ଭୁବନେଶ୍ୱର,୨୧/୦୬: ରଜ ପଳେଇଲାଣି । ଜୁନ୍ ୨୦ ତାରିଖ ହେଲାଣି । ହେଲେ ବର୍ଷା ଦେଖା ନାହିଁ । ରାଜ୍ୟରେ ଜୁନ୍ ପହିଲାରୁ ଏଯାଏଁ ମାତ୍ର ୫୭.୪ ମିଲିମିଟର ବର୍ଷା ହୋଇଛି । ଯେତିକି ହେବା କଥା, ତା’ଠାରୁ ୫୦% କମ୍ । ୨୬ ଜିଲ୍ଲାରେ ନିଅଣ୍ଟିଆ ବର୍ଷା । ୧୦ ଜିଲ୍ଲା ଅବସ୍ଥା ସାଂଘାତିକ, ୬୦%ରୁ ୭୫% ପର୍ଯ୍ୟନ୍ତ ବର୍ଷା ନିଅଣ୍ଟିଆ ସ୍ଥିତି । ଏଥିରୁ ଜଳଜଳ-ଚାଷୀଙ୍କ ଅବସ୍ଥା କେମିତି ଥିବ... ।
ଚାଷୀ ଉପରକୁ ଅନେଇ ବସିଛି । ମଝିରେ ମଝିରେ ପାଣିପାଗ ବିଭାଗର ମୌସୁମୀ ପାଗ ଅନୁକୂଳ ଖବର ମନରେ ଆଶା ଭରୁଛି । ମାତ୍ର ସକାଳୁ ତତଲା ହାୱାରେ ସବୁ ଆଶା ଶୁଖିଯାଉଛି । ବର୍ଷା ଗାଏବ । ଯେଉଁଠି ଆଜି ଘଡ଼ଘଡ଼ି ସହ ଢାଳୁଛି, ସେଠାରେ କାଲି ସକାଳୁ ପୁଣି ତାତି ମାଡ଼ ଆରମ୍ଭ ହୋଇଯାଉଛି ।
ମୌସୁମୀ ଧକେଇ ଧକେଇ ଆଗକୁ ବଢ଼ୁଛି । ବର୍ଷାର ଦେଖା ନାହିଁ । ବିସ୍ତୃତ ଅଞ୍ଚଳରେ ଚାଷଜମି ଶୁଖିଲା ପଡ଼ିଛି । ଚାଷୀ ଧାନ ବୁଣିବାକୁ ଅପେକ୍ଷା କରି ରହିଛି । ଦିନ ଗଡ଼ି ଚାଲିଛି । ଏମିତିରେ ଦୀର୍ଘମିଆଦି ଧାନ ବିହନ ଧରି ବସିଥିବା ଚାଷୀଙ୍କ ମୁଣ୍ଡ ଗୋଲ୍ ହେଲାଣି । ଆଉ କେତେ ଦିନ ଅପେକ୍ଷା କରିବାକୁ ପଡ଼ିବ?
ଭାତ ହାଣ୍ଡି କୁହାଯାଉଥିବା କଳାହାଣ୍ଡିରେ ୭୫% ବର୍ଷା ନିଅଣ୍ଟିଆ ସ୍ଥିତି ଥିବାବେଳେ ମୟୂରଭଞ୍ଜରେ ୭୩%, କେନ୍ଦୁଝରରେ ୭୨%, ବୌଦ୍ଧରେ ୭୩%, ପୁରୀରେ ୭୦%, ବଲାଙ୍ଗୀରରେ ୬୬%, ବାଲେଶ୍ୱରରେ ୬୮%, ଖୋର୍ଦ୍ଧାରେ ୬୪%, ନୟାଗଡ଼ରେ ୬୦%, ଅନୁଗୁଳରେ ୬୭% ବର୍ଷା ନିଅଣ୍ଟିଆ ସ୍ଥିତି ଚିନ୍ତା ବଢ଼ାଇଲାଣି ।
ସମ୍ବଲପୁର, ଦେବଗଡ଼, କନ୍ଧମାଳ, ମାଲକାନଗିରିକୁ ଛାଡ଼ିଦେଲେ ବାକି ଜିଲ୍ଲାଗୁଡ଼ିକରେ ବି ବର୍ଷା ଅଭାବ । ତାଜା ସୂଚନା ହେଲା, ମୌସୁମୀ ଆଗକୁ ବଢ଼ି ମାଲକାନଗିରି ପରେ କୋରାପୁଟ, ନବରଙ୍ଗପୁର, ରାୟଗଡ଼ାକୁ ପ୍ରବେଶ କରିବା ସହ ଗଜପତିକୁ ହାଲ୍କା ଛୁଇଁଛି । ପାଣିପାଗ ବିଭାଗ ଆଶା ଦେଖାଇଲାଣି, ୩-୪ ଦିନ ଭିତରେ ମୌସୁମୀ ରାଜ୍ୟରେ ଆଗକୁ ବଢ଼ିବାକୁ ପାଗ ଅନୁକୂଳ ।
ଗୁରୁବାର ବାରିପଦା, ଫୁଲବାଣୀ, ଝାରସୁଗୁଡ଼ାରେ ଭଲ ବର୍ଷା ହୋଇଛି । ରାଉରକେଲା, ବରଗଡ଼, ହୀରାକୁଦ, ସମ୍ବଲପୁରରେ ବି ଅଳ୍ପ ବର୍ଷା ରେକର୍ଡ ହୋଇଛି । ମାତ୍ର ବିସ୍ତୃତ ଅଞ୍ଚଳ ପଡ଼ିଛି ଶୁଖିଲା । ବର୍ଷାର ଦେଖା ନାହିଁ ରାଜ୍ୟର ଅନେକ ଅଞ୍ଚଳରେ । ଯେତିକି ହେଉଛି, ଅସରାଏ ଲେଖାଏଁ ଘଡ଼ଘଡ଼ି ସହ । ତା’ ପର ଦିନ ପୁଣି ଶୁଖିଲା, ତତଲା ।
ଗୁରୁବାର ଅନୁଗୁଳ ତାପମାତ୍ରା ୪୦.୭, ବାରିପଦା ୪୦.୬, ଝାରସୁଗୁଡ଼ା ୪୦.୧, ବୌଦ୍ଧ ୪୦.୫ ଡିଗ୍ରୀ ସେଲସିୟସ୍ ଥିଲା । ଉପକୂଳରେ ଗରମ ଓ ଗୁଳୁଗୁଳି ଯୋଗୁ ନାକେଦମ ହୋଇଥିଲା ଜନଜୀବନ । ଚାନ୍ଦବାଲି ତାପମାତ୍ରା ୩୯.୮, ଢେଙ୍କାନାଳ ୩୯.୨, ଜଗତ୍ସିଂହପୁର ୩୯, କେନ୍ଦ୍ରାପଡ଼ା ୩୯, ଖୋର୍ଦ୍ଧା ୩୯.୫, ନୟାଗଡ଼ ୩୯, ଭୁବନେଶ୍ୱର ୩୮.୭, କଟକ ୩୮.୮ ଡିଗ୍ରୀ ଥିବାବେଳେ ଆର୍ଦ୍ରତା ୬୦ରୁ ୯୧% ପର୍ଯ୍ୟନ୍ତ ଥିଲା । ଅପରାହ୍ନ ସାଢ଼େ ୫ଟାବେଳେ ବାଲେଶ୍ୱରରେ ଆର୍ଦ୍ରତା ୯୧% ଥିବାବେଳେ ଭୁବନେଶ୍ୱର ୬୮%, କଟକ ୭୦%, ଜଗତ୍ସିଂହପୁର ୭୧% ଥିଲା ।
ପାଣିପାଗ ବିଭାଗ କହିଛି, ଶୁକ୍ରବାର ରାଜ୍ୟର ଅନେକ ସ୍ଥାନରେ ଘଡ଼ଘଡ଼ି ସହ ବର୍ଷା ହୋଇପାରେ । ୨୩ଟି ଜିଲ୍ଲାର ସ୍ଥାନେ ସ୍ଥାନେ ଘଡ଼ଘଡ଼ି ସହ ୩୦-୪୦ କିମି ବେଗରେ ପବନ ଆଶଙ୍କା ଅଛି । ଅନ୍ୟପକ୍ଷରେ ଉପକୂଳ ଓଡ଼ିଶାରେ ଗରମ ସହ ଭୀଷଣ ଗୁଳୁଗୁଳି ହେବ । ପାଣିପାଗ ବିଭାଗ ଆଶା ଦେଖାଇଛି- ଆସନ୍ତା ୩ ଦିନ ଭିତରେ ରାଜ୍ୟରେ ତାପମାତ୍ରା ୨ରୁ ୩ ଡିଗ୍ରୀ କମିପାରେ ।
ତେବେ ଆସନ୍ତା ୨୬/୨୭ ତାରିଖ ବେଳକୁ ବଙ୍ଗୋପସାଗରରେ ଘୂର୍ଣ୍ଣିବଳୟ ସୃଷ୍ଟି ହୋଇ ଦୁର୍ବଳ ଲଘୁଚାପ ହୋଇପାରେ । ଏହା ପ୍ରଭାବରେ ମାସ ଶେଷବେଳକୁ ରାଜ୍ୟରେ ମୌସୁମୀ ସକ୍ରିୟ ହେବା ସହ ବର୍ଷା ବଢ଼ିପାରେ ।