ଭୁବନେଶ୍ୱର ୧୭/୧୨(ଡାକ୍ତର ଅଶ୍ୱିନୀ କୁମାର ସାହୁ): ଅପସ୍ମାର ବା ଏପିଲେପ୍ସି ରୋଗ ମସ୍ତିଷ୍କରେ ଥିବା ସ୍ନାୟୁ କୋଷରେ ଅତ୍ୟଧିକ ବୈଦ୍ୟୁତିକ ପ୍ରବାହ ସୃଷ୍ଟି କରିଥାଏ । ଏଥିରେ ଆକ୍ରାନ୍ତ ଲୋକ ବାରମ୍ବାର ମୂର୍ଚ୍ଛା ହେବା ସହ ପାଟିରୁ ଫେଣ ବାହାରେ । ଆପେ ଆପେ ପରିସ୍ରା ହୋଇଯାଏ । ଜିଭ କାମୁଡ଼ି ପକାଇବାରୁ କ୍ଷତ ବି ହୋଇଥାଏ । କେତେକ ଲୋକଙ୍କ ଶରୀରର ଏକ ନିର୍ଦ୍ଦିଷ୍ଟ ଅଙ୍ଗରେ ଫିଟ୍ସ୍ ବା ବାତ ମାରିବା ଦେଖା ଦେଇଥାଏ । ଏହାକୁ ଫୋକାଲ୍ ସିଜର୍ ବୋଲି କୁହାଯାଏ । ପିଲାମାନଙ୍କଠାରେ ଏହି ରୋଗ ଦେଖାଦେଲେ ଅନ୍ୟମନସ୍କତା ଓ ଶୂନ୍ୟକୁ ଚାହିଁ ରହିବା ଭଳି ଲକ୍ଷଣ ପ୍ରକାଶ ପାଏ । ଏହାକୁ ଆବସେନ୍ସ ସିଜର କହନ୍ତି।
କାରଣ
ଏପିଲେପ୍ସିର କୌଣସି ସ୍ପଷ୍ଟ କାରଣ ଅଧିକାଂଶ ଆକ୍ରାନ୍ତଙ୍କ କ୍ଷେତ୍ରରେ ନଥାଏ । ମୁଖ୍ୟତଃ ଏହା ଏକ ଜେନେଟିକ୍ ରୋଗ । କେତେକ କ୍ଷେତ୍ରରେ ମୁଣ୍ଡରେ ଆଘାତ (ବ୍ରେନ୍ ଷ୍ଟ୍ରୋକ୍), ଟ୍ୟୁମର, ମେନିନ୍ଜାଇଟିସ୍, ଏନ୍ସିଫାଲାଇଟିସ୍ ଓ ନିୟମିତ ଅତ୍ୟଧିକ ନିଶା ସେବନ ଯୋଗୁଁ ମଧ୍ୟ ଏ ରୋଗ ଦେଖା ଦେଇଥାଏ । ସେହିପରି ଛୋଟ ପିଲାଙ୍କ ମସ୍ତିଷ୍କରେ କୌଣସି କ୍ଷତ ସୃଷ୍ଟି ହେବାରୁ ସେମାନେ ଏପିଲେପ୍ସି (ଅପସ୍ମାର)ରେ ଆକ୍ରାନ୍ତ ହୋଇଥାନ୍ତି । ଅପସ୍ମାର ଆକ୍ରାନ୍ତଙ୍କ ପାଇଁ ଗାଡ଼ି ଚାଳନା, ସନ୍ତରଣ ଓ ନିଆଁ ପାଖରେ କାମ କରିବା ମନା । କାରଣ ଗାଡ଼ି ଚଳାଇବା ସମୟରେ ଅଚାନକ ଦୁର୍ଘଟଣା ଆଶଙ୍କା ଥାଏ । ସେହିପରି ନଦୀ, ନାଳ, ପୋଖରୀରେ ସନ୍ତରଣ କରୁଥିଲେ ପାଣିରେ ବୁଡ଼ିଯିବା ସହ ନିଆଁ ପାଖରେ କାମ କରିବା ମଧ୍ୟରେ ପୋଡ଼ି ହେବାର ଆଶଙ୍କା ରହିଛି । ଏହି ସମୟରେ ବେଶି ସମୟ ଧରି ବାତ ମାରିଲେ ପାଟିରୁ ଅତ୍ୟଧିକ ନାଳ ଓ ଫେଣ ବାହାରି ଶ୍ୱାସନଳୀକୁ ରୁଦ୍ଧ କରିଥାଏ । ଫଳରେ ଶ୍ୱାସରୁଦ୍ଧ ହୋଇ ମଧ୍ୟ ଆକସ୍ମିକ ମୃତ୍ୟୁ ଘଟେ ।
ପ୍ରକାରଭେଦ ଅନୁସାରେ ଚିକିତ୍ସା
ଏହି ରୋଗର ଚିକିତ୍ସାରେ ଆଦୌ ଅବହେଳା କରିବେ ନାହିଁ । ଡାକ୍ତରଙ୍କ ପରାମର୍ଶକ୍ରମେ ଔଷଧ ସେବନ କରିବା ନିତାନ୍ତ ଆବଶ୍ୟକ । ଏଥିଲାଗି ଫେନିଟୋଇନ୍, ଭାଲପ୍ରୋଏଟ୍, ଲେଭେଟିରାସିଟାମ୍ ଆଦି ଅନେକ ଔଷଧ ସେବନ ଆବଶ୍ୟକ ପଡ଼ିଥାଏ । ସେହିପରି କୋସାମାଇଡ୍ ଓ ପେରାମ୍ପାନେଲ୍ ଆଦି ଅନେକ ନୂଆ ଔଷଧ ଏବେ ଉପଲବ୍ଧ ହେଲାଣି । ଯେଉଁ ଆକ୍ରାନ୍ତଙ୍କ ଶରୀରରେ ଔଷଧ କାମ କରେନାହିଁ, ଅତ୍ୟାଧୁନିକ ଚିକିତ୍ସା ପ୍ରଣାଳୀରେ ସୂକ୍ଷ୍ମ ଅପରେସନ୍ କରିବା ଲାଗି ସୁଯୋଗ ରହିଛି । ଏହି ରୋଗରେ ଆକ୍ରାନ୍ତ ଲୋକେ ନିଦ୍ରାହୀନତାରୁ ଦୂରେଇ ରହିବା ସହ ଅଧିକ ସମୟ ମୋବାଇଲ୍ ଓ ଟିଭି ଦେଖିବା ଉଚିତ ନୁହେଁ । ନିଶା ସେବନରୁ ସମ୍ପୂର୍ଣ୍ଣ ନିବୃତ୍ତ ରହିବେ । ଅନ୍ୟର ପ୍ରରୋଚନାରେ ପଡ଼ି ଅପସ୍ମାର ରୋଗୀଙ୍କୁ ଝଡ଼ାଫୁଙ୍କା, ପୂଜାପାଠ, ନାକରେ ଚପଲ ଶୁଙ୍ଘାଇବା ଅନୁଚିତ । ଏସବୁ କରିବା ଦ୍ୱାରା କିଛି ସୁଫଳ ମିଳିନଥାଏ । ନିୟମିତ ବ୍ୟବଧାନରେ ସ୍ନାୟୁ ରୋଗ ବିଶେଷଜ୍ଞଙ୍କ ପରାମର୍ଶ ନେଇ ଔଷଧ ସେବନ କଲେ ଆକ୍ରାନ୍ତ ଲୋକେ ବିପଦମୁକ୍ତ ହେବା ସହ ସାଧାରଣ ଜୀବନଯାପନ କରିପାରିବେ ।
