ଭୁବନେଶ୍ୱର,୨୨/୦୪: ନିଆଁ ବର୍ଷୁଛି ପଶ୍ଚିମ ଓ ଆଭ୍ୟନ୍ତରୀଣ ଓଡ଼ିଶାରେ । ପାରଦ ୪୫ ଡିଗ୍ରୀ ସେଲସିୟସ୍ ଡେଇଁଛି, ଝାରସୁଗୁଡ଼ା (୪୫.୪ ଡିଗ୍ରୀ) ପାଲଟିଛି ଦେଶର ଦ୍ୱିତୀୟ ଉତ୍ତପ୍ତ ସହର । ୧୪ ସହରରେ ତାପମାତ୍ରା ୪୦ ଡିଗ୍ରୀ ପାର୍ କରିଛି । ସେଥିରୁ ୧୧ଟି ସହରରେ ତାପମାତ୍ରା ୪୨ ଡିଗ୍ରୀରୁ ଅଧିକ ଥିଲା ।
ଉପକୂଳ ଓଡ଼ିଶାରେ ତାତି କମ୍ ଥିଲେ ବି ଅସମ୍ଭାଳ ହୋଇଛି ଗୁଳୁଗୁଳି ପ୍ରକୋପ । ମେ’ ଶେଷ ଭଳି ଗୁଳୁଗୁଳି ଅତିଷ୍ଠ କରି ପକାଇଲାଣି ଏପ୍ରିଲରେ । ଡରାଇଲାଣି ପାଣିପାଗ ପୂର୍ବାନୁମାନ, ଆଗକୁ ତାତି ଆହୁରି ସାଂଘାତିକ ରୂପ ନେବ । ୨୫ ତାରିଖ ଯାଏ ଟିକିଏ ବି ନିସ୍ତାର ଆଶା ନାହିଁ । ଆଭ୍ୟନ୍ତରୀଣ ଓ ପଶ୍ଚିମ ଓଡ଼ିଶା ଜଳିବ ଗ୍ରୀଷ୍ମ ଲହରୀରେ । ୨୩ରୁ ଉପକୂଳ ଓଡ଼ିଶାରେ ତାତି ପ୍ରକୋପ ଆହୁରି ନୟାନ୍ତ କରିବ ।
ଭୀଷଣ ଗରମ ଓ ଗୁଳୁଗୁଳି ପାଇଁ ରାଜ୍ୟରେ ଅଂଶୁଘାତ ଆକ୍ରାନ୍ତ ସଂଖ୍ୟା ବଢ଼ିଛି । ଏବେ ସୁଦ୍ଧା ରାଜ୍ୟର ବିଭିନ୍ନ ସ୍ଥାନରେ ଅଂଶୁଘାତରେ ୫୦ ଜଣ ଆକ୍ରାନ୍ତ ହୋଇ ହସ୍ପିଟାଲକୁ ଆସିଥିବା ସରକାରୀ ଭାବେ କୁହାଯାଇଛି । କେବଳ ସମ୍ବଲପୁରରେ ୪୦, ଦେବଗଡ଼ରେ ୬, ଖୋର୍ଦ୍ଧା, ମୟୂରଭଞ୍ଜ, କେନ୍ଦୁଝରରେ ଜଣେ ଲେଖାଏଁ ବ୍ୟକ୍ତି ଅଂଶୁଘାତ ଆକ୍ରାନ୍ତ ହୋଇଥିଲେ ଗତକାଲି ସନ୍ଧ୍ୟା ସୁଦ୍ଧା । ଏ ସଂଖ୍ୟା ଆହୁରି ବଢ଼ିବ । ସ୍କୁଲ, କଲେଜ ଓ ଅଙ୍ଗନବାଡ଼ିରୁ ପିଲାମାନେ ଘରକୁ ଫେରିବାବେଳେ ପ୍ରଚଣ୍ଡ ଗରମରେ ଝାଇଁ ହୋଇ ପଡ଼ୁଛନ୍ତି । ମାତ୍ର ଏପର୍ଯ୍ୟନ୍ତ ସ୍କୁଲ, କଲେଜ, ଅଙ୍ଗନବାଡ଼ିରେ ଖରା ଛୁଟି ନେଇ କିଛି ସରକାର ନିଷ୍ପତ୍ତି ନେଇନାହାନ୍ତି । ସ୍ୱତନ୍ତ୍ର ରିଲିଫ କମିଶନରଙ୍କ କାର୍ଯ୍ୟାଳୟ ପକ୍ଷରୁ ସମସ୍ତ ଜିଲ୍ଲାପାଳଙ୍କୁ ଚିଠି ମାଧ୍ୟମରେ ସତର୍କତା ପଦକ୍ଷେପ ପାଇଁ ନିର୍ଦ୍ଦେଶ ଦିଆଯାଇଛି ।
ପାଣିପାଗ ବିଭାଗ ପୂର୍ବାନୁମାନ ଅନୁସାରେ ବର୍ତ୍ତମାନ ମୁଖ୍ୟତଃ ଦକ୍ଷିଣ ଓଡ଼ିଶାର ଅଳ୍ପ କିଛି ସ୍ଥାନରେ କାଳବୈଶାଖୀ ପ୍ରଭାବରେ ହାଲୁକା ବର୍ଷା ଓ ପବନ ହୋଇପାରେ । ମାତ୍ର ବିସ୍ତୃତ ଅଞ୍ଚଳରେ ଏବେ ବର୍ଷା ସମ୍ଭାବନା ନାହିଁ । ଅପରପକ୍ଷରେ ଆସନ୍ତାକାଲି (ମଙ୍ଗଳବାର) ଝାରସୁଗୁଡ଼ା, ବଲାଙ୍ଗୀର, ସୁନ୍ଦରଗଡ଼, ସମ୍ବଲପୁରରେ ଗ୍ରୀଷ୍ମ ପ୍ରବାହ ଆଶଙ୍କା ଅଛି । ୨୩ରୁ ସ୍ଥିତି ଆହୁରି ଅସହ୍ୟ ହେବ । ଆଭ୍ୟନ୍ତରୀଣ ଓ ପଶ୍ଚିମରେ ଗ୍ରୀଷ୍ମ ପ୍ରବାହ ପ୍ରକୋପ ବଢ଼ିବା ସହ ଉପକୂଳ ଓ ସଂଲଗ୍ନ ଜିଲ୍ଲାମାନଙ୍କରେ ଗରମ, ଗୁଳୁଗୁଳି ଆହୁରି ଛଟପଟ କରିବ । ୨୫ ଯାଏଁ ଏମିତି ସ୍ଥିତି ଲାଗି ରହିବ । ଆସନ୍ତା ୨ ଦିନ ଭିତରେ କେତେକ ସ୍ଥାନରେ ତାପମାତ୍ରା ୩ରୁ ୫ ଡିଗ୍ରୀ ପର୍ଯ୍ୟନ୍ତ ବଢ଼ିପାରେ । ଆଭ୍ୟନ୍ତରୀଣ ଓ ପଶ୍ଚିମର ଅନେକ ଜିଲ୍ଲାରେ ତାପମାତ୍ରା ୪୨ ଡିଗ୍ରୀ ଉପରେ ରହିବା ସମ୍ଭାବନା ଅଛି । ୨୬ରୁ ଗରମ ପ୍ରକୋପ କମିବା ସହ କାଳବୈଶାଖୀ ବଢ଼ିପାରେ ।
ସୋଆ ଜଳବାୟୁ ଓ ପରିବେଶ କେନ୍ଦ୍ର ନିର୍ଦ୍ଦେଶକ ଡକ୍ଟର ଶରତ ଚନ୍ଦ୍ର ସାହୁ କହିଛନ୍ତି, ୨୫ ତାରିଖ ପରେ ତାତି କ୍ରମଶଃ କମିବ । ବର୍ତ୍ତମାନ ଉତ୍ତର-ପଶ୍ଚିମ ପଟୁ ତତଲା, ଶୁଷ୍କ ପବନ ଆଭ୍ୟନ୍ତରୀଣ ଓ ପଶ୍ଚିମ ଓଡ଼ିଶାକୁ ପ୍ରବେଶ କରୁଥିବାରୁ ତାତି ବଢ଼ୁଛି । ଆରବ ସାଗର ପଟୁ କର୍ଣ୍ଣାଟକ ଦେଇ ଉପକୂଳ ଓଡ଼ିଶା ଆଡ଼କୁ ଆସୁଥିବା ପବନରେ ଜଳୀୟବାଷ୍ପ ଅଧିକ ରହୁଛି । ଯେଉଁଥିପାଇଁ ଉପକୂଳରେ ଭୀଷଣ ଗୁଳୁଗୁଳି ଅନୁଭୂତ ହେଉଛି । ସାଧାରଣତଃ ମେ’ର ଶେଷ ଭାଗବେଳକୁ ଏଭଳି ଗୁଳୁଗୁଳି ହୋଇଥାଏ । ଏପ୍ରିଲରେ କେବଳ ଟାଣ ଖରା ଓ ଝାଞ୍ଜି ମାଡ଼ ହୁଏ । ଆସନ୍ତା ୨୩ରୁ ଉପକୂଳରେ ତାତି ପ୍ରକୋପ ବଢ଼ିବା ସହ ଗୁଳୁଗୁଳି କମିପାରେ । ଉପକୂଳ ୨୬ରୁ ଓ ଆଭ୍ୟନ୍ତରୀଣ ୨୭ରୁ ତାତିରୁ ନିସ୍ତାର ପାଇବେ । ୨୭ରୁ ୩୦ ତାରିଖ ପର୍ଯ୍ୟନ୍ତ ରାଜ୍ୟରେ କାଳବୈଶାଖୀ ଅଧିକ ରହିବ ।
ପାଣିପାଗ ବିଭାଗର ପୂର୍ବାନୁମାନ ହେଲା, ମଙ୍ଗଳବାର ଝାରସୁଗୁଡ଼ା ପୁଣି ୪୫ ଟପିବା ସହ ବଲାଙ୍ଗୀର, ଟିଟିଲାଗଡ଼ ଆଦି ସ୍ଥାନରେ ପାରଦ ୪୪ ଛୁଇଁପାରେ । ଉପକୂଳ ଓଡ଼ିଶାରେ ତାପମାତ୍ରା ୩୮ ଡିଗ୍ରୀ ପାଖାପାଖି ରହିବ । ୨୫ ଯାଏଁ ଆଭ୍ୟନ୍ତରୀଣ ଓ ପଶ୍ଚିମରେ ଏଭଳି ଗ୍ରୀଷ୍ମ ପ୍ରବାହ ଲାଗି ରହିବ । ୨୨ରେ ଉପକୂଳରେ ପାରଦ ୩୮, ୨୩ରେ ୩୯ ଡିଗ୍ରୀ ସେଲସିୟସ୍ ଟପିପାରେ । ୨୪ ତାରିଖରେ ଉପକୂଳରେ ତାପମାତ୍ରା ପ୍ରାୟତଃ ୪୦-୪୧ ଡିଗ୍ରୀ ଛୁଇଁପାରେ ।
ସୋମବାର ଝାରସୁଗୁଡ଼ା ତାପମାତ୍ରା ୪୫.୪, ବୌଦ୍ଧ ୪୩.୨, ସମ୍ବଲପୁର ୪୩, ସୁନ୍ଦରଗଡ଼ ୪୩, ଟିଟିଲାଗଡ଼ ୪୩, ଭବାନୀପାଟଣା ୪୨.୫, ହୀରାକୁଦ ୪୨.୪, ବଲାଙ୍ଗୀର ୪୨.୩, ସୋନପୁର ୪୨.୧, ରାଉରକେଲା ୪୨, ବରଗଡ଼ ୪୨ ଡିଗ୍ରୀ ଥିଲା । ନୂଆପଡ଼ା, ଅନୁଗୁଳ ଓ ପାରଳାଖେମୁଣ୍ଡିରେ ପାରଦ ୪୦-୪୧ ଡିଗ୍ରୀ ପାର୍ କରିଥିବାବେଳେ ଉପକୂଳରେ ଚାନ୍ଦବାଲି ୩୮.୨, ବାଲେଶ୍ୱର ୩୭, ଭୁବନେଶ୍ୱର ୩୬ ଥିଲା । ଉପକୂଳ ଅଞ୍ଚଳରେ ଆର୍ଦ୍ରତା ୬୦%ରୁ ୭୦% ଥିଲା ।
