ନୂଆଦିଲ୍ଲୀ,୨୨/୦୪: ମୃତ ସରକାରୀ କର୍ମଚାରୀଙ୍କ ପରିବାରଙ୍କ ପ୍ରତି ରାଜ୍ୟ ସରକାର ସମ୍ବେଦନଶୀଳ । ସ୍କୁଲ୍, କଲେଜଠାରୁ ଆରମ୍ଭ କରି ସଚିବାଳୟରେ କାର୍ଯ୍ୟ କରୁଥିବା ୩ ହଜାରରୁ ଉଦ୍ଧ୍ୱର୍ ମୃତ ସରକାରୀ କର୍ମଚାରୀଙ୍କ ପରିବାର ସଦସ୍ୟଙ୍କୁ ସରକାରୀ ଚାକିରି ମିଳିବ । ରାଜ୍ୟ ସରକାରଙ୍କ ପକ୍ଷରୁ ଆଡଭୋକେଟ୍ ଜେନେରାଲ ପୀତାମ୍ବର ଆଚାର୍ଯ୍ୟ ସୋମବାର ସୁପ୍ରିମକୋର୍ଟରେ ଏହା କହିଛନ୍ତି । ସେ କହିଛନ୍ତି, ଏ ନେଇ ୨୦୨୦ ନିୟମର ସଂଶୋଧନ କରାଯାଇଛି । ସଂଶୋଧିତ ଆଇନ ୨୦୨୫ ଅନୁଯାୟୀ ଜଣେ କାର୍ଯ୍ୟରତ ସରକାରୀ କର୍ମଚାରୀ ପ୍ରାଣ ହରାଇଲେ ତାଙ୍କ ପରିବାରର ଜଣେ ସଦସ୍ୟଙ୍କୁ ଓଡ଼ିଶା ସରକାର ସରକାରୀ ଚାକିରି ଦେବେ ।
ବିଚାରପତି ଜେ କେ ମାହେଶ୍ୱରୀ ଏବଂ ବିଚାରପତି ଅରବିନ୍ଦ କୁମାରଙ୍କୁ ନେଇ ଗଠିତ ଖଣ୍ଡପୀଠଙ୍କ ନିକଟରେ ଏହି ମାମଲାର ସୋମବାର ଶୁଣାଣି ହୋଇଥିଲା । ଏଜି ପୀତାମ୍ବର ଆଚାର୍ଯ୍ୟ କହିଥିଲେ, ୧୯୯୦ର ଆଇନ ଅନୁସାରେ ସରକାରୀ ଚାକିରିରେ କାର୍ଯ୍ୟରତ ଥିବା ଜଣେ କର୍ମଚାରୀ ପ୍ରାଣ ହରାଇଲେ ତାଙ୍କ ପରିବାରର ଜଣେ ସଦସ୍ୟଙ୍କୁ ସରକାରୀ ଚାକିରି ପ୍ରଦାନ କରାଯିବ ବୋଲି ବ୍ୟବସ୍ଥା ଥିଲା । ୨୦୨୦ରେ ଏହି ନିୟମକୁ ତତ୍କାଳୀନ ସରକାର ପରିବର୍ତ୍ତନ କରିଥିଲେ । ନୂଆ ସରକାର ଏହାକୁ ସଂଶୋଧନ କରିଛନ୍ତି । ଏହା ସରକାରୀ ଗେଜେଟ୍ରେ ପ୍ରକାଶ ପାଇଛି । ତେବେ ଶ୍ରୀ ଆଚାର୍ଯ୍ୟ କହିଥିଲେ ଯେ, ବ୍ଲକ୍ ଗ୍ରାଣ୍ଟ ପାଉଥିବା କେତେକ ବିଦ୍ୟାଳୟ ଓ ମହାବିଦ୍ୟାଳୟର ପ୍ରତିବାଦୀଙ୍କ କ୍ଷେତ୍ରରେ ଏହି ଆଇନ କାର୍ଯ୍ୟକାରୀ ହେବନି । ସେମାନଙ୍କ ମାମଲା ଅଲଗା ଭାବେ ବିଚାର କରାଯାଉଛି । ଏମାନଙ୍କ ସଂଖ୍ୟା ୨୦/୨୫ ହୋଇପାରେ ବୋଲି ଏଜି କହିଥିଲେ । ସେମାନଙ୍କ ଏକ ଅଲଗା ତାଲିକା କରିବା ପାଇଁ ଖଣ୍ଡପୀଠ କହିଥିଲେ ।
ପରବର୍ତ୍ତୀ ଶୁଣାଣି ମେ ୨ ତାରିଖରେ ରାଜ୍ୟ ସରକାର ଏହି ତାଲିକା କୋର୍ଟରେ ଉପସ୍ଥାପନ କରିବେ । ସୁପ୍ରିମକୋର୍ଟରେ ପାଖାପାଖି ୩ଶହରୁ ଉଦ୍ଧ୍ୱର୍ ପ୍ରତିବାଦୀ ରହିଛନ୍ତି । ଦେବାଶିଷ ରଥ ନାମକ ଜଣେ ପ୍ରତିବାଦୀଙ୍କ ପକ୍ଷରୁ ସୁପ୍ରିମକୋର୍ଟର ବରିଷ୍ଠ ଓକିଲ ସୁରେନ୍ଦ୍ର କୁମାର ପତ୍ରୀ ଓ ଓକିଲ ରଭିଶ କୁମାର ତ୍ରିପାଠୀ ସେମାନଙ୍କ ପକ୍ଷ ରଖିଥିଲେ ।
ଉଲ୍ଳେଖନୀୟ ଯେ, ୨୦୨୦ରେ ନବୀନ ପଟ୍ଟନାୟକଙ୍କ ସରକାର ୧୯୯୦ ଆଇନର ସଂଶୋଧନ କରିବା ଫଳରେ ମୃତ ସରକାରୀ କର୍ମଚାରୀଙ୍କ ପରିବାର ସଦସ୍ୟ ଅନୁକମ୍ପାମୂଳକ ନିଯୁକ୍ତି ପାଇବାରୁ ବଞ୍ଚିତ ହୋଇଥିଲେ । କେତେକ କର୍ମଚାରୀଙ୍କ ପରିବାର ସଦସ୍ୟ ଓଡ଼ିଶା ହାଇକୋର୍ଟରେ ଏହା ବିରୋଧରେ ଆବେଦନ କରିଥିଲେ । ଓଡ଼ିଶା ହାଇକୋର୍ଟ ରାଜ୍ୟ ସରାକାରଙ୍କ ନିଷ୍ପତ୍ତିକୁ ଅଗ୍ରାହ୍ୟ କରିଦେଇଥିଲେ । ନବୀନ ପଟ୍ଟନାୟକ ସରକାର ୨୦୨୩ ଜୁନ୍ ୨୭ରେ ସୁପ୍ରିମକୋର୍ଟର ଦ୍ୱାରସ୍ଥ ହୋଇଥିଲେ ।
ଗତ ଫେବ୍ରୁଆରୀ ୨ରେ ସୁପ୍ରିମକୋର୍ଟରେ ଏହି ମାମଲାର ପ୍ରଥମ ଶୁଣାଣି ହୋଇଥିଲା । ଏଜି ପୀତାମ୍ବର ଆଚାର୍ଯ୍ୟ ସୁପ୍ରିମକୋର୍ଟରେ କହିଥିଲେ ଯେ, ନୂଆ ରାଜ୍ୟ ସରକାର ୨୦୨୦ର ଏହି ଆଇନର ପୁନର୍ବିଚାର କରିବା ପାଇଁ ଚିନ୍ତା କରୁଛନ୍ତି । ଏହାପରେ ମାମଲା ଏପ୍ରିଲ ୨୧କୁ ସ୍ଥଗିତ ହୋଇଥିଲା । ଆଜି ଏହାର ଶୁଣାଣି ଶେଷ ହେବା ପରେ ଆଡଭୋକେଟ୍ ଜେନେରାଲ ପୀତାମ୍ବର ଆଚାର୍ଯ୍ୟ ‘ପ୍ରମେୟ'କୁ କହିଥିଲେ ଯେ, ନୂଆ ସରକାରଙ୍କ ସଂଶୋଧିତ ଆଇନ-୨୦୨୫ ଦ୍ୱାରା ୩ ହଜାରରୁ ଉଦ୍ଧ୍ୱର୍ ମୃତ ସରକାରୀ କର୍ମଚାରୀଙ୍କ ପରିବାର ସଦସ୍ୟ ଏଥିରୁ ଲାଭବାନ ହେବେ ।
