମୂଲ୍ୟ ନେଇପାରେ। ଏପରିକି କଂଗ୍ରେସ ଓ ଏନ୍ସି ଉପରେ ସେ ସିଏମ୍ ହେବାର ଚାପ ପକାଇ ପାରନ୍ତି। କଂଗ୍ରେସ ଓ ନ୍ୟାସନାଲ କନଫ୍ରେନ୍ସ ପାଇଁ ମଧ୍ୟ ତାଙ୍କର ଦାବିକୁ ଖାରଜ କରିବା ସହଜ ହେବନି।
